«استانا تاڭداۋى» تاعى دا ءوزىنىڭ تاڭداۋىن جاساعالى تۇر

ءداستۇرلى «استانا تاڭداۋى» بايقاۋى بيىل قاتارىنان ءۇشىنشى جىل ۇيىمداستىرىلىپ وتىر. جىل وتكەن سايىن ءورىسى كەڭەيىپ, بەدەلى بيىكتەپ كەلە جاتقان اتالعان بايقاۋ تانىمال شارالاردىڭ قاتارىنا قوسىلىپ ۇلگەردى. ەسكە سالا كەتەيىك, «استانا تاڭداۋى» العاش رەت ەلوردا اكىمى يمانعالي تاسماعامبەتوۆتىڭ باس­تاماسىمەن 2012 جىلى وتكى­زىلگەن بولاتىن. سودان بەرى باي­قاۋدا جۇزدەگەن ۇمىتكەر باقتارىن سىناپ كوردى. ولارعا مىڭداعان ادام داۋىس بەردى. ماسەلەن, 2013 جىلى «استانا تاڭداۋى» سايىسىنا تۇسكەن تالاپكەرلەردى 87 مىڭنان استام ادام قولداپ ءۇن قاتقان. بۇل – بايقاۋ تاريحىنداعى رەكوردتىق كورسەتكىش. ال بيىلعى وتكىزىلىپ جاتقان سىنعا تەك قازاقستاندىقتار عانا ەمەس, رەسەي جانە وزبەكستان سەكىلدى كورشى مەملەكەتتەردىڭ تۇرعىندارى دا قولداۋ بىلدىرۋدە. بۇل ارينە, اتالعان شارانىڭ تانىمال بولىپ وتىرعاندىعىن بىلدىرسە كەرەك. ەندى بيىلعى «استانا تاڭ­داۋى-2014» بايقاۋى جونىندە از-كەم ماعلۇمات بەرە كەتەيىك. «ءوز تاڭداۋىڭدى جاسا, ەڭ ءۇزدى­گىن انىقتا!» ۇرانىن تۋ ەتكەن ءداستۇرلى سىناقتا الەۋمەتتىك ما­ڭىزى زور ماماندىقتاردىڭ ۇزدىك­تەرى انىقتالادى. وندا پەداگوگتار, دارىگەرلەر, جول سالۋشىلار, ەنەرگەتيكتەر, قوعامدىق كولىك جۇرگىزۋشىلەرى, ۋچاسكەلىك ينسپەكتورلار مەن قۇرىلىسشىلار ءوزارا سايىسقا تۇسەدى. ۇستىمىزدەگى جىلدىڭ 7 ءساۋى­­رىنەن باستاپ 31 مامىرعا دەيىن­ باي­­قاۋعا قاتىسۋعا نيەت ءبىل­دىر­گەندەردەن ءوتىنىش قابىلدان­عان. سوڭعى مالىمەتكە قاراعاندا, جەتى اتالىم بويىنشا 250 ادامنان ءوتىنىش ءتۇسىپتى. مۇنىڭ ءوزى وتكەن جىلدارمەن سالىستىرعاندا, بيىل­­­عى سايىسقا قاتىسۋشىلاردىڭ ءال­دەقايدا كوپ ەكەنىن كورسەتەدى. بۇدان باسەكە وتە تارتىستى وتەتى­نىن اڭعارامىز. ءتۇرلى ماماندىقتار بويىنشا ۇزدىكتەرگە داۋىس بەرۋ 1 ماۋسىمنان­ بەرى قىزۋ جۇرگىزىلۋدە. ول 20 ماۋ­سىمعا دەيىن جالعاسادى. وسى جەردە ەسكەرتە كەتەر جايت, ءاربىر تۇرعىن استانا قالاسى اكىمدىگىنىڭ سايتىنا كىرىپ, ءبىر ەلەكتروندى مەكەنجايدان ءبىر عانا داۋىس بەرە الادى. قازىرگى تاڭدا داۋىستار سانىنا قاراي بىرنەشە ۇزدىكتەر بەلگىلى بولا باستاعان. ماسەلەن, كەيبىر پەداگوگتار 10 مىڭنان استام ادام داۋىس جيناپ ۇلگەرىپتى. ال داۋىس بەرۋدىڭ قورىتىندىسى 20 ماۋسىمدا جاريالانباق. نەگىزىنەن «استانا تاڭداۋى» قالالىق بايقاۋىنىڭ بەرەرى مول. بۇل شارانى ۇيىمداستىرۋداعى ماقسات جاستارعا كاسىپتىك باعىت-باعدار بەرۋ, الەۋمەتتىك ماڭى­زى زور ماماندىق يەلەرىنىڭ قوعامى­مىزداعى ورنىن باعالاۋ بولىپ تابىلادى. تاعى ءبىر نازار اۋدارارلىق جايت, «استانا تاڭداۋى-2014» بايقاۋىنىڭ جەڭىمپازدارىنا ارنايى كۋبوكتار جانە ماقتاۋ قاعازدار تاپسىرىلادى. سونداي-اق, ءوز ءىسىنىڭ بىلگىرلەرىن ناسيحات­تاۋ ماقساتىندا ۇزدىكتەر تۋرالى دەرەكتى فيلمدەر ءتۇسىرىلىپ, بيل­بوردتارعا ولاردىڭ سۋرەت­تەرى ىلىنبەك. بۇدان بولەك, جەڭىم­پاز­دار­دى بايقاۋدى ۇيىمداس­تى­رۋشىلار تاراپىنان باسقا دا تاماشا سىيلىقتار كۇتىپ تۇر. ونىڭ قانداي سىي ەكەنى ازىرگە قۇپيا ۇستالىپ وتىر. جولدىباي بازار, «ەگەمەن قازاقستان».