ەندى وسى «ماحاببات جىرشىسىنىڭ» ەكىنشى كىتابى جۋىردا الماتىداعى «مەرەكە» باسپاسىنان مەملەكەتتىك تاپسىرىسپەن باسىلىپ شىقتى.
كورنەكتى جازۋشىمەن جازىسقان حاتتاردا ادەبيەت, ءومىر, ءداۋىر, قوعام جايىندا قىزىقتى دا تۇماسى تەرەڭ, عيبراتى مول سىرلار شەرتىلەدى. سونداي-اق اتاقتى قالامگەردىڭ ءوز وقىرماندارى جايلى جازعاندارى دا حاتتاردى بايىتا تۇسەر دايەك بولىپ, وي سالار ورتاق ءورىمىن تاپقان.
وسىنداي التىن ارقاۋلى حاتتار لەگى توپتاستىرىلعان جيناقتىڭ بۇل ەكىنىشى كىتابىندا دا بۇرىنعىسىنان جەلى تارتقان باي مازمۇن شالقارلانىپ, ەلدىك ماسەلەلەر كۇلتەلەنىپ, تاۋەلسىزدىكتى تامىرلاندىراتىن تولعاقتى پايىمدار جوسالانا تۇسەدى.
كىتاپتاعى ء«ازىلحان حاليمادان سوڭ» حيكاياتىندا جازۋشىنىڭ 54 جىل وتاسقان اياۋلى جارىنان كەيىنگى ون جىلداي شىعارماشىلىق ءومىرى شىنشىلدىقپەن باياندالادى. ءازىز جۇرەكتىڭ ماحاببات ءلۇپىلى قارتايىپ, قايعى ويلاعان شاعىندا دا العى كۇندەرگە ىنتالاندىرعان ەرەسەن كۇشى ەش السىرەمەي, قايتا جالىنداي تۇسكەنىنە كۋا بولاسىز.
سونداي-اق مۇنداعى ء«ازىلحان – كۇندەلىكتەرىمدە» توپتاماسى دا مول رۋحاني تاعىلىمىمەن سۇيسىندىرەدى.
ەل ىشىندە «ماحاببات مارشالى» اتانعان قادىرمەندى قالامگەردەن بۇل ىقىلاستى ءسوزدىڭ وزىنە قالاي تاڭىلعانىن سۇراعان اۆتورعا ءاز-اعا: «ماحاببات, قىزىق مول جىلدار» رومانىم عوي, وسىلايشا مەنى سۇيىسپەنشىلىك سەزىمگە بالداي باتىرىپ, داۋرەندەتىپ جۇرگەن!» – دەپتى جانى ارايلانىپ, جاسقا ءتان جالىنعا شارپىلعانداي بوپ. وسى جۇرەك ءسوزىنىڭ دالەلدى ايعاقتارىمەن دە كىتاپتان مولىنان قاۋىشاسىز.
حالىقتىق قالامگەر ءا.نۇرشايىقوۆتىڭ 100 جىلدىق مەرەيتويىنا ورايلاستىرىلعان بۇل كىتاپتىڭ جالپاق وقىرماننىڭ تالعامىنان شىعارىنا, رۋحاني ءورىستى بولارىنا سەنىمدىمىز.
«ەگەمەن-اقپارات»
