ايماقتار • 24 قاڭتار، 2023

فرانتسيالىق ماماندار – جەتىسۋدا

جەتىسۋعا فرانتسيا ەلىندەگى كيۋري ينستيتۋتىنىڭ ماماندارى كەلدى. ولار ءسۇت بەزى وبىرىن ەرتە دياگنوستيكالاۋدى جانە مامموگرافيالىق سكرينينگتىڭ ناتيجەلىلىگىن ارتتىرۋ بويىنشا پىكىر الماستى. سول ماقسات اياسىندا اۋرۋحانالاردى ارالاپ، ونكولوگيالىق كومەك كورسەتۋ بارىسىمەن تانىستى.

مۇحتار كۇمىسبەك

كيۋري ينستيتۋتىنىڭ حالىقارالىق دامۋ ءبولىمىنىڭ باسشىسى ج.سۋستە، سكرينينگ جونىندەگى مامان ا.لەزۋر، مەديتسينالىق مەنەدجمەنت جونىندەگى كەڭەسشى ل.مونتەۆەككي جانە العاشقى كومەك جونىندەگى مامان ل.كيسلينگ ءسۇت بەزى قاتەرلى دەرتىنىڭ الدىن الۋ، سكرينينگ جۇرگىزۋ جۇمىستارىن باقىلاپ، مامموگراف، ۋلترا دىبىستىق زەرتتەۋ مەن ماممولوگ كابينەتتەرىنىڭ جۇمىستارىن كوردى. سونىمەن قاتار مامموگرافيالىق سكرينينگ كەزەڭدەرىن جۇرگىزۋدىڭ قۇرىلىمى مەن دياگنوستيكاعا جانە ەرتە ەمدەۋگە ارنالعان قولدانىستاعى اپپاراتتارمەن ەگجەي-تەگجەيلى تانىستى.

وبلىستىق كوپسالالى كلينيكانىڭ ديرەكتورى ماديار ومىرباەۆ جەتىسۋ ءوڭىرى ونكولوگيالىق كومەك كورسەتۋ، سونداي-اق سكرينينگتىك باعدارلامالاردى ۇيىمداستىرۋ بويىنشا رەسپۋبليكا بويىنشا كوشباسشى وبلىس ەكەنىن اتاپ ءوتتى.

فرانتسيادان كەلگەن ماماندار كوكسۋ ورتالىق اۋداندىق اۋرۋحاناسىنا بارىپ، ەمحانا شەڭبەرىندە اۋداندىق دەڭگەيدەگى سكرينينگتىك باعدارلامانىڭ ۇيىمداستىرىلۋىمەن جانە قاتەرلى ىسىكتەردىڭ الدىن الۋعا باعىتتالعان ايەل جانە ەرلەردى قاراۋ، دارىگەرگە دەيىنگى كابينەتتەر جۇمىسىمەن تەرەڭىرەك تانىستى.

اۋرۋحانادا فرانتسيادان كەلگەن دەلەگاتسيا وكىلدەرىنە ءسۇت بەزى قاتەرلى دەرتىنىڭ سكرينينگىنىڭ بارلىق كەزەڭى، سونىڭ ىشىندە تىركەۋ، تەكسەرۋ كابينەتتەرى، ماممولوگتەر كابينەتتەرى، مامموگرافيا كابينەتتەرى، ۋلترادىبىستىق كابينەتتەر كورسەتىلدى.

ء«بىز سكرينينگكە قاتىستى ءبىراز مالىمەت الدىق. ەكى مەملەكەتتىڭ العا قويىپ وتىرعان ماقساتى ءبىر – مامموگرافيادان وتكىزۋ جانە سكرينينگ ارقىلى اۋرۋدى ەرتە ساتىسىندا انىقتاۋ جانە كوپ ۋاقىت جوعالتپاي ەمدى باستاۋ. سوندىقتان بۇل باعىتتاعى جۇمىستاردى بىرگە جالعاستىرامىز»، دەدى كيۋري ينستيتۋتىنىڭ حالىقارالىق دامۋ ءبولىمىنىڭ باسشىسى ج.سۋستە.

جەتىسۋ وبلىسى دەنساۋلىق ساقتاۋ باسقارماسىنىڭ مالىمەتىنشە، وڭىردە ءسۇت بەزى قاتەرلى دەرتىنە شالدىققان 159 جاڭا جاعداي تىركەلىپ، جالپى 1 368 ايەل ەسەپتە تۇر.

ايتا كەتەيىك، 2018 جىلى وڭىردە ونكولوگيالىق اۋرۋلاردى ەرتە انىقتاۋعا مۇمكىندىك بەرەتىن جاساندى ينتەللەكتىمەن «PACS جۇيەسىن ەنگىزۋ» اۋقىمدى جوباسى ىسكە اسىرىلعان ەدى.

جەتىسۋ وبلىسى