«وتاندىق ادەبيەتتى جاڭا اعىممەن تولىقتىرۋ جانە ۇلتىمىزدىڭ ادەبي مۇراسىن كەڭىنەن ناسيحاتتاۋ, سونداي-اق قازاقستاندىق ادەبيەت پەن باسپالارعا تىڭ سەرپىن بەرۋ ماقساتىندا «ايبوز» ۇلتتىق ادەبي سىيلىعى ەنگىزىلدى. يگى ءداستۇردى ودان ءارى دامىتۋ ماقساتىندا بيىل جاڭا جوبالاردى جۇزەگە اسىرۋدى جوسپارلاپ وتىرمىز. اتاپ ايتقاندا, جاس قالامگەرلەردى قولداۋ ماقساتىندا ارنايى پرەزيدەنتتىك ادەبي سىيلىق تاعايىندالادى», دەدى اسحات ورالوۆ مادەنيەت مينيسترلىگىنىڭ القا وتىرىسىندا.
ونىڭ ايتۋىنشا, الداعى ۋاقىتتا مادەنيەت قىزمەتكەرلەرىنىڭ حالىقارالىق فورۋمى ۇيىمداستىرىلادى.
«سونىمەن قاتار ءبىز مادەنيەت قىزمەتكەرلەرىنىڭ حالىقارالىق فورۋمىن ۇيىمداستىرىپ جاتىرمىز. بۇل سالا ماماندارىنىڭ بىلىكتىلىگىن ارتتىرىپ, حالىقارالىق تاجىريبەنى مەڭگەرۋگە مۇمكىندىك بەرەدى. بۇل جۇمىستاردى جوعارى دەڭگەيدە جۇزەگە اسىرۋدا زيالى قاۋىمنىڭ بەلسەندى اتسالىسۋىنىڭ ماڭىزى زور. قوعام مەن جاستاردى تاربيەلەۋدە اعا ۇرپاقتىڭ الاتىن ورنى ەرەكشە», دەپ تۇيىندەدى مينيستر.
