تەمىرجول قۇرىلىسى قارقىندى جۇرگىزىلۋدە

قۇرىلىسى قولعا الىنعان جەزقازعان – سەكسەۋىل جانە ارقالىق – شۇباركول تەمىرجولى جوعارى ءۇيىندىسىنىڭ تۇيىستىرىلگەنىنە جارتى جىلدان استام ۋاقىت ءوتتى. اتقارىلعان جۇمىس – جۇزەگە اسىرىلۋى ءتيىس جوبانىڭ بەلگىلى ءبىر بولىگى عانا. قۇرىلىسشىلار الدىندا بۇدان دا كۇردەلى جانە جاۋاپتى مىندەت تۇر. وسى جانە باسقا دا تولعاندىرعان ماسەلە تۋرالى «جول جوندەۋشى» كومپانياسى» جشس باس ديرەكتورىنىڭ ورىنباسارى حۋرام مۇرادوۆپەن اڭگىمەلەسكەن ەدىك. – حۋرام مۇراد ۇلى, جەزقازعان-سەكسەۋىل جانە ارقالىق-شۇباركول تەمىرجولدارى قۇرىلىسىنىڭ باستى كەزەڭى – جولدىڭ جوعارى ءۇيىندىسىنىڭ ءتۇيىستىرىلۋى اياقتالدى. وتكەن جىل ىشىندە وسى قۇرىلىس اياسىندا «جول جوندەۋشى» كومپانياسى» جشس جۇزەگە اسىرعان ءىس-شارالارى تۋرالى ايتىپ بەرسەڭىز؟ – جەزقازعان – سەكسەۋىل تەمىرجولىنىڭ جوعارى ءۇيىندىسى تۇيىستىرىلگەننەن كەيىنگى كەزدە «جول جوندەۋشى» كومپانياسى وتە ۇلكەن كولەمدەگى قۇرىلىس-مونتاج جۇمىسىن جۇزەگە اسىردى. سونىڭ ىشىندە, ستانسالىق تارامدار مەن باعىتتامالىق بۇرمالار توسەلدى, سۋ اعاتىن ارنالار مەن قۇبىرلار, كوپىرلەر سالىن­دى. جول جيەگىنىڭ جارىن تالاپقا ساي كەلتىرۋ جانە جانۋارلار مەن جابايى اڭدارعا ارنالعان وتكەلدەر قۇرىلىسىن سالۋ, ويما­لاردىڭ اينالاسىن جايپاقتاۋ, ستانسا تارام­دارى, رازەزد عيماراتتارى سالىناتىن ورنىن دايىنداۋ جۇزەگە اسىرىلدى. سونىمەن قاتار, قۇلاما جاردىڭ جول جيەگى جەل ەروزياسىنا ۇشى­راماۋى ءۇشىن گەوتورمەن بەكىتىلدى, باللاستتاۋ جۇمىستارى جانە تاعى باسقالارى جۇرگىزىلدى. – بۇگىنگى كۇنى ۇنەمدەۋ جاعدايىندا سالا جول شارۋاشىلىعىنداعى پايدالانۋ شىعىنىن ازايتۋعا تىرىسۋدا. مىسالى, تەمىر-بەتون شپالدارىندا تۇيىسپەسىز تارام قۇراستىرماسى جانە ت.ب. ەنگىزىلۋدە. وسىعان ۇقساس شارالار وسى ەكى تەمىرجول قۇرىلىسى بارىسىندا قولدانىلا ما؟ – بۇل سۇراقتى ارقالىق – شۇباركول جانە جەزقازعان – سەكسەۋىل تەمىرجول جەلىلەرىنىڭ قۇرىلىسى تاريحىنا جاتقىزۋعا بولادى. وسى جوبالاردىڭ قۇرىلىسى باستالعان كەزدە پايدالانۋشىلار, جوبالاۋشىلار مەن قۇرىلىسشىلار اراسىندا تۇيىسپەسىز تارامدى پايدالانۋ تۋرالى قىزۋ پىكىرتالاس وتەتىن. شامامەن ءبىر اي بويى ءبىز تەحنيكالىق تاپسىرمانى قابىلداپ, كەلىسىمگە كەلە المادىق. جول پايدالانۋشىلار ەكى تەمىرجولدا دا تۇيىسپەسىز تارام قولدانۋدىڭ قاجەتتىگىنە باسا نازار اۋداردى. بۇل كەزدە قولدانىستاعى جەلى جاڭعىرتىلىپ, تارامدىق بۋىندار تۇيىسپەسىز تارامعا كوشىرىلىپ جاتقان بولاتىن. قۇرىلىسشىلار مەن جوبالاۋشىلار بۇل دالەلمەن كەلىسە قويمادى. ويتكەنى, جىلدامدىقتى ارتتىرىپ, قوزعالىس قاۋىپسىزدىگىن قامتاماسىز ەتۋگە مۇمكىندىك بەرەتىن تۇيىسپەسىز تارام ءسوزسىز جاڭعىرتۋ بولىپ تابىلادى جانە ونىڭ قۇرىلماسىن ەنگىزۋ ءۇشىن بۇل جاعدايدا, تۇراقتاندىرۋ توسەمى قاجەت. ياعني, تەمىرجول كولىگىنىڭ نەگىزگى كورسەتكىشى – جىلدامدىعى, جايلىلىعى, قاۋىپسىزدىگى بويىنشا قولدانىستاعى تارامنىڭ ىشكى جانە سىرتقى اسەر ەتۋشى فاكتورلارى تولىعىمەن زەرتتەلۋى ءتيىس. اتالعان اسپەكتىلەر زەرتتەلىپ بولعاننان كەيىن جانە جىلدامدىق پەن قاۋىپسىزدىككە اسەر ەتەتىن بارلىق فاكتوردى جويعاننان كەيىن عانا تۇيىسپەسىز تارامدى ەنگىزۋ تۋرالى ماسەلە كوتەرۋگە بولادى. تەمىرجول قۇرىلىسى باستالعان كەزدە, رەلەفتىك, گەوگرافيالىق, جەراستى جانە جەر بەتى جاعدايىن جەتە بىلمەي, سونىمەن قاتار, سالىناتىن جولعا اسەر ەتەتىن فاكتورلاردى زەرتتەپ الماي تۇيىسپەسىز تارام سالۋدىڭ تاۋەكەلى وتە ۇلكەن ەدى. سودان كەيىنگى ۋاقىتتا ونى ۇنەمى جاڭعىرتىپ وتىرۋعا تۋرا كەلەر ەدى. ەكى قۇرىلىستىڭ دا سالىنىپ ءبىتۋ مەرزىمى قىسقا بولاتىن. وسىعان دەيىن جۇزەگە اسىرىلعان جوبالاردىڭ ەشقايسىسى مىڭ شاقىرىمعا سوزىلعان ءشول دالا ارقىلى وتپەگەن شىعار. سالىناتىن تەمىر جولدىڭ بويى سورتاڭ جانە كوشپەلى قۇم بولىپ كەلەدى. ءبىز جىلدامدىق پەن قاۋىپسىزدىككە بەلگىلى ءبىر اسەرى بار وسى ارالىقتا مەكەندەيتىن جابايى اڭ مەن قۇستىڭ ءوتۋ جولىن, قۇم جانە قار كوشۋىنىڭ باعىتى مەن كولەمىن بىلگەن جوقپىز. وسىنىڭ ءبارىن ساراپتاي كەلە تۇيىسپەسىز تارام قۇرىلىمىن پايدالانۋدى ەرتەرەك دەپ شەشتىك. ءبىزدىڭ كەلتىرگەن دالەلىمىزگە باسقالاردىڭ دا كوزى جەتتى. سودان بەرى ءبىر جارىم جىل ۋاقىت ءوتىپ, ەكى جەلىنى ءتۇيىستىرىپ بولعاننان كەيىنگى ۋاقىتتا ءار كەزدەسكەن سايىن سول قابىلدانعان شەشىمنىڭ قانشالىقتى دۇرىس ەكەندىگىنە قايتا ورالىپ, تالاي رەت تالقىلادىق. ەگەر, تۇيىسپەسىز تارامدى بىردەن سالعان بولساق, وندا وزىمىزگە دە, تەكسەرۋشى ورگاندارعا دا اتالعان تەلىمدەردە قۇرام جىلدامدىعىن 80-نەن 120 كم/ساعات جىلدامدىققا نەگە كوتەرە المايتىنىمىزدى تۇسىندىرە الماس ەدىك. تەمىرجول توسەمىنىڭ استىنداعى جەر قىرتىسىنىڭ تۇراقتانۋى ءۇشىن تالاي جىل ۋاقىت كەرەك. تەمىرجولدا جىل سايىن جىلدامدىققا اسەر ەتەتىن قانداي دا ءبىر شوگۋ قۇبىلىسى مەن فاكتورى پايدا بولىپ جاتادى. – بۇگىنگى كۇنى جوبانىڭ جۇزەگە اسىرىلۋ جاعدايى قالاي؟ – تارام سالىنىپ بولعان قازىرگى كەزدە, جول بويىنا شىعىپ, قۇم كوشكىنى ورىن الاتىن جەردى انىقتايمىز. ەندىگى جاعدايدا جولدىڭ قاي جاعىنان قورعانىس شارالارىن جۇزەگە اسىرۋ قاجەتتىگى كورىنىپ تۇرادى. تۇتاستاي العاندا, تۇيىسپەسىز تارامدى ەسەپكە الماساق, پويىز قوزعالىسىن باسقارۋ, جىلدامدىقتى قاداعالاۋ, وتكەلدەر مەن كوپىرگە جەتپەي الدىن الا ەسكەرتەتىن اۆتوماتيكا جانە تەلەمەحانيكا قۇرالدارى ەڭ جەتىلگەن قازىرگى زامانعى دەڭگەيدە جۇمىس ىستەيدى. جولدىڭ وتكىزۋ مۇمكىندىگى قازىرگى زامان­عى Evolution سەريالى تەپلوۆوزى سيپاتتا­ماسىنا, تارام قۇرام سالماعى 3 مىڭ توننا ەمەس 5 مىڭ توننادان استامعا شىداس بەرە­تىندەي ەتىپ ەسەپتەلگەن. سونىمەن قاتار, جەزقازعان – سەكسەۋىل جوباسىندا كوپىردىڭ جەتىلدىرىلگەن قۇرىلىمى تەحنولوگياسىن قولداندىق. جينالمالى تەمىر-بەتون قۇرىلىمىنىڭ ورنىنا سالا بويىنشا العاش رەت دالا جاعدايىندا ءبىرتۇتاس ارالىق قۇرىلىم ەنگىزىلدى. بەرىكتىگى اسا جوعارى بەتون جاساۋ ءۇشىن سۋ دا, ينەرتتى ماتەريالدار دا جەتىسپەيتىن دالا جاعدايىندا ۇزىندىعى 45-70 مەتر بولاتىن ەكسپەريمەنتتىك ءتورت كو­پىر سالىندى. ءبىز سالعان وسى ءتورت كوپىر ار­قى­لى پويىزدار ويداعىداي ءوتتى. بۇل دا قول جەتكەن جەتىستىگىمىزدىڭ كۋاسى بولسا كەرەك. ءتورت كوپىردىڭ قۇراستىرمالى قۇرىلى­­مىن دايىنداۋ, ونى الدىمەن جەزقازعانعا, ودان دالالىق جولمەن ورناتىلاتىن ورنىنا دەيىن جەتكىزۋگە كەتكەن بارلىق شىعىندى قوسقاننىڭ وزىندە ءبىرتۇتاس جاساعان نۇسقا ادەتتەگى زاۋىتتا بولشەكتەپ جاساپ, بىرتىندەپ جەتكىزۋگە قاراعاندا 20-25% ارزانعا ءتۇستى. تەمىرجول قۇرىلىسى بارىسىندا قۇبىرلاردى پايدالانۋدىڭ تەحنولوگيا­سى تۋرالى ەرەكشە ايتىپ وتكەندى ءجون كوردىك. سوناۋ بايكال – امۋر ماگيسترالىن سالعان كەزدە گوفريرلەنگەن مەتالل قۇرىلىمى ەنگىزىلگەن بولاتىن. سودان كەيىنگى كەزدە ونى قۇراستىرۋ مەن پايدالانۋ بارىسىندا تۋىنداعان كەيبىر تەحنولوگيالىق قيىندىققا بايلانىستى بۇل ءادىس قولدانىستان شىعىپ قالدى. مەن «گوفريرلەنگەن مەتالل قۇرىلى­مىنان جاسالعان سۋ وتكىزەتىن قۇبىرلار تۇرعىزۋ بويىنشا نۇسقاما» دەپ اتالاتىن تەحنولوگيالىق كارتا قۇراستىرۋ باستاماسىن كوتەردىم. بۇل جۇمىسقا كومپانيا رەسەيدىڭ جەتەكشى عالىمدارىن تارتتى. گوفريرلەنگەن مەتالل قۇرىلىمىنىڭ تيپتىك جوبالارى جاسالىپ, بارلىق مەملەكەتتىك ورگانداردىڭ ماقۇلداۋىنان وتكىزىلدى. ولاردىڭ جوباداعى ءون­دىرىسكە ەنگىزىلۋ قاتار جۇرگىزىلدى. بۇگىنگى كۇ­نى «جول جوندەۋشى» كومپانياسى» جشس وسىن­­­­داي 30 سۋ وتكىزەتىن قۇبىردى ورناتىپ قوي­دى. ادەتتەگى الماتىدا دايىندالاتىن تەمىر-بەتون قۇرىلىمىنان ونى قۇرىلىس ءجۇرىپ جاتقان جەرگە دەيىن جەتكىزۋدىڭ شىعىنى مەن مەرزىمىن ەسكەرە وتىرىپ باس تارتتىق. ال, مەتالل قۇرىلىمىن ءبىز قاراعاندىدا, كەيبىر بولشەكتەرىن رەسەيدە جاساتتىق. سۋ وتكىزەتىن ەكى قۇبىردى سالىستىرساق, ءبىر جۇك ماشيناسى 15 قۇبىردىڭ مەتالل قۇرىلىمىن تاسىپ جەتكىزىپ بەرەدى. ال, 15 تەمىر-بەتون قۇبىر ءۇشىن 15 ۆاگون قاجەت بولادى ەدى. مىنە, ايىرماشىلىعى قانداي! مەتالل تەمىر-بەتونعا قاراعاندا الدەقايدا قىمبات. ەگەر, ونىڭ قۇبىر جاساۋعا كەتكەن كولەمىن ەسەپتەسەك, بىراق, ادەتتەگى قۇرىلىمعا قاراعاندا مەتالل قۇرىلىمىنان جاسالعان سۋ وتكىزەتىن قۇبىلار شىعىنى 10-12% ارزانعا ءتۇستى. سونداي-اق, مەتالل قۇرىلىمىنان جاسالاتىن قۇبىرلار ءۇشىن قۋاتتى كران قاجەت ەمەس. ونى شاعىن مانيپۋلياتورمەن-اق قۇراستىرۋعا بولادى. سالىستىرا قارا­­عان­دا, ارقاكول – شۇباركول, شالقار – بەينەۋ ­جوباسىن جۇزەگە اسىرۋدا بىزبەن قاتار ­جۇ­مىس ىستەپ جاتقان باسقا مەردىگەرلىك ۇيىم­­دار ءبىرتۇتاس كوپىر, گوفريرلەنگەن قۇ­بىر سياقتى تەحنولوگيانى پايدالان­­باعان­دى­عىن اي­تىپ وتكەن ءجون. – كومپانيانىڭ ماقتانا الاتىن قول جەتكىزگەن جەتىستىگى از ەمەس. دەگەنمەن, كەز كەلگەن جاڭالىقتى وندىرىسكە ەنگىزۋدىڭ وزىندىك قيىندىعى كەزدەسەدى. ايتىلعان شارانى جۇزەگە اسىرۋدا سىزدەر ءۇشىن ەشقانداي كەدەرگى بولمادى ما؟ – جاڭالىقتى وندىرىسكە ەنگىزۋدە شىنىندا دا اكىمشىلىك كەدەرگىلەر كەزدەسىپ جاتادى. اتالعان شارا بويىنشا ۇساق-تۇيەگىنە دەيىن قاراستىرىلىپ جاسالعان ەكى قۇجات بۇگىنگى كۇنگە دەيىن قازاقستان رەسپۋبليكاسى كولىك جانە كوممۋنيكاتسيا مينيسترلىگىنىڭ كو­لىك جانە جول قاتىناس­تارى كوميتەتىندە ءبىر جىل­دان بەرى بەكىتىل­مەي جاتىر. سودان بەرگى ۋا­قىت­تا «قازاقستان تەمىر جولى» ۇق» اق پەن كو­­ميتەت اراسىندا وسى قۇجاتتاردى بەكىتۋ بويىن­­شا تالاي حات جازىلدى. ازىرگە ءناتي­جە جوق. «جول جوندەۋشى» كومپانياسى باس مەردىگەر رەتىندە وسى قۇجاتتى دايىنداۋ جانە ونى ماقۇلداۋدان وتكىزۋ بويىنشا بار­لىق شىعىندى ءوزى كوتەرىپ وتىر. وسى نورما­تيۆتى قۇجاتتى دايىنداۋعا بيۋدجەت تاراپىنان ءبىر تيىن دا شىققان جوق. ءبىرتۇتاس كوپىر مەن گوفريرلەنگەن قۇبىر تەحنولوگياسىن باس­قا دا قۇرىلىس جوبالارىنا ەنگىزۋگە بولار ەدى. قۇجات قارالىپ, ماقۇلداۋدان وتسە, ونى كەڭىنەن پايدالانۋ ماسەلەسى شەشىلەدى. ءارى قا­راعاندىداعى زاۋىتقا تاپسىرىس كوبەيە­دى. بۇل ءۇشىن قۇجاتتىق نەگىزدەمە قاجەت. مەكەمە­نىڭ ءوز ىشىندەگى ستاندارتى ازدىق ەتەدى. سول قۇبىر­لاردى پايدالانۋعا رۇقسات بەرەتىن رەسپۋب­ليكالىق دەڭگەيدەگى قۇجات بولۋى ءتيىس. ءبىز ونى جاساپ بەردىك. وكىنىشكە قاراي, ونى مەم­­­­­­لەكەتتىك ورگاندار بەكىتپەي وتىر. ارينە, ءبىز­ ونىڭ تاياۋ ارادا ماقۇلداناتىنا سەنگىمىز كە­لەدى. – جەزقازعان – سەكسەۋىل تەمىرجولى ءشول دالا ارقىلى وتەتىندىكتەن, تەلىمدەر ارالىعىنىڭ باسىم بولىگىندە ەلەكتر ەنەر­­گياسىنىڭ تۇراقتى كوزى جوق. تەمىرجولدى ەلەكترمەن قامتاماسىز ەتۋ بويىنشا جۇرگىزىلىپ جاتقان جۇمىس بارىسى قالاي؟ – بيىلعى جىلدىڭ 25 مامىرىنداعى جاعداي بويىنشا اباي, سەكسەۋىل, كوكتال ستانسالارى ەنەرگيامەن قامتىلعاندىعىن اتاپ وتكىم كەلەدى. 110 كۆت سىرتتاي ەنەرگيامەن جابدىقتاۋدىڭ قۇرىلىسى 90% , جەزقازعاننان سەكسەۋىلگە دەيىنگى ارالىقتاعى بويلاي ەنەرگيامەن قامتاماسىز ەتۋ 60% اياقتالدى. جول بويىنداعى ستانسا كەزەكشىلەرى مەن قۇرىلىسشىلاردى ەنەرگيا­مەن تۇراقتى قامتاماسىز ەتۋ ءار ايىرىم پۋنكتىندە توك بەرۋدىڭ كەستەسى جاسالدى. بۇل ماسەلە وتكەن جىلى-اق شەشىلدى. ءبىز ءۇشىن ەشقانداي قيىندىق جوق. – بۇدان باسقا قانداي قيىندىقتار بولدى؟ – ءبىز سورتاڭدى جانە باتپاقتى جەر ارقىلى تالشىقتى-وپتيكالىق بايلانىس جەلىسىن توسەۋدە بەلگىلى ءبىر قيىندىقتارعا تاپ بولدىق. دەگەنمەن, بۇنىڭ ءبارى تەحنيكالىق ماسەلەلەر جانە ونى بىرتىندەپ شەشۋگە بولادى. كەنقياق – قۇمكول مۇناي قۇبىرى ارقىلى ءوتۋدىڭ وزىندىك قيىندىعى بولدى. وسى ارالىقتا مۇناي قۇبىرىنىڭ جۇمىسىن توقتاتىپ, ونى 550 مەتر جەرگە ورىن اۋىس­تىرىپ سالدىق. بۇل وتە ۇلكەن جانە جاۋاپتى جۇمىسقا «قازترانسويل» اق ماماندارى مەن قازاق-قىتاي مۇناي قۇبىرىنىڭ وكىلدەرىن تارتۋىمىزعا تۋرا كەلدى جانە ولاردىڭ وسى كومەگى ءۇشىن العىس ايتامىز. ءۇش تاراپ ماماندارىنىڭ قاتىسۋىمەن بۇل جۇمىستى ابىرويمەن اتقارىپ شىقتىق. ءبىز مۇناي قۇبىرى ارقىلى سالىنعان تارامدى ساتىمەن اياقتادىق. ال, مۇناي قۇبىرىنا يەلىك جاساۋشىلار وتكەن جىلدىڭ 17 قازانىندا سول جول ارقىلى پويىز جۇرگىزۋگە رۇقسات بەردى. – كومپانيا اعىمداعى جىلى قانداي جۇمىس جوسپارلاپ وتىر؟ – قازىرگى كەزدە قۇرىلىس باسى قىزۋ ەڭبەك. بۇگىنگە دەيىن جۇزەگە اسىرىلعان ءتۇيىستىرۋ – ول الداعى ۋاقىتتا سالىناتىن تەمىرجولدىڭ بەلگىلى ءبىر بولىگى عانا. 2014 جىلى اتقارىلاتىن جۇمىس كولەمى وتە ۇلكەن. جەزقازعان – سەكسەۋىل جەلىسىندە جالپى سوماسى 96 ملرد. تەڭگە قارجى يگەرۋىمىز قاجەت. وتكەن جىلى قارقىندى جۇمىس ىستەپ 86 ملرد. تەڭگە يگەردىك. ءبىرىنشى كەزەكتە رەلستى قالىڭدىعى 50 سم-دەن كەم بولمايتىن باللاست قاباتىنا قويۋىمىز قاجەت. بۇل وتە ۇلكەن جۇمىس جانە جۇمسالاتىن قارجى كولەمى دە زور. قيىرشىقتاس توسەپ, نىعىزداپ, تەگىستەپ, تۇزەتىپ سودان كەيىن جىلدامدىعى 80 كم/ساعاتتان كەم بولمايتىن قۇرامنىڭ قوزعالىس قاۋىپسىزدىگىن قامتاماسىز ەتەتىندەي ستاندارتقا ساي كەلەتىن جاعدايدا ءجۇرىس قالاپتاستىرۋىمىز قاجەت. سونداي-اق, Bombardier Transportation كومپانياسى جاساپ شىعاراتىن اۆتوماتيكا جانە تەلەمەحانيكا, بەلگى بەرۋ جۇيەسى جالپىتەحنولوگيالىق بايلانىس, TETRA ستاندارتى راديوبايلانىسىن قامتاماسىز ەتۋ بويىنشا ەۋروپالىق قۇرال-جابدىق ساتىپ الۋمەن بايلانىستى جوسپارلى جۇمىس جۇرگىزىلۋدە ەكەندىگىن اتاپ وتكىم كەلەدى. وسىنداي قازىرگى زامانعى قۇرال-جابدىق پويىزداردىڭ قاۋىپسىز قوزعالىسى مەن ونى باسقارۋدى قامتاماسىز ەتەدى. جەزقازعان – سەكسەۋىل جانە شالقار – بەينەۋ تەمىرجولى ارقىلى حالىق شارۋا­شىلىعى جۇگىن ورتالىق قازاقستاننان باتىس باعىتقا تاسىمالداۋعا مۇمكىندىك بەرەتىن كەشەننىڭ ءبىرىنشى كەزەگىن 2015 جىلدان باستاپ پايدالانۋعا بەرۋدى الدىمىزعا مىندەت ەتىپ قويدىق. ءبىز ونى تولىق ورىنداۋعا مۇمكىندىگىمىز جەتەدى. ءبىرىنشى كەزەكتە پايدالانۋعا بەرىلەتىن كەشەندەگى ايىرۋ پۋنكتتەرىنىڭ بارىندە بىردەي ينفراقۇرىلىم نىساندارى تولىعىمەن ىسكە قوسىلمايدى. ارالىق جەتى ستانسادا ەلەكترلى ورتالىقتاندىرىلعان قوسىنىمەن بىرىكتىرىلگەن ۆوكزال, تۇرعىن ءۇي, پايدالانۋ قىزمەتىن قامتاماسىز ەتۋگە ارنالعان وندىرىستىك عيماراتتار مەن يماراتتار سالىنادى. ءار ستانسا تۇرعىن ۇيمەن, گاراجبەن, سۋمەن, كوممۋنيكاتسيامەن, اۆتوكولىك جولىمەن قامتىلاتىن بولادى. الداعى جىلى كەشەننىڭ ەكىنشى كەزەگىن پايدالانۋعا بەرگەندە ەلەكتر جەتكىزۋ, بايلانىسشىلار ءۇشىن اۆتوبلوكتاۋ جەلىسى, جول جوندەۋشىلەر مەن لوكوموتيۆ بريگادالارى ءۇشىن كەيبىر اكىمشىلىك جانە جەلىلىك عيماراتتارمەن تولىقتىرىلادى. 2016 جىلدان باستاپ سالىنعان جەلى تولىققاندى پايدالانۋعا بەرىلەدى. بۇگىنگى كۇننىڭ وزىندە پرەزيدەنت پەن رەسپۋبليكا ۇكىمەتىنىڭ الدىمىزعا قويعان ستراتەگيالىق مىندەتى جۇزەگە اسىرىلۋدا دەپ ايتا الامىز. بۇل ەشقانداي كەدەرگىگە قاراماي كۇنى-ءتۇنى تەمىر جول جوباسى بويىنشا جۇمىس ىستەپ جاتقان مىڭداعان قۇرىلىسشىسى بار ۇجىمنىڭ جاسامپاز ەڭبەگىنىڭ ناتيجەسى. – ءسوز سوڭىندا ەلوردامىزدا باستالعان جاڭا ۆوكزال كەشەنى قۇرىلىسىنا «جول جوندەۋشى» كومپانياسى» جشس دە قاتى­سادى ەكەن. وسى جونىندە ايتىپ وتسەڭىز؟ – كومپانيا الدىنا استانانىڭ وڭتۇستىك-شىعىسىنداعى «مىڭجىلدىق» اللەياسى بويىندا تاۋلىگىنە 30 مىڭ جولاۋشى وتكىزە الاتىنداي مۇمكىندىگى بار قازىرگى زامانعى ۆوكزال كەشەنىن سالۋ مىندەتى قويىلدى. بۇل ۇلكەن كەشەن بولادى. ونىڭ ساۋلەتىن ەلباسى مەن ۇكىمەت استانا قالالىق كەڭەسىنىڭ قاتىسۋىمەن بىرنەشە رەت تالقىلاۋدان وتكىزدى. كەشەن «Sembol Construction» كومپانياسى كۇشىمەن سالىنادى. «جول جوندەۋشى» كومپانياسى كونسورتسيۋمدا جۇمىس ىستەيدى. ءبىزدىڭ كومپانيا كىرمە جولدار مەن ينفراقۇرىلىم نىساندارىن سالۋعا اتسالىسادى. 2017 جىلدىڭ مامىر ايىندا پايدالانۋعا تاپسىرىلاتىن جوبا قۇرىلىسىن ءۇش جىلدا اياقتاۋ جوسپارلانىپ وتىر. اعىمداعى جىلى جوبالاۋ جۇمىسى جۇزەگە اسىرىلىپ, اتالعان جول بويىنداعى عيماراتتار مەن يماراتتاردى بۇزۋ, سونىمەن قاتار, كوپىر جانە ۆوكزال عيماراتىنىڭ نەگىزگى قۇرىلىمى بويىنشا قۇرىلىس-مونتاج جۇمىسى باستالادى. 2014 جىلى ءبىز موينى­­­­مىزعا العان جۇمىس كولەمىنىڭ 10%-ىن يگەرە­مىز. جاڭا كەشەننىڭ ەڭ ۇلكەن جانە ەڭ قىم­باتقا تۇسەتىن نىسانى ۇزىندىعى 3 شاقى­رىم بولاتىن ەستاكادا بولايىن دەپ تۇر. بۇل با­عىتتاعى جۇمىستى بيىل ىرگەتاسىن تۇرعىزۋ­دان باستايمىز. سونداي-اق, نىسان اينالا­سىن­داعى بايلانىس جانە ەلەكتر جەلىسى, باسقا كوم­مۋنيكاتسيانىڭ ورنىن اۋىستىرىپ سالۋ قاراس­تىرىلعان. ءبىز الدىمىزعا قويىلعان مىندەتتى ابىرويمەن ورىنداپ شىعۋعا تولىق دايىنبىز. – اڭگىمەڭىزگە راحمەت. اڭگىمەلەسكەن داۋرەن مولداحمەتوۆ, «ترانس-ەكسپرەسس قازاقستان» جۋرنالىنىڭ ءتىلشىسى.