مەكتەپ • 07 اقپان، 2023

جاڭا اۆتوبۋستارمەن تولىقتى

اقتوبە وبلىسىنىڭ مەكتەپتەرى قاراعاندى وبلىسىنداعى كاسىپورىندا قۇراستىرىلعان Yutong جانە Golden Dragon ماركالى جايلى ساناتتاعى 23 جاڭا اۆتوبۋسپەن تولىقتى.

بايان قۋاندىققىزى

ليزينگپەن الىنعان ادەمى ديزاينداعى اۆتوبۋستاردىڭ 13-ءى اقتوبە قالاسىنداعى مەكتەپتەرگە، 10-ى ىرعىز، شالقار، مارتوك اۋداندارىنداعى ءبىلىم وشاقتارىنا بەرىلدى. سونداي-اق ناۋرىز ايىندا اقتوبەگە تاعى دا سۋ جاڭا 9 اۆتوبۋس كەلەدى دەپ جوسپارلانىپ وتىر. 4،5 مىڭنان استام مەكتەپ وقۋشىسىن قاۋىپسىز تاسىمالداۋ ءۇشىن بارلىق قاجەتتى قۇرالمەن جابدىقتالعان كولىكتەردىڭ ءىشى كەڭ، كەيبىرى 40 ورىندىق، كەيبىرى 20 ورىندىق اۆتوبۋستار.

وبلىس مەكتەپتەرىنىڭ اۆتوپاركتەرىن جاڭارتۋ بىرنەشە جىلدان بەرى كوتەرىلىپ جۇرگەن ماسەلە ەدى. اسىرەسە قالا سىرتىندا تۇراتىن مەكتەپ وقۋشىلارىن تاسىمالداۋ، اۋىل بالالارىن وبلىس ورتالىعىندا وتەتىن جارىستارعا اپارىپ-اكەلۋگە كەلگەندە ءتۇرلى قيىندىق بولدى. بۇگىندە ءوز كولىكتەرى جوق مەكتەپتەر اۆتوبۋستاردى جالعا الىپ وتىر.

570 وقۋشىسى بار مارتوك اۋدانى ورتالىعىنداعى گيمنازياعا جاقىن ەلدى مەكەندەردەن بالالار كەلىپ وقيدى. الىستا تۇراتىن بالالاردى ساباققا جەتكىزىپ جۇرگەن اۆتوبۋس وتە ەسكى، جۇرۋىنەن تۇرۋى كوپ بولعاندىقتان، اسىرەسە قىس مەزگىلىندە بالالاردىڭ ساباققا كەشىكپەي كەلۋى مەكتەپ باسشىلىعىنىڭ باس اۋرۋىنا اينالعان.

جاڭا ۇلگىدەگى 40 ورىندىق تاعى ءبىر جايلى كولىك ىرعىز گيمنازياسىنا بەرىلدى. وسى گيمنازيانىڭ 500-دەن استام وقۋشىسى بار، جانىندا ينتەرناتى ورنالاسقان. ەندىگى جەردە گيمنازيا ينتەرناتىندا جاتىپ وقيتىن الىس اۋىلداردىڭ بالالارىن كانيكۋل باستالعاندا ۇيلەرىنە تەگىن جەتكىزىپ سالىپ، ساباق باستالاردا الىپ كەتەتىن بولادى. ايتا كەتۋ كەرەك، اقتوبە وبلىسىندا بىلتىر قىركۇيەك ايىندا ون مەكتەپ اۆتوبۋسى پايدالانۋعا بەرىلدى. الايدا وبلىستاعى 408 مەكتەپتىڭ ءبارىن اۆتوبۋسپەن قامتاماسىز ەتۋ ازىرگە مۇمكىن بولماي وتىر.

اقتوبە وبلىسى