بۇرىنعى مادەنيەت جانە سپورت ءمينيسترى 2022 جىلدىڭ ناۋرىز ايىنان بەرى قاماۋدا. سىبايلاس جەمقورلىققا قارسى قىزمەت وعان بيۋدجەت قاراجاتىن جىمقىردى دەگەن ايىپ تاعىپ وتىر.
«2023 جىلدىڭ 17 قاڭتارىندا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى مۇحامەدي ۇلى ارىستانبەككە قاتىستى قاماۋعا الۋ تۇرىندەگى سانكتسيالانعان بۇلتارتپاۋ شاراسىنىڭ مەرزىمىن ءبىر ايعا ۇزارتتى», دەپ حابارلادى ەلوردالىق سوتتىڭ ءباسپاسوز قىزمەتىنەن.
ەسكە سالا كەتەيىك, 2022 جىلدىڭ تامىزىندا سىبايلاس جەمقورلىققا قارسى قىزمەت مادەنيەت مينيسترلىگىنىڭ بۇرىنعى باسشىسى, ۇلتتىق مۋزەيدىڭ ديرەكتورى ارىستانبەك مۇحامەدي ۇلىنا جانە باسقا دا تۇلعالارعا اسا ءىرى كولەمدە بيۋدجەت قاراجاتىن جىمقىرۋ جانە قۇقىق بۇزۋشىلىق فاكتىلەرى بويىنشا تەرگەۋ باستالعانىن حابارلاعان ەدى.
تەرگەۋ «التىن ادامنىڭ الەم مۇراجايلارى ارقىلى ءوتۋى» حالىقارالىق كورمەسىن وتكىزۋگە, سونداي-اق «قازاقستاننىڭ ۇلتتىق كيەلى نىساندارىن ۇلتتىق فوتوگراممەتريالىق 3D سكانەرلەۋ جانە مۇراجاي» جانە «قازاقستان رەسپۋبليكاسىنىڭ ۇلتتىق تسيفرلىق فيلمدەر جيناعىن تسيفرلاندىرۋ» جوبالارىنا بولىنگەن بيۋدجەت قاراجاتىن جىمقىرۋ فاكتىلەرى بويىنشا جۇرگىزىلدى.
رەسمي دەرەكتەرگە قاراعاندا, تەرگەلىپ جاتقان قىلمىستىق ىستەر بويىنشا مەملەكەتكە كەلتىرىلگەن شىعىننىڭ الدىن الا مولشەرى جەتى ميلليارد تەڭگەگە جۋىقتاعان.
