زاڭ جوباسىنىڭ ماقساتى - قازاقستان رەسپۋبليكاسىنىڭ مەكتەپكە دەيىنگى, ورتا, تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋ, قوسىمشا ءبىلىم بەرۋ جانە بالالاردىڭ قۇقىقتارىن قورعاۋ سالاسىنداعى زاڭناماسىن جەتىلدىرۋ, سونداي-اق قۇقىقتىق ولقىلىقتاردى, قايشىلىقتاردى جويۋ.
قۇجات مەكتەپكە دەيىنگى, ورتا, تەحنيكالىق جانە كاسىپتىك, ورتا بىلىمنەن كەيىنگى, قوسىمشا ءبىلىم بەرۋ جانە بالالاردىڭ قۇقىقتارىن قورعاۋ سالاسىنداعى قوعامدىق قاتىناستاردى رەتتەيدى.
اتاپ ايتقاندا, مۇعالىمدەر مەن مەكتەپ ديرەكتورلارىنىڭ ەڭبەگىنە اقى تولەۋ جۇيەسىن ۇكىمەت ەمەس, مينيسترلىك ايقىندايدى.
پەداگوگپەن ەڭبەك شارتىن جاساسۋدىڭ ناقتى مەرزىمى (كەمىندە 1 جىل) ونى ۇزارتۋ ەسەلەرىنىڭ سانىن شەكتەمەي بەلگىلەنەدى. ەڭبەك شارتىنىڭ مەرزىمى وتكەن كەزدە تاراپتار ونى بەلگىلەنبەگەن نەمەسە بەلگىلەنگەن مەرزىمگە كەمىندە ءبىر جىلعا ۇزارتۋعا قۇقىلى.
سونىمەن قاتار ارناۋلى الەۋمەتتىك قىزمەتتەر كورسەتۋ ءۇشىن باۋىرلارى مەن اپا-سىڭلىلەرىن, ونىڭ ىشىندە تۋعان جانە اسىراپ العان كامەلەتكە تولماعان بالالاردى قوسپاعاندا, ءتورت بالادان اسپايتىن بالا تاربيەلەۋگە قابىلداعان وتباسىنا «پاتروناتتىق كاسىپتىك وتباسى» ساناتى ەنگىزىلەدى.
«نەكە (ەرلى-زايىپتىلىق) جانە وتباسى تۋرالى» كودەكستىڭ جەكەلەگەن جاڭا بابىندا اتاسىنىڭ, اجەسىنىڭ, باۋىرلارىنىڭ, اپكەلەرىنىڭ جانە باسقا دا تۋىستارىنىڭ بالاسىمەن قارىم-قاتىناس جاساۋ قۇقىعى رەگلامەنتتەلەدى.
سونداي-اق بالادان بولەك تۇراتىن اتا-انانىڭ اتا-انا قۇقىقتارىن جۇزەگە اسىرۋ ماسەلەلەرى بالالاردىڭ قۇقىقتارىن قورعاۋ سالاسىنداعى ۋاكىلەتتى ورگان ايقىنداعان تارتىپپەن شەشىلەدى.
بالالاردى اسىراپ الۋشى كاسىبي وتباسىنا بەرۋ تۋرالى شارتتا بالانى ورنالاستىرۋ مەرزىمى (شۇعىل, قىسقا مەرزىمدى, ۇزاق مەرزىمدى) ايقىندالاتىن بولادى.
ۆەدومستۆودا اتاپ وتىلگەندەي, زاڭ جوباسىن قابىلداۋ سالالىق زاڭنىڭ مەملەكەتتىڭ وزەكتى مۇددەلەرىنە, قوعامنىڭ سۇرانىستارىنا جانە ءبىلىم بەرۋ مەن بالا قۇقىقتارىن قورعاۋ سالاسىن دامىتۋدىڭ زاماناۋي ۇردىستەرىنە سايكەستىگىن قامتاماسىز ەتەدى.
قۇجات 24 اقپانعا دەيىن اشىق تالقىلاۋ ءۇشىن اشىق نقا سايتىندا ورنالاستىرىلعان.
