پاترۋلدىك پوليتسيا باتالونىنىڭ ينسپەكتورلارى وسكەمەننىڭ كىرەبەرىسىندەگى شەشەك اسۋىندا شامادان تىس جۇگى بار اۆتوكولىكتى توقتاتقان. قۇجاتتارىن تەكسەرە كەلە, كولىكتى كۇرشىم اۋدانىنىڭ 29 جاستاعى تۇرعىنى باسقارىپ كەلە جاتقانى بەلگىلى بولادى. كولىكتە, سونىمەن قاتار تاعى ەكى جولاۋشى بولعان.
پوليتسەيلەر كولىك قۇرالىن تەكسەرۋ كەزىندە بولشەكتەلگەن جانۋاردىڭ ۇشاسىن كورگەن. الايدا ەتتى تاسىمالداۋ ءۇشىن بەرىلگەن ءتيىستى قۇجاتتار جوق بولىپ شىعادى. ونىمەن قويماي, كولىكتەن مىلتىق تابىلعان. انىعى, جولاۋشىلاردىڭ ءبىرى كولىككە قاراي كەلە جاتقان پوليتسيا قىزمەتكەرلەرىن كورىپ, قارۋدى قارعا لاقتىرىپ جىبەرگەن. بايقاماي قالىپ, جازا جەڭىلدەيدى دەپ ويلاسا كەرەك.
جاۋاپ الۋ كەزىندە بەلگىلى بولعانى, كۇدىكتى ازاماتتار تۇنگى ساعات ەكىدە ۇلان اۋدانىنىڭ ماماي باتىر اۋىلىنا قاراي شىققان. ءسويتىپ, ولار جاقىن جەردە جايىلىپ جۇرگەن جىلقىنى اتىپ الىپ, ەتىن بولشەكتەگەن. وسكەمەنگە بارار جولدا جانۋاردىڭ تەرىسى مەن باسىن لاقتىرىپ جىبەرىپ, ءارى قاراي ەتتى ساتۋ ءۇشىن جولعا شىققان.
بۇل فاكتى بويىنشا سوتقا دەيىنگى تەرگەۋ باستالدى. قۇقىق قورعاۋ قىزمەتكەرلەرىنىڭ ايتۋىنشا, قىلمىستىق توپ بۇعان دەيىن دە ۇلان اۋدانىنىڭ اۋماعىندا مال ۇرلىعىمەن اينالىسقان ەكەن. قازىرگى ۋاقىتتا تەرگەۋ ءىس-شارالارى جالعاسۋدا. كۇدىكتى ازاماتتارعا قاتىستى قىلمىستىق كودەكستىڭ 188-1-بابى, 2-بولىگى بويىنشا قىلمىستىق ءىس قوزعالعان. زاڭدا ەر ادامدارعا ءۇش جىلدان جەتى جىلعا دەيىن باس بوستاندىعىنان ايىرىلۋ جازاسى كوزدەلگەن.
شىعىس قازاقستان وبلىسى
