ءمالىم بولعانداي, 2023 جىلعى 5 قاڭتاردا پارلامەنتتىڭ ءبىر توپ دەپۋتاتىنىڭ اتىنان كونستيتۋتسيالىق سوتقا اتا زاڭنىڭ 62-بابىنىڭ 4-تارماعىنا رەسمي تۇسىندىرمە بەرۋ تۋرالى ءوتىنىش كەلىپ تۇسكەن.
دەپۋتاتتار وندا «تۇڭعىش پرەزيدەنتتىڭ مارتەبەسى مەن وكىلەتتىگىن رەتتەيتىن نورمالاردى الىپ تاستاۋعا بايلانىستى «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» كونستيتۋتسيالىق زاڭنىڭ كۇشى جويىلدى دەپ تانىلۋعا جاتا ما؟» دەگەن ساۋال جولداعان.
وسىعان وراي كونستيتۋتسيالىق سوت 2022 جىلعى 5 ماۋسىمداعى رەسپۋبليكالىق رەفەرەندۋمنان كەيىن وسى كونستيتۋتسيالىق زاڭنىڭ قولدانىستاعى زاڭنامادا ساقتالۋى قازاقستان رەسپۋبليكاسى كونستيتۋتسياسىنىڭ جاڭالانعان رەداكتسياسىمەن كەلىسپەيدى دەپ پايىمدايدى.
وسىلاي دەي كەلە كونستيتۋتسيالىق سوت: «2022 جىلعى 5 ماۋسىمداعى رەسپۋبليكالىق رەفەرەندۋمدا بىلدىرىلگەن, قازاقستان رەسپۋبليكاسىنىڭ كونستيتۋتسياسىنان 46-باپتىڭ 4-تارماعى مەن وزگە دە نورمالاردى الىپ تاستاۋ تۋرالى قازاقستان حالقىنىڭ ەركىنە نەگىزدەلە وتىرىپ, قازىرگى ۋاقىتتا قازاقستان رەسپۋبليكاسىنىڭ كونستيتۋتسياسىندا «قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» قازاقستان رەسپۋبليكاسى كونستيتۋتسيالىق زاڭىنىڭ قازاقستان رەسپۋبليكاسىندا قولدانىلاتىن قۇقىقتا ساقتالۋىنا قۇقىقتىق نەگىزدەر جوق, دەپ تانۋ قاجەت, وسىعان بايلانىستى ونىڭ كۇشى جويىلدى دەپ تانىلۋعا جاتادى» دەپ قاۋلى قابىلدادى.
ەسكە سالا كەتەيىك, 2022 جىلعى 5 ماۋسىمدا وتكەن رەفەرەندۋم ناتيجەسىندە رەسپۋبليكانىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ مارتەبەسى مەن وكىلەتتىگى, ولاردى كونستيتۋتسيالىق زاڭمەن رەگلامەنتتەۋ مۇمكىندىگى, كونستيتۋتسيالىق كەڭەسكە عۇمىر بويى مۇشەلىگى, سونداي-اق ونىڭ ارناۋلى ارتىقشىلىقتارى – مارتەبەسىنىڭ وزگەرمەۋى, قاتارىنان ەكى رەتتەن ارتىق پرەزيدەنت بولىپ سايلانۋعا شەكتەۋدىڭ قولدانىلماۋى كونستيتۋتسيادان الىنىپ تاستالدى.
