24 ساعات

*اۋعانستاننىڭ ءوڭتۇس­تىگىندە ناتو-نىڭ 5 اسكەري قىز­مەتكەرى قازا تاپقان. اليانس­تىڭ ءباسپاسوز قىز­مەتى حابار­لا­عانداي, ولار قا­رۋلى جاساق شابۋى­لىنىڭ قۇر­باندارى بولعان. سولداتتاردىڭ ۇلتى مەن ولار­دىڭ قانداي جاعدايدا قازا تاپ­قانى تۋرالى ناقتى ءمالى­مەت جوق. تۇتاستاي العاندا, جىل با­سى­نان بەرى ناتو-نىڭ 41 اسكەري قىز­مەتكەرى قۇرباندىققا اينالعان. *رەسەيدە 2013 جىلى كا­پيتالى 1 ميلليون اقش دوللارىنان اساتىن وتباسىلار سانى 213 مىڭعا جەت­كەن. جالپى دۇنيەجۇزى بوي­ىنشا دوللارلى ميلليونەر وتباسىلار سانى 16,3 ميلليوندى قۇرايدى ەكەن. ميلليونەرلەرى ەڭ كوپ ەل – اقش-تا ونداي وتبا­سى­لار سانى 7,1 ميلليوندى قۇ­رايتىن كورىنەدى. ال قى­تاي­دا 2,4 ميلليونەر وتباسى بار ەكەنى انىقتالعان. ءۇشىن­­شى ورىندا 1,5 ميلليونەر وتباسى بار جاپونيا تۇر. *ناتو-نىڭ ەكى بارلاۋ­شى كورابلى رەسەيدىڭ قارا تەڭىز فلوتىنىڭ اسكەري نىساندارىنا راديوەلەكتروندى بارلاۋ جۇرگىزۋ ءۇشىن جاقىندا قارا تەڭىزگە ەنەتىنى بەلگىلى بولىپ وتىر. مونترە كونۆەنتسياسىنا سايكەس قارا تەڭىزگە جاتپايتىن ەلدەردىڭ اسكەري كورابلدەرى قارا تەڭىزدە تەك 21 كۇنگە دەيىنگى ارالىقتا عانا بولا الادى. *جاپونيادا ءۇشىنشى بالا تۋعان وتباسىنا ما­تە­ريالدىق كومەك ايتار­لىقتاي قوماق­تان­دىرىلا تۇسەتىن بولدى. ءايت­پەسە ەندى 50 جىلدان كەيىن ەل حال­قى­نىڭ سانى قازىرگى 127 ميل­­ليون ادامنان 86 ميل­ليون ادامعا دەيىن ازايىپ كەتۋى ىقتيمال ەكەن. بۇگىندە جاپو­نيادا ورتاشا ەسەپپەن ءبىر ايەل ومىرگە 1,43 بالادان عانا اكە­لەتىن كورىنەدى. *امەريكانىڭ وكلاحوما شتاتىنداعى جاڭاشىلدار وق وتپەيتىن جامىلعى جاساپ شى­عاردى. جۇمساقتىعىنا قارا­ماستان, مۇنداي جامىلعىلار ءوزى­نىڭ قورعانىش قابىلەتى ءجونى­نەن بروندى جيلەتتەردەن كەم تۇسپەيدى ەكەن. ەندى مۇنداي جامىل­عىلاردى مەكتەپتەردە تور­نادو كەزىندە نەمەسە اتىس بول­عان جاعدايدا قولدانۋ كوز­دەلىپ وتىر. *سۇننيتتەردىڭ قارۋ­لى جاساعى يراكتىڭ ءسولتۇس­تى­گىن­دەگى موسۋل قالاسىنىڭ باتىس بولىگىن باسىپ ال­عان. يسلام­شى­لاردىڭ اتال­عان توبى يراك پەن سيريا اۋماعى­نىڭ بەلگىلى ءبىر ءبو­لى­گىن باقى­لاۋ­ىندا ۇستايدى. ولار شي­تەر­گە, باعدات پەن داماسك ۇكىمەت­تەرىنە جانە باسقا يسلاميستەرگە قارسى كۇرەس جۇرگىزەدى. *بىشكەكتەگى اق ءۇي جانىندا تەزەك جاعىپ, فلەشموب ۇيىمداستىرماق بول­عان جاستار ۇستالدى. ولار «قىرعىزگازدى» قىرعىز­ستان­نىڭ گاز ءۇشىن رە­سەيگە قارىزى تىم ءوسىپ كەتكەن سوڭ سول ەلگە بەرۋگە بايلانىس­تى ءوز­دەرىنىڭ نارازىلىقتارىن وسىلاي بىلدىرمەكشى بولىپتى. ال كەلىسىمشارت مەرزىمى بىتكەندىكتەن «ۋزترانسگاز» قىرعىزستاننىڭ وڭتۇستىگىنە گاز بەرۋىن توقتاتسا كەرەك. *رەسەيدىڭ يركۋتسك وبلى­­سىنداعى ۋسولە-سي­بيرسكوە قالا­سىندا مەكتەپ ءبىتىرۋشى قىز بالا مەم­لەكەتتىك قورى­تىن­دى اتتەس­تاتتاۋدان جامان باعا العان­نان كەيىن وزىنە ءوزى قول سالعان. ەمتيحاننان سوڭ وقۋشى قىز ورمانعا كە­تىپ, قاي­تىپ ورالماعان. ءىز­دەۋ ءناتي­جەسىندە ونىڭ اعاش­قا اسىلىپ قالعانى بەل­گىلى بولعان. ولەرىنىڭ ال­دىندا اتا-اناسىنا مى­نا­داي قولحات جازىپ قال­دى­رىپتى: «سىزدەردىڭ ءۇمىت­تەرىڭىزدى اقتاماعانىم ءۇشىن كەشىرىم وتىنەمىن». *داعىستاندا جەرگىلىكتى تۇرعىنداردان زاڭسىز ساق­تالىپ كەلگەن اتىس قارۋلارىن ەرىكتى تۇردە ساتىپ الۋ ناۋ­قانى باستالدى. جەرگىلىكتى بيلىكتىڭ پىكىرىنشە, ساتىپ الۋ قۇنى تۇرعىنداردى ىنتالاندىرۋى ءتيىس. ماسەلەن, دراگۋنوۆتىڭ مەرگەندىك ۆينتوۆكاسى مەن پۋلەمەتى 25 مىڭ رۋبلگە باعالانباق ەكەن. اقپارات اگەنتتىكتەرى ماتەريالدارىنىڭ نەگىزىندە ازىرلەندى.