وسى ماسەلەگە بايلانىستى لوندون جارىقتىڭ لاستانۋىن ازايتۋ ءۇشىن ءزاۋلىم عيماراتتارداعى جارىقتى تۇندە ءوشىرۋدى جوسپارلاپ وتىر. بۇل جوبا تۇنگى ۋاقىتتا كوممەندانتتىق ساعات رەتىندە قابىلدانادى. ساعات 22.00-دەن كەيىن جارىق وشەدى. تەك قىلمىستىڭ الدىن الۋ ماقساتىندا قاۋىپسىزدىكتى قامتاماسىز ەتەتىن جارىقتار وشىرىلمەيدى.
جالپى جەر بەتىنىڭ تورتتەن ءبىر بولىگى جارىقتىڭ لاستانۋىنا ۇشىراعان. بۇل ايماقتاردا جەر شارى حالقىنىڭ شامامەن 80% تۇرادى. قالدىقتاردى ورتەۋ كەزىندە بولاتىن جىلۋ جارىقتارى تىپتەن زيان. ۆاشينگتون ۋنيۆەرسيتەتىنىڭ عالىمدارى مۇنى جاھاندىق جاندىكتەردىڭ جويىلۋىنا ىقپال ەتەتىن نەگىزگى فاكتورلاردىڭ ءبىرى دەدى. ويتكەنى جارىق جاندىكتەردى تارتادى, سودان كەيىن جويىلۋىنا اسەر ەتەدى.
جارىقتىڭ لاستانۋىنان جالعىز جاندىكتەر عانا جاپپاي قىرىلمايدى. ونىڭ وزگە كەلتىرەر شىعىنى مەن زالالى كوپ.
ادامزات تابيعاتتى ءوز قولىمەن لاستاپ جاتىر. بۇگىنگى تاڭدا اۆتوموبيلدەر پارنيكتىك گازداردىڭ نەگىزگى كوزى. ولار اتموسفەراعا ەنىپ, جەر بەتىندەگى تەمپەراتۋرانىڭ جوعارىلاۋىنا اكەلەدى.
2016 جىلى عالىمدار World Atlas تۇنگى اسپاننىڭ جارىقتىعى كارتاسىن جاريالادى. بۇل جارىقتىڭ لاستانۋى شىنىمەن دە جاھاندىق ماسەلە ەكەنىن كورسەتەدى. كارتا بىرنەشە مىڭ سپۋتنيكتىك سۋرەتتەرگە نەگىزدەلگەن جانە تۇندە جەر بەتىنىڭ قالاي جارقىرايتىنىن كورسەتەدى. وندا سولتۇستىك امەريكا, ەۋروپا, تاياۋ شىعىس جانە ازيا جارقىراعان گيرلياندامەن بەزەندىرىلگەندەي كورىنەدى. ال جەردىڭ شالعاي نەمەسە ادام تۇرمايتىن ايماقتارى – ساحارا, امازونكا ايماعى جانە ءسىبىردىڭ كەيبىر اۋداندارى تولىق قاراڭعىلىقتا بولعان.
قازىر گونكونگ الەمدەگى ەڭ لاستانعان قالا بولىپ سانالادى. زەرتتەۋشىلەردىڭ پىكىرىنشە, ۆەناعا نەمەسە بەرلينگە قاراعاندا تۇنگى جارىق 100-200 ەسە كوپ. كەيىنگى ورىندارعا لاس-ۆەگاس, توكيو, سەۋل جانە نيۋ-يورك قالالارى كىرەدى. الايدا جارىقتىڭ لاستانۋىن زەرتتەۋ ءالى دە العاشقى ساتىسىندا بولعاندىقتان, جارىقتىڭ لاستانۋ دارەجەسىن انىقتاۋ ءۇشىن حالىقارالىق ستاندارتسىز گونكونگتىڭ ەڭ لاستانعان قالا ەكەنىن كەسىپ ايتۋ قيىن.
حالىقارالىق قاراڭعى اسپان قاۋىمداستىعى جارىقتىڭ لاستانۋىن جاساندى جارىقتى دۇرىس ەمەس نەمەسە شامادان تىس پايدالانعاننان بولىپ وتىر دەيدى.
