3 پانەلدىك سەسسيا وتىرىسىندا قر پرەمەر-ءمينيسترىنىڭ ورىنباسارى التاي كولگىنوۆ, قر پرەزيدەنتىنىڭ اكىمشىلىگى باسشىسىنىڭ ورىنباسارى – پرەزيدەنتتىڭ ءباسپاسوز حاتشىسى رۋسلان جەلدىباي, قر اقپارات جانە قوعامدىق دامۋ ءمينيسترى دارحان قىدىرالى, قازاقستان رەسپۋبليكاسىنىڭ پرەزيدەنتى جانىنداعى «ورتالىق كوممۋنيكاتسيالار قىزمەتى» رەسپۋبليكالىق مەملەكەتتىك مەكەمەسىنىڭ ديرەكتورى اسقار وماروۆ ءسوز سويلەيدى دەپ جوسپارلانعان.
«جاھاندىق اقپارات اعىمىندا مەرزىمدى ءباسپاسوز باسىلىمدارىنىڭ الار ورنى ەرەكشە. ءباسپاسوز باسىلىمدار تاريحىمىز بەن مادەنيەتىمىزدى, رۋحاني ۇلتتىق قۇندىلىقتارىمىزدى ۇرپاقتان ۇرپاققا جەتكىزەتىن نەگىزگى اقپارات قۇرالى ەكەنى ءسوزسىز. الاش ارىسى, ۇلت ۇستازى احمەت بايتۇرسىن ۇلىنىڭ «گازەت – حالىقتىڭ كوزى, قۇلاعى ءھام ءتىلى» دەگەن دانالىق ءسوزى ءالى كۇنگە دەيىن وزەكتىلىگىن جوعالتقان جوق. وعان دالەل رەتىندە ءباسپاسوز باسىلىمدارىنىڭ جىل ساناپ كوبەيىپ كەلە جاتقانىن ايتۋىمىزعا بولادى. ەگەر 2016 جىلى قازاقستاندا 2 مىڭعا جۋىق باق تىركەلگەن بولسا, بۇگىندە ولاردىڭ سانى 5 مىڭنان اسقان. ونىڭ 70%-عا جۋىعى باسپا باسىلىمدار ەكەنى بەلگىلى. بۇل - مەديا سالاسىنىڭ قارقىندى دامۋ الەۋەتىنىڭ ۇلعايعانى مەن بولاشاعىنىڭ زور ەكەندىگىنە تاعى ءبىر دالەل. وتاندىق مەديانىڭ الەۋەتىن بۇدان دا ارتتىرۋ ءۇشىن الدىمىزدا اۋقىمدى مىندەتتەر بار», دەدى مىنبەرگە ءبىرىنشى بولىپ شىققان التاي كولگىنوۆ.
سونىمەن قاتار ول اقپارات جانە قوعامدىق دامۋ مينيسترلىگىنىڭ الدىندا تۇرعان مىندەتتەردىڭ ارقايسىسى قوعامدا ادىلەتتى قازاقستان قۇندىلىقتارىن ىلگەرىلەتۋ ءۇشىن زور ماڭىزعا يە ەكەنىن تىلگە تيەك ەتتى.
«مەملەكەت باسشىسى سايلاۋالدى باعدارلاماسىندا ەلىمىزدەگى اقپاراتتىق ساياساتتى, جاستار ساياساتىن, ازاماتتىق قوعام مەن بايلانىس تەتىكتەرىن جەتىلدىرۋ بويىنشا ناقتى تاپسىرمالار بەرىپ, مىندەتتەر قويدى. وسى تۇرعىدا وڭىرلىك باسپا بۇقارالىق اقپارات قۇرالدارىنىڭ ماسەلەلەرىن, اتاپ ايتقاندا وقىرمانداردىڭ سانى مەن باسىلىم تارالىمىن قايتا كوبەيتۋ, قارجىلاندىرۋ جانە تەحنيكالىق جاڭارتۋ, ۋاقتىلى جەتكىزۋ مەن جەرگىلىكتى باق-تىڭ احۋالىن جاقسارتۋ باعىتىندا مينيسترلىك جانە جەرگىلىكتى اتقارۋشى ورگاندارمەن بىرگە ءتيىمدى ءارى ناقتى شەشۋ جولدارىن پىسىقتاۋ قاجەت دەپ ەسەپتەيمىز. بۇگىنگى جيىن ماقساتى دا - وسى», دەدى پرەمەر-ءمينيستردىڭ ورىنباسارى.
سونداي-اق ول بۇگىنگى جيىن كوكەيدە جۇرگەن كوپ سۇراقتىڭ جاۋابىن تابۋعا مۇمكىندىك بەرەتىن تاپتىرماس الاڭ ەكەنىن دە اتاپ ءوتتى. فورۋم سوڭىندا ءتۇرلى ماسەلە توڭىرەگىندە وڭ ناتيجەگە قول جەتكىزەمىز دەگەن سەنىمى بارىن ءبىلدىردى. بۇدان بولەك, ۇكىمەتتىڭ جەرگىلىكتى اتقارۋشى ورگاندارمەن بىرلەسە وتىرىپ وڭىرلىك باسىلىمداردىڭ دامۋى ءۇشىن قولايلى جاعداي جاسايتىنىن جەتكىزدى.
