ەل پرەزيدەنتى قاسىم-جومارت توقاەۆتىڭ تاپسىرماسىنا سايكەس, «تاۋەلسىزدىك ۇرپاقتارى» گرانتى نەگىزىندە رەسپۋبليكالىق دەڭگەيدە مادەنيەت, عىلىم, بيزنەس, مەديا, IT سالاسىنداعى جاستار باستامالارىن قولداۋ ماقساتىندا 2021 جىلدان باستاپ گرانتتار تاعايىندالعان بولاتىن. جاس بۋىننىڭ الەۋەتىن ارتتىرىپ, قاناتىن قاتايتۋعا ارنالعان ىستە الماتى وبلىسىندا 15 ۇزدىك جوبا قولداۋ تاپتى.
ءبىلىمى مەن بىلىگى ۇشتاسقان جالىندى قىز – جىگىتتەردى جارقىن جەڭىسىمەن ايماق باسشىسى مارات سۇلتانعازيەۆ قۇتتىقتادى.
«بۇگىنگى جاستاردىڭ بىلىمگە, يننوۆاتسيانى ۇيرەنۋگە, شەت تىلدەرىن مەڭگەرۋگە دەگەن تالپىنىستارى, ەڭبەكقورلىعى ءبىزدى قۋانتادى. جەڭىمپاز اتانعان جوبالار وڭىرىمىزدەگى وزەكتى ماسەلەلەردى شەشۋگە, مەملەكەتتىك جاستار ساياساتىن جەمىستى جۇزەگە اسىرۋعا سەرپىن بەرەتىن جاسامپاز ىستەردىڭ باستاۋى بولسىن. بۇل باعىتتاعى جۇمىس الداعى ۋاقىتتا دا جالعاسىن تابادى. جالپى مەملەكەتتىك جاستار ساياساتىن جۇزەگە اسىرۋ ءبىزدىڭ باستى مىندەتتەرىمىزدىڭ ءبىرى», دەدى وبلىس اكىمى مارات ەلەۋسىز ۇلى.
قوعامنىڭ ءار سالاسىندا بيزنەس-يدەيالارى مەن وزىندىك جوسپارلارىن جۇزەگە اسىرۋدى كوزدەگەن جاستار قاراسى قالىڭ بولعانىمەن, العاش رەت وتكىزىلگەن اتالعان گرانت جوباسىنا بارلىعى 35 ۇمىتكەر قاتىسقان. سولاردىڭ ىشىندە تەك 15-ءى جەڭىمپاز اتانىپ, 1 ملن تەڭگەنىڭ سەرتيفيكاتىنا يە بولدى.
بۇلاردىڭ قاتارىندا «مەديا» باعىتىندا جەڭىمپاز اتانعان جاس ۆيدەوگراف, ساكەن قۇتتىقباي دا بار. ول ءوز كەزەگىندە ۇيىمداستىرۋشىلارعا العىسىن ءبىلدىرىپ, مۇنداي جوبالار ەل جاستارىنا ۇلكەن ۇمىتپەن بىرگە بولاشاققا دەگەن سەنىم سىيلايتىنىن العا تارتتى.
«بۇگىنگى كۇن مەن ءۇشىن وتە ماڭىزدى. سەبەبى مەنىڭ جوبالارىما قارجىلاي قولداۋ تابىلدى. مەنىڭ «مەديا» سالاسى بويىنشا ۇسىنعان جوبام «Generation» دەپ اتالادى. قازاقشا ايتاتىن بولساق «ۇرپاق» دەگەن ماعانا بەرەدى. جوبا اياسىندا جاستارعا ارنالعان 3 قىسقامەتراجدى فيلم تۇسىرىلەدى. ءبىرىنشى, «ۋاقىت» دەپ اتالادى. اتالعان فيلم جاستاردىڭ ۋاقىتتى ءتيىمدى قولدانۋدى, باعالاۋ كەرەكتىگىن تۇسىندىرەدى. ەكىنشى تۋىندىعا «ناشاقور» دەگەن ات ارقاۋ بولدى. بۇل جەردە جامان ورتاعا ءتۇسۋ, ىشىمدىككە سالىنۋ كەيىن ناشاقور بولۋعا اكەلۋى مۇمكىن ەكەنى باياندالادى. ال سوڭعىسى «قۇمار ويىن» دەپ اتالادى. ويتكەنى قازىرگى تاڭدا قۇمار ويىندارعا سالىنىپ كەتۋ وتە وڭاي. ءتىپتى ۇيدەن شىقپاي-اق بۇكىل م ۇلىكتەن ايىرىلىپ قالۋعا بولادى. بۇل جوبانىڭ ماقساتى جاستار دۇرىس جولدا ءجۇرىپ, ۋاقىتتى جانە جاقىندارىن باعالاۋى ەڭ باستى قۇندىلىق ەكەنىن قالىڭ كوپكە ءتۇسىندىرۋ», دەدى ساكەن مۇحتار ۇلى.
اسىعى الشىسىنان تۇسكەندەر قاتارىندا «مادەنيەت» سالاسىندا گرانتتى جەڭىپ شىققان جانىبەك ماقاتاندى اتاپ وتۋگە بولادى. ول ون ساۋساعىنان ونەر تامعان شەبەر. كونە مۋزىكالىق سىبىزعى مەن سازسىرناي سىندى ۇلتتىق اسپاپتار جاسايدى. ونەردەن تابىس تابۋدىڭ ەبىن تاپقان جىگىت قۇرمانعازى اتىنداعى قازاق ۇلتتىق كونسەرۆاتورياسىنىڭ 2 كۋرس بىلىمگەرى. تۋما تالانتىمەن تالايدى تامساندىرعان جاس, ءوز قولىنان شىققان قوس بىردەي مۋزىكا اسپابىن الماتى وبلىسىنىڭ اكىمى مارات سۇلتانعازيەۆكە ارنايى تابىستادى.
ال, بەرىك ماديار ۇلى, ولجاس مۋباراك, اقبوتا جەتپىسباي, ازيزا رادجاپوۆا, لاۋرا ابىلكاسيموۆا, ەرنۇر, قادىر, دىنمۇحامەد دۇيسەنعالي, بەكبولات بەكسەيتوۆ, مادي بەردىباەۆتار «بيزنەس» باعىتىندا ارنايى گرانتقا قول جەتكىزدى. «عىلىم» بويىنشا ايگۇل جالعاس, بەكزات سەيتمۋحانبەتوۆا مەن مەيرامبەك جالعاستار ۇزدىك شىقتى.
ايتا كەتۋ كەرەك, وبلىس حالقىنىڭ 19 پايىزىن جاستار قۇرايدى. ولاردىڭ جالپى سانى - 280 مىڭ. بۇگىنگى كۇنى ولارعا قولداۋ كورسەتۋدىڭ ءتۇرلى باعىتتاعى شارالارى قاراستىرىلعان.
ماسەلەن, 2022 جىلى وبلىس تاريحىندا تۇڭعىش رەت جەرگىلىكتى جاستاردى باسپانامەن قامتاماسىز ەتۋگە قولداۋ كورسەتۋ ءۇشىن «الاتاۋ جاستارى» اتتى تۇرعىن-ءۇي باعدارلاماسى باستاۋ الدى. باستاپقى جارناسىز 60 پاتەر الۋ ءۇشىن 600 ملن تەڭگە ءبولىندى. بيىل وسى باعدارلاماعا بولىنەتىن قاراجات كولەمى 3,6 ملرد تەڭگەگە دەيىن كوبەيدى. بۇل قارجى 200 پاتەر الۋعا مۇمكىندىك بەرەدى.
وبلىس اكىمى اتاپ وتكەندەي, مۇنىڭ بارلىعى جاستارعا دەگەن ەرەكشە نازاردىڭ ايقىن كورسەتكىشى.
