ەڭبەك جولىن قازىرگى «Egemen Qazaqstan» گازەتىنەن باستاعان ەرجۇمان سمايىل جۋرناليستىك مانسابىندا بىرنەشە باسشىلىق قىزمەت اتقارعان. ول «جاس الاش» گازەتىندە باس رەداكتور بولىپ, بىرنەشە شاكىرت تاربيەلەدى.
سالتاناتتى ءىس-شاراعا ونىمەن بىرگە قىزمەت ەتكەن ارىپتەستەرى, ۇستازدارى مەن ۋنيۆەرسيتەتتىڭ رەكتورى جانسەيىت تۇيمەباەۆ قاتىستى. رەكتوردىڭ ايتۋىنشا, جاڭا اۋديتورياعا ەرجۇمان سمايىلوۆتىڭ ەسىمىن بەرۋ – جۋرناليستيكا ارداگەرىنە كورسەتىلگەن ەرەكشە قۇرمەت.
اۋديتوريانىڭ اشىلۋ راسىمىندە اقپارات جانە قوعامدىق دامۋ ءمينيسترى دارحان قىدىرالىنىڭ حاتىن مينيسترلىك وكىلى نۇربەك اميشا وقىپ بەردى.
ەرجۇمان سمايىل تۋرالى بەلگىلى اقىن, دراماتۋرگ, مەملەكەت جانە قوعام قايراتكەرى نۇرلان ورازالين, جۋرناليست, جازۋشى, قر ەڭبەك سىڭىرگەن قايراتكەرى ءۋاليحان قاليجان جىلى ەستەلىكپەن ءبولىستى.
سونداي-اق «Egemen Qazaqstan» گازەتىنىڭ جاۋاپتى حاتشىسى سامات مۇسا جۋىردا قايتا قۇرىلعان «قازاق گازەتتەرى» جشس باس ديرەكتورى ديحان قامزابەك ۇلىنىڭ قۇتتىقتاۋ حاتىن وقىدى.
«ەرجۇمانعا قۇرمەت كورسەتۋ – كەمەڭگەر تۇلعانى مويىنداۋ. اتقارعان جۇمىسى ءوز الدىنا, مىنەزى قانداي ەدى! ۋنيۆەرسيتەتتە اۋديتوريانىڭ اشىلۋى وتە ورىندى دەپ ەسەپتەيمىن. بولاشاق جۋرناليستەر وسى كابينەتكە كەلىپ, ەرجۇماننىڭ ومىرىمەن تانىساتىن بولسا, ول – ۇلكەن ولجا», دەدى ارداگەر جۋرناليست ماماديار جاقىپ ءوز سوزىندە.
