ستۋدەنتتەر تەاترى

قىزىلورداداعى «بولاشاق» ۋنيۆەرسيتەتى ەلگە ۇلگى, جاستار ۇناتاتىن تۇلعالاردى ءوز تورىنە شاقىرىپ, ستۋدەنتتەرمەن جولىقتىرىپ, سۇحبات قۇرىپ, ەركىن الاڭ جاساۋ ماقساتىندا «مارتەبەلى مەيمان» جوباسىن قولعا الدى. بۇل جولى «مارتەبەلى مەيمان» رەتىندە اقىن, دراماتۋرگ يسرايل ساپارباي شاقىرىلىپتى. اقىن مەن جاستاردىڭ ورتاسىندا ولەڭ مەن ءومىردىڭ اراسىنداعى اڭگىمەنىڭ بارلىعى قامتىلدى. ونان سوڭ وسى ۋنيۆەرسيتەت جاستارىنان قۇرالعان ستۋدەنتتەر تەاترىنىڭ تۇساۋى كەسىلدى. قاناتقاقتى قويىلىم كورسەتىلدى. جاستار يسرايل ساپاربايدىڭ وسىدان 23 جىل بۇرىن قويىلعان «اۋىلدان كەلگەن ارۋ» دەگەن پەساسىن تاڭداپ الىپتى. وقۋعا تۇسە الماي قالعان قىزدىڭ تاعدىرى قالانىڭ داڭعازا ومىرىنە ۇلاسىپ, الدانىپ, ءار نارسەگە اربالىپ, اقىر اياعى جۇكتى بولىپ, ومىرگە نارەستە اكەلىپ, ونى تاستاپ كەتۋمەن اياقتالادى. كۇندەلىكتى كۇيبەڭ تىرشىلىكتە كەزىگەتىن وقيعا. اسىرەسە, قالانىڭ قىم-قۋىت تىرلىگىنە قىزىققان اۋىل بالاسىنا ءتان قۇبىلىس. ماماندىقتارى اكتەرلىكتەن الىس بولسا دا «بولاشاقتىڭ» ستۋدەنتتەرى قويىلىمدى ادەمى الىپ شىقتى. كورەرمەندى سەندىردى. كوزگە ىستىق جاس كەلتىردى. «ءبىز وسى ارقىلى جاس­تاردى كەرى ارەكەتتەردەن, جامان قۇبىلىستاردان ساقتاندىرىعىمىز كەلدى. جاستارعا وي سالىپ, وڭ جولمەن ءجۇرۋدى ناسيحاتتاماق نيەتتە بولدىق», – دەيدى ۋنيۆەرسيتەتتىڭ نەگىزىن سالۋشى باقبەرگەن دوسمامبەتوۆ. ەرجان بايتىلەس, «ەگەمەن قازاقستان». قىزىلوردا.