تانىمال ساۋلەتشى قوناەۆ قالاسىن دامىتۋعا اتسالىسادى

بۇگىن الماتى وبلىسىنىڭ اكىمى مارات سۇلتانعازيەۆ «Urban Living» جشس ماماندارىمەن كەزدەستى. باسقوسۋدا تانىمال ساۋلەتشىلەر قالانى دامىتۋعا باعىتتالعان جوسپارلارىمەن ءبولىسىپ، كوزقاراستارىن ايتقان.

«Urban Living» جشس-ءنىڭ باس ارحيتەكتورى – ماركو برۋنەللي. ال كومپانيانىڭ سەرىكتەسى – ريكاردو ماريني.

ء«بىزدىڭ سەرىكتەستىك ۋربانيستىك جانە قالا قۇرىلىسى جوبالارىن ازىرلەۋگە ماماندانعان كونسالتينگتىك كومپانيا. باستى باعىتى – «پلەيسمەيكينگ». ءبىز ادامداردىڭ قولايلى ءومىر سۇرۋىنە جاعداي جاسالعان، كورنەكى نىسانداردىڭ سىزباسىن جاساۋ ارقىلى قالا قۇرىلىسىنا ارالاسىپ، ءتۋريزمدى دامىتۋعا اتسالىسامىز»، دەدى ساۋلەتشى ريكاردو ماريني.

ونىڭ ايتۋىنشا، قاپشاعاي سۋ قويماسىنىڭ جاعاجايىندا ءىرى نىساندار تۇرعىزۋ ءۇشىن الدىمەن ءتوپوتۇسىرىلىم جاساۋ قاجەت.

«كولدىڭ جاعاجايىنداعى ايماقتارعا جاقسى تاستار توسەۋگە قارجى قۇيۋعا بولادى. بىراق، بۇل جۇمىستىڭ ەش ناتيجەسى بولمايتىنىن تۇسىنگەنىمىز ءجون. ەڭ الدىمەن، جاعاجاي مەن عيماراتتار ارالىعىنداعى نىسانداردىڭ ەلگە پايدا اكەلەتىن تۇستارىن ويلاستىرۋ قاجەت. كولدىڭ جاعاسى ادامدار ءۇشىن قاۋىپسىز ايماق بولۋى ءتيىس. سونىمەن قاتار مۇندا جاياۋ جۇرگىنشىلەرگە باسىمدىق بەرىلگەنىمەن، شۇعىل كومەك كورسەتۋشى اۆتوموبيلدەردىڭ قوزعالىسى دا نازاردان تىس قالماۋى كەرەك. ءبىز قالانىڭ قازىرگى جاي-كۇيىمەن تانىسار كەزدە ءتوپوتۇسىرىلىمنىڭ جوقتىعى جۇمىسقا كەدەرگى كەلتىردى. جوعارىدا ايتىلعان جوبالاردى جۇزەگە اسىرۋ ءۇشىن ءتوپوتۇسىرىلىم جاسالۋى كەرەك»، دەدى ساۋلەتشى.

ءوڭىر باسشىسى بۇل ءتۇسىرىلىمنىڭ مىندەتتى تۇردە جاسالاتىنىن، كەيىن ەكىجاقتى كەلىسسوزدەر تاعى دا جۇرگىزىلەتىنىن ايتتى.

«باكۋدە ەشتەڭەسى جوق جاعاجاي از ۋاقىتتىڭ ىشىندە ادەمى دەمالىس ورنىنا اينالدى. ول جەردە دە قاتەلەسپەسەم، سىزدەر العا تارتىپ وتىرعان پرينتسيپتەر بويىنشا جۇمىستار جۇرگىزىلدى. ارحيتەكتورلاردىڭ ۇسىنعان جوباسى قوناەۆتىڭ كەڭەستىك داۋىردەن شىعىپ، زاماناۋي قالاعا بەت بۇرۋىنا سەپتىگىن تيگىزەتىنىنە سەنىمدىمىز. قاپشاعايدىڭ جاعاجايىن زەرتتەپ، جوبا جاساۋعا كۇش سالعاندارىڭىز ءۇشىن العىسىمدى بىلدىرەمىن. توپوتۇسىرىلىمنەن كەيىن وزدەرىڭىزبەن قويان-قولتىق جۇمىس ىستەۋگە ءازىرمىز»، دەدى مارات سۇلتانعازيەۆ.

بۇعان دەيىن «Urban Living» جشس تۇركىستان قالاسىنىڭ جوباسىن جاساعان. سودان كەيىن جوبا ينۆەستورلاردى تارتۋ ءۇشىن پايدالانىلىپ، شاھاردا «كەرۋەن ساراي» بوي كوتەردى.

ايتا كەتەيىك، ريكاردو ماريني – انگليانىڭ قالا قۇرىلىسى بويىنشا كورولدىك ينستيتۋتىنىڭ جانە شوتلاندياداعى كورولدىك ارحيتەكتورلار ۇيىمىنىڭ مۇشەسى، ارحيتەكتۋرا مەن قالا قۇرىلىسىنىڭ حالىقارالىق ساراپشىسى. ول ماسكەۋ، بۋەنوس-ايرەس، نيۋ-يورك سەكىلدى ءىرى قالالارداعى بىرنەشە جوبانىڭ اۆتورى.

ال ماركو برۋنەللي – ارحيتەكتۋرا عىلىمىنىڭ دوكتورى، يتاليانىڭ ەكولوگيالىق قۇرىلىس كەڭەسىنىڭ مۇشەسى. ول دي ترەنتو پروۆينتسياسى ۋنيۆەرسيتەتىنىڭ ستۋدەنتتىك جاتاقحانالارى سياقتى قوعامدىق عيماراتتاردى جوبالاۋمەن اينالىسقان.