ەكىجاقتى كەزدەسۋدە ونەركاسىپتىك كووپەراتسيا جوبالارىن ىسكە اسىرۋ, جەڭىل ونەركاسىپ پەن قورعانىس-ونەركاسىپ كەشەنى مەن كولىك سالاسىنداعى ىنتىماقتاستىقتى كەڭەيتۋ ماسەلەلەرى تالقىلاندى.
مارات قاراباەۆ اتاپ وتكەندەي, باۋىرلاس مەملەكەتتەر ونەركاسىپتىك كووپەراتسيا سالاسىندا 2,2 ملرد دوللار سوماسىنا 10,5 مىڭ جۇمىس ورنىن اشۋدى كوزدەيتىن 42 بىرلەسكەن جوبانى ىسكە اسىرىپ جاتىر. ونىڭ 29-ى ەلىمىزدە بولسا, 13 جوبا كورشىلەس ەلدە جۇزەگە اسىرىلىپ كەلەدى.
سونداي-اق كەزدەسۋ بارىسىندا كولىك سالاسىنداعى جوبالار, اتاپ ايتقاندا «داربازا – ماقتاارال» جانە «مازاري-شاريف – كابۋل – پەشاۆار» جاڭا تەمىرجول جەلىلەرىنىڭ قۇرىلىسى جان-جاقتى قارالدى. ماسەلەن, داربازا ستانساسىنان ماقتاارال ستانساسىنا دەيىنگى ۇزىندىعى 106 شاقىرىمداي جەلىنى سالۋدى كوزدەيتىن جوباسىن ىسكە اسىرۋ «سارىاعاش» وتكىزۋ پۋنكتىندەگى جۇكتەمەنى ازايتىپ, جىلىنا 10 ملن تونناعا دەيىن قوسىمشا جۇك اعىنىن تارتۋعا, سونداي-اق تۇركىستان وبلىسىنىڭ ماقتارال اۋدانىن نەگىزگى تەمىرجول تارماعىمەن بايلانىستىرۋعا جول اشادى.
سونىمەن قاتار قوس تاراپ ەكى ەل اراسىنداعى اۋە رەيستەرىن ۇلعايتۋ جولدارىن قاراستىرۋعا كەلىستى.
قازىر كورشىلەس مەملەكەتتەر اراسىندا اپتاسىنا 20 رەيس ورىندالىپ كەلە جاتقانىن ايتا كەتكەن ورىندى. ايتالىق, 5 رەيس استانا – تاشكەنت, 14 رەيس الماتى – تاشكەنت جانە 1 رەيس اقتاۋ – نۋكۋس باعىتىندا جۇزەگە اسىرىلىپ كەلەدى.
