ەۋرازيالىق ەكونوميكالىق وداق ماسەلەلەرى جوعارعى وقۋ ورىندارىندا تالقىلانۋى ءتيىس

استانا. 11 ماۋسىم. بەلارۋس مەملەكەتىنىڭ ءبىلىم ءمينيسترى سەرگەي ماسكەۆيچ ەۋرازيالىق ەكونوميكالىق وداققا قاتىستى ماڭىزدى ماسەلەلەر جوعارعى وقۋ ورىندارىندا جۇيەلى تۇردە تالقىلانۋى ءتيىس دەپ ەسەپتەيدى. بۇل تۋرالى «قازاقپارات» حابارلادى. نازارباەۆ ۋنيۆەرسيتەتىندە ءوتىپ جاتقان جوعارى ءبىلىم كوشباسشىلارىنىڭ ءىىى ەۋرازيالىق فورۋمىنا قاتىسىپ جاتقان سەرگەي ماسكەۆيچ: «بۇگىندە ەۋرازيالىق ەكونوميكالىق وداقتى قۇرۋ بارىسىندا وعان قاتىسۋشى ءۇش مەملەكەتتىڭ ءبىلىم بەرۋ جۇيەسىندە دە جاڭا ماسەلەلەر تۇر. سوندىقتان ءبىز اتالعان وداققا قاتىستى ماڭىزدى جاعداياتتاردى تالقىلاۋعا ءتيىسپىز», – دەدى. بەلارۋس ءمينيسترىنىڭ سوزىنە قاراعاندا, قازىرگى زاماندا كەز كەلگەن مەملەكەتتىڭ باسەكەگە قابىلەتتىلىگى سول ەلدەگى ۋنيۆەرسيتەتتەردىڭ الەۋەتىنە دە بايلانىستى. سونداي-اق, ول: «مەملەكەتىمىز بەن ەكونوميكامىزدىڭ باسەكەگە قابىلەتتىلىگى تۋرالى ءسوز قوزعالعاندا, ەڭ باستى نازاردى جوعارى ءبىلىم وردالارىنىڭ بىلىكتى مامان دايىنداپ شىعارۋىنا اۋدارامىز. سوندىقتان بۇل جاعدايدا ۋنيۆەرسيتەتتىڭ مامانداردى قانداي دەڭگەيدە دايىنداپ شىعاراتىنى وتە ماڭىزدى», – دەدى. جولدىباي بازار. دەرەككوز: «قازاقپارات». فوتو: kraj.by.