قازاقستاندا جاڭا حالىقارالىق اۋە رەيستەرى اشىلادى

يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆتىڭ ايتۋىنشا، ازاماتتىق اۆياتسيا سالاسىندا جولاۋشىلار اعىنى قالپىنا كەلتىرىلىپ، تۇراقتى ءوسىم كورسەتىپ وتىر.

اپتاسىنا 479 رەيس جيىلىگىمەن 109 باعىت بويىنشا 29 ەلگە حالىقارالىق اۋە رەيستەرى جاڭارتىلىپ، اشىلدى. اتاپ ايتقاندا، تۇركيا، ءباا، وزبەكستان، گرۋزيا، تاجىكستان، تۇرىكمەنستان، رەسەي، قىرعىزستان، بەلارۋس، گەرمانيا، ەگيپەت، وڭتۇستىك كورەيا، نيدەرلاندى، پولشا، ارمەنيا، ۇلىبريتانيا، مالديۆ ارالدارى، تايلاند، ازەربايجان، كاتار، كۋۆەيت، ساۋد ارابياسى، موڭعوليا، ءۇندىستان، يران، گرەتسيا، يتاليا، قىتاي جانە سەيشەل ارالدارىنا رەيستەر ورىندالىپ جاتىر.

«چەرنوگورياعا، مالايزياعا، گرەتسياعا رەيستەردى قايتا جاڭعىرتۋ، قىتايمەن، ۇندىستانمەن، وزبەكستانمەن ۇلعايتۋ، يزرايلمەن، كاتارمەن، تۇركيامەن، پاكىستانمەن، ازەربايجانمەن، تاجىكستانمەن، ساۋد ارابياسىمەن اشۋ جوسپارلانىپ وتىر»، دەپ اتاپ ءوتتى الماز ىدىرىسوۆ.

ونىڭ ايتۋىنشا، اۋە كەمەلەرى پاركىن كەڭەيتۋ جۇمىستارى جالعاسىپ جاتىر.

2025 جىلعا دەيىن پارك 51 جاڭا ۇشاقپەن تولىقتىرىلادى دەپ كۇتىلەدى، بىلتىر 14 جاڭا اۋە كەمەسى ساتىپ الىنعان ەدى.

سونداي-اق اۋەجايلاردى جاڭعىرتۋ شەڭبەرىندە:

• 8 جوبانى ىسكە اسىرۋ، ونىڭ ىشىندە شىمكەنت، الماتى، قىزىلوردا قالالارىندا ءۇش جاڭا جولاۋشىلار تەرمينالىن سالۋ;
• قوستاناي، ءۇرجار، بالقاش قالالارىنىڭ اۋەجايلارىنداعى تەرمينالداردى قايتا جاڭارتۋ;
• استانا جانە پاۆلودار قالالارى اۋەجايلارىنىڭ ۇشۋ-قونۋ جولاقتارىن كۇردەلى جوندەۋدەن وتكىزۋ جوسپارلانىپ وتىر.