مەملەكەت باسشىسى ەلدى گازداندىرۋدى 60%-عا جەتكىزۋ جونىندە مىندەت قويدى. جالپى «كوگىلدىر وتىنعا» 11,8 ملن-نان استام تۇرعىنى بار 1 800-دەن استام ەلدى مەكەن قوسىلۋى ءتيىس.
«بۇل تاپسىرمانى ەنەرگەتيكا مينيسترلىگى, «قازمۇنايگاز» جانە «QazaqGaz» كومپانيالارى مەن اكىمدەر تولىق كولەمدە ورىنداۋى ءتيىس», دەدى پرەمەر-مينيستر.
وعان قوسا ۇكىمەت باسشىسى 2019 جىلى سالىنعان «سارىارقا» ماگيسترالدىق گاز قۇبىرىنىڭ بويىندا ءتيىستى ينفراقۇرىلىم تارتىلىپ, قاجەتتى ىسكە قوسۋ كەشەندەرى ورناتىلعانىن ايتتى. الايدا استانا قالاسى, قاراعاندى جانە اقمولا وبلىستارىنىڭ تۇرعىندارىن كوپتەن كۇتكەن گازعا قوسۋ قارقىنى وتە تومەن دەڭگەيدە قالىپ وتىر.
«بۇل وڭىرلەردىڭ تۇرعىندارى گاز تاراتۋ جەلىلەرى جوق, رۇقسات قۇجاتتارىن الۋ قيىن جانە گازعا قوسىلۋ قىمبات دەپ شاعىمدانادى. بۇل وسى وڭىرلەرگە عانا ەمەس, سونىمەن قاتار گازبەن قامتىلعان باسقا وڭىرلەرگە دە قاتىستى», دەدى ءاليحان سمايىلوۆ.
ۇكىمەت باسشىسى مىسال رەتىندە الماتى وبلىسىنىڭ بيعاش اۋىلىندا تۇرعىندارعا گاز وتكىزۋگە 10 جىل بويى ۋادە بەرىلىپ كەلگەنىن ايتتى. تۇركىستان وبلىسىنىڭ تولەبي اۋدانىنداعى الشالى اۋىلىنىڭ تۇرعىندارى دا بىرنەشە جىلدان بەرى كوگىلدىر وتىن كۇتىپ ءجۇر.
پرەمەر-ءمينيستردىڭ ايتۋىنشا, باتىس قازاقستان وبلىسىنىڭ زەلەنوە اۋىلىندا (ورال قالاسىنان 5 كم) گاز 2014 جىلى وتكىزىلگەن, بىراق وسى كۇنگە دەيىن اكىمشىلىك عيماراتتار عانا قوسىلعان.
«اۋىلدىق ەلدى مەكەندەردەن باسقا, قالالاردا دا حالىقتى گازبەن قامتاماسىز ەتۋدە پروبلەمالار بار. ناتيجەسىن وزدەرىڭىز كورىپ وتىرسىزدار, استانا ءالى دە «كوك تۇتىنگە كومىلىپ», اۋانىڭ لاستانۋ دەڭگەيى بويىنشا الەمدىك رەيتينگتەردە كوش باستاپ تۇر. الماتىدا 2 جەو-دا جاڭا بۋ-گاز قوندىرعىسىن سالۋ مەرزىمى كەيىنگە شەگەرىلدى. ءوڭىر اكىمدەرى مەن «QazaqGaz» كومپانياسىنا وسى ماسەلەلەردى ەرەكشە باقىلاۋعا الۋ كەرەك», دەدى ءاليحان سمايىلوۆ.
پرەمەر-مينيستر ەلىمىزدىڭ سولتۇستىك جانە شىعىس وڭىرلەرىن گازداندىرۋ ماسەلەسىنە نۇكتە قوياتىن ۋاقىت جەتكەنىن ايتتى. سوندىقتان ەنەرگەتيكا مينيسترلىگى «سامۇرىق-قازىنا» قورىمەن بىرلەسىپ, 1 مامىرعا دەيىن تۇپكىلىكتى شەشىم دايىنداۋى قاجەت.
ءاليحان سمايىلوۆتىڭ ايتۋىنشا, گاز ينفراقۇرىلىمىنىڭ ابدەن توزۋى دا ماڭىزدى ماسەلە.
«جىلۋ جەلىلەرى ابدەن توزىپ-بىتكەن ەكىباستۇز بەن رۋدنىيداعى جاعدايدى ءبارىڭىز كورىپ وتىرسىزدار. ال گاز جەلىلەرىنە قىسىم وتە جوعارى, سوندىقتان قاۋىپ تە جوعارى. ماگيسترالدىق گاز قۇبىرلارىنىڭ باسىم بولىگى 30 جىلدان استام ۋاقىت بۇرىن سالىنعان جانە قوماقتى قاراجاتتى قاجەت ەتەدى», دەدى پرەمەر-مينيستر.
