ءوز سوزىندە پالاتا توراعاسى سەنبى كۇنى ەلىمىزدىڭ وڭىرلەرىندە وتكەن سەنات دەپۋتاتتارى سايلاۋىنىڭ ناتيجەسىنە توقتالدى. سوعان بايلانىستى ماۋلەن اشىمباەۆ سەناتتىڭ قاراۋعا جاتاتىن ماسەلەلەردى ناقتىلاپ, ءتيىستى دايىندىق جۇمىستارىن جۇرگىزۋدى تاپسىردى. اتاپ ايتقاندا, سايلانعان سەناتورلار ورتالىق سايلاۋ كوميسسياسىندا تىركەلگەننەن كەيىن سەنات رەگلامەنتىنە سايكەس پالاتانىڭ تۇراقتى كوميتەتتەرىنىڭ توراعالارى مەن مۇشەلەرىن سايلاۋعا قاتىستى ماسەلە قارالادى.
سونىمەن قاتار الداعى سەنات وتىرىسىندا دەپۋتاتتار ءماجىلىس قابىلداعان بىرقاتار زاڭدى قارايدى.
پالاتا وتىرىسىندا قارالاتىن «قازاقستان رەسپۋبليكاسىنداعى تسيفرلىق اكتيۆتەر تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تسيفرلىق اكتيۆتەر, اقپاراتتاندىرۋ جانە سوتتىق اكىمشىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدار ەلىمىزدە تسيفرلىق اكتيۆتەردى شىعارۋ جانە ولاردىڭ اينالىمى, تسيفرلىق ماينينگ جونىندەگى قىزمەتتى دامىتۋ ءۇشىن قۇقىقتىق بازا قۇرۋعا باعىتتالعان. زاڭدار تسيفرلىق اكتيۆتەردىڭ زاڭدى نارىعىن قالىپتاستىرۋعا, وسى سالاعا شەتەلدىك ينۆەستيتسيالاردى تارتۋعا جانە جالپى قازاقستان ەكونوميكاسىن دامىتۋعا ىقپال ەتەدى.
«قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ كودەكس نورمالارىن «پروكۋراتۋرا تۋرالى» كونستيتۋتسيالىق زاڭعا, «قازاقستان رەسپۋبليكاسىنداعى تسيفرلىق اكتيۆتەر تۋرالى» زاڭعا جانە وعان ىلەسپە زاڭدارعا سايكەس كەلتىرۋدى كوزدەيدى. سونداي-اق قۇجاتتىڭ نەگىزگى مىندەتتەرىنىڭ قاتارىندا ەڭبەك زاڭناماسىن باقىلاۋ سالاسىنداعى ۋاكىلەتتى ورگانداردىڭ قۇزىرەتتەرىن قايتا قاراۋ, قازاقستان رەسپۋبليكاسىنىڭ تسيفرلىق اكتيۆتەر سالاسىنداعى زاڭنامانى بۇزعانى ءۇشىن جاۋاپكەرشىلىك جۇكتەۋ جانە باسقا دا ماسەلەلەر بار.
سەنات وتىرىسىندا قارالاتىن كەلەسى ماسەلە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىن (سالىق كودەكسى) قولدانىسقا ەنگىزۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ. بۇل قۇجات كولەڭكەلى اينالىمنان شىعارۋعا جانە سالىق ورگاندارىنىڭ تسيفرلىق ماينەرلەر مەن تسيفرلىق اكتيۆتەر نارىعىنىڭ باسقا دا قاتىسۋشىلارىنىڭ قىزمەتىنە ودان ءارى تولىققاندى مونيتورينگ پەن باقىلاۋ جۇرگىزۋگە جانە مەملەكەتتىك بيۋدجەتكە تۇسەتىن تۇسىمدەردىڭ ءوسۋىن قامتاماسىز ەتۋگە ارنالعان.
ودان بولەك, وتىرىس كەزىندە بيۋرو مۇشەلەرى ماجىلىستەن كەلىپ تۇسكەن زاڭداردى سەناتتىڭ تۇراقتى كوميتەتتەرىنە ءبولىپ بەردى.
