دارىگەرلەر العاشقى مەديتسينالىق-سانيتارلىق كومەك كورسەتۋ ءۇشىن تۇرعىندارعا بىلىكتى كومەك كورسەتۋگە ارنالعان دالالىق مەديتسينالىق پۋنكت - پنەۆموكاركاستى ءمودۋلىن ورناتتى. قابىلداۋدى اپاتتار مەديتسيناسىنىڭ بىلىكتى دارىگەرلەرى جۇرگىزىپ جاتىر.
گازيانتەپ قالاسىنىڭ تۇرعىندارىن تاۋلىك بويى مەديتسينالىق قابىلداۋ بارىسىندا اپاتتار مەديتسيناسى ورتالىعىنىڭ دارىگەرلەرى - جيىرماعا جۋىق ناۋقاسقا, ولاردىڭ ىشىندە ەكى بالاعا كونسۋلتاتسيالىق جانە بىلىكتى مەديتسينالىق كومەك كورسەتتى. ادامدار وسى پۋنكتكە كوبىنەسە جىلىنۋعا, تۋىستارى مەن جاقىندارىن قۇتقارۋشىلار تاۋىپ العانشا كۇتۋگە كەلەدى, ويتكەنى كوپشىلىگى باسپاناسىز قالدى.
تجم پنەۆموكاركاس مودۋلدەرىن وتكەن جىلى ساتىپ العانىن اتاپ وتكەن ءجون. بۇل دالالىق مەديتسينالىق گوسپيتال ءىرى ءزىلزالالار مەن اپاتتار تۋىنداعان كەزدە ورنالاستىرۋعا ارنالعان. مۇنداي ءموبيلدى اۋرۋحانا تولىق ورنالاستىرىلعان كەزدە كۇنىنە 200-گە جۋىق زارداپ شەككەن ادامدى قابىلداي الادى.
ءوز ءومىرىن قاۋىپ-قاتەرگە تىگىپ تۇركياداعى ءزىلزالا ورنىندا اۋىر جاعدايدا قىزمەت اتقارىپ جاتقان قۇتقارۋشىلاردىڭ دا دەنساۋلىعىن ساقتاۋ تجم مەديتسينا قىزمەتكەرلەرىنىڭ باستى مىندەتتەرىنىڭ ءبىرى. دارىگەرلەردىڭ ايتۋىنشا, بۇگىنگى كۇنى تۇركياداعى تجم جەكە قۇرامىنىڭ دەنساۋلىعى جاقسى, ولار پسيحولوگيالىق تۇرعىدان ساۋ.
