ماقتاۋلى شاكىرتتەرگە مىڭ العىس

ادام بالاسى توتەننەن كەلگەن اجالدان, ونىڭ ىشىندە تابيعي, جول-كولىك, ءتۇرلى اپاتتاردان, جازاتايىم وقيعالاردان امان بولىپ, سالاماتتى ءومىر سالتىن ۇستانسا, ءوز دەنساۋلىعىن ماپەلەپ كۇتسە, باقىتتى عۇمىر كەشۋى بەك مۇمكىن. قوعامداعى ءاربىر ادامنىڭ ۇزاق ءومىر ءسۇرۋى حالىقتىڭ ورتاشا ءومىر جاسىنىڭ ۇزارۋىنا دا سەپتىگىن تيگىزىپ جاتادى. بۇل تۇرعىدا ءومىرى قىل ۇستىندە تۇرعان جانداردى اجالدان اراشالايتىن اقجەلەڭدى ابزال جاندار – دارىگەرلەردىڭ دە ۇلەسىن ەشكىم جوققا شىعارا المايدى. مىنە, الدا كەلە جاتقان مەديتسينا قىزمەتكەرلەرىنىڭ كۇنىنە وراي ەلگە قىزمەت جاساپ جۇرگەن سول دارىگەرلەردى اتاپ وتكىم كەلىپ وتىر. ماسەلەن, ەسىمدەرى قوعامعا ابدەن تانىمال, قولى جەڭىل وتاشىلار جاقسىلىق دوسقاليەۆتى, الماتىداعى ا.سىزگانوۆ اتىنداعى ۇلتتىق عىلىمي حيرۋرگيا ورتالىعىنىڭ ديرەكتورى جەتكەرگەن ارزىقۇلوۆتى, ونىڭ ورىنباسارى نۇرسۇلتان ىزماعامبەتوۆتى, تاعى باسقا بىرقاتار دارىگەرلەردى  ماقتان تۇتامىز. ويتكەنى ولار اقتوبە مەديتسينا ينستيتۋتىن بىتىرگەننەن كەيىن دە,  قاتارداعى دارىگەردەن شوقتىعى بيىك عالىم دەڭگەيىنە كوتەرىلگەن تۇستا دا ۇستازدارىنا العىس ايتىپ, ولاردىڭ باتاسىن الىپ الماتىعا اتتانىپ ەدى. ەندى وسى عالىمداردىڭ دا ءبىر توپ شاكىرتى بار. ولاردىڭ ىشىنەن شەبەر وتاشى ءارى مەديتسينا ۋنيۆەرسيتەتىنىڭ رەكتورى ەربول بەكمۇحامبەتوۆ تە كوپشىلىك سىيلايتىن ەل ازاماتى دەڭگەيىنە كوتەرىلدى. اقتوبە №1 قالالىق ەمحاناسى بۇرىن بولماعان وتالاردى جاساۋ ۇستىندە. باس دارىگەر مارات بيحانوۆ, حيرۋرگيا ءبولىمىنىڭ مەڭگەرۋشىسى, جوعارى دارەجەلى وتاشى  تيمۋر قۇرعانبەكوۆ باستاعان بىرقاتار ماماندار ماسكەۋ قالاسىندا جاڭا يننوۆاتسيالىق تەحنولوگيانى قولدانۋدى ۇيرەنىپ, لازەر ادىسىمەن ەمدەپ, ناۋقاستاردىڭ مىڭ العىسىن الۋدا. ايماق مەديتسيناسىنداعى جاڭالىقتار ءۇشىن جەرگىلىكتى دەنساۋلىق ساقتاۋ دەپارتامەنتىنىڭ باسشىسى قايرات سابىرعا جانە ونىڭ كومەكشىلەرىنە دە العىس ايتۋشىلار جەتەرلىك.  قالاداعى تەمىرجول اۋرۋحاناسىن وتىز جىلدان بەرى باسقارىپ كەلە جاتقان مەديتسينا عىلىمدارىنىڭ كانديداتى قىدىرسيىق ەرعاليەۆ تە حالىقتىڭ العىسىن ارقالاعان جان. وسى بەلگىلى دارىگەرلەردى تاربيەلەپ شىعارعان ارىپتەستەرىم, اكادەميك ناماز ىزىمبەرگەنوۆ پەن پروفەسسور بولات يحسان ۇلىنا ءوز اتىمنان العىس ايتامىن. سەبەبى ولار 1964 جىلى مەديتسينا ينستيتۋتىن بىتىرگەننەن باستاپ ءالى كۇنگە دەيىن دارىگەرلەرگە ءبىلىم بەرىپ, تاربيەلەپ ءجۇر. ايتۋلى مەرەكە قارساڭىندا ارىپتەستەرىمدى, باسقا دا دارىگەرلەردى جانە ينتەرندەردى شىن نيەتتەن قۇتتىقتاپ, زور تابىس تىلەيمىن. ەلىمىزدە بەرەكە-بىرلىك بولىپ, بەيبىت قوعامدا ەڭبەك ەتە بەرەيىك. اياش بايجارقىنوۆا, م.وسپانوۆ اتىنداعى مەديتسينا ۋنيۆەرسيتەتىنىڭ وقىتۋشىسى, مەديتسينا عىلىمدارىنىڭ كانديداتى. اقتوبە.