برازيلياداعى
الەم چەمپيوناتىنىڭ باستالۋىنا
1 كۇن قالدى
ەرتەڭ جەر شارىنىڭ كەلەسى قيىرىندا, الىستاعى برازيليا جەرىندە فۋتبول جانكۇيەرلەرى 4 جىل بويى تاعاتسىزدانا كۇتكەن كەزەكتى الەم چەمپيوناتى سورەدەن شىعادى. جاھاندىق جارىس باستالاتىن شاق جاقىنداعان سايىن مامانداردا دا, ويىنشىلاردا دا, ولارعا جاناشىر جۇرتتا دا دەگبىر قالماي بارادى. مۇنىڭ ءوزى بۇگىنگى تاڭدا الەمدە ءوزىن ءوزى تولىق مويىنداتقان قۇرامانىڭ جوق ەكەنىن دە كورسەتسە كەرەك. ادەتتە الەمدىك دەڭگەيدەگى جانكۇيەر قاۋىم ءبىر چەمپيوناتتان كەلەسى چەمپيوناتقا دەيىنگى ارالىقتا ءومىر سۇرەتىن سياقتى. ولار كەزەكتى مۋنديال مارەگە جەتكەن بويدا الداعى سايىستا كىمنىڭ ايبىنى اسىپ, ايدىنى وزىپ شىعاتىنىن تالقىلاي باستايدى. بۇل جولى دا سولاي بولدى. افريكا قۇرلىعىندا وتكەن الاماننىڭ ىستىق-سۋىعى باسىلماي جاتىپ-اق جۇرت ەندىگى بايگەنىڭ جەڭىمپازى كىم بولاتىنىنا بارلاۋ جاساي باستادى. وسىناۋ 4 جىل بويىنا سول اڭگىمە تولاس تاپپادى. پىكىرتالاس دودا وتەتىن شاق تاياعان تۇستا جاڭا تولعاممەن تولىعىپ, بۇرىنعىدان بەتەر قىزا ءتۇستى. بۇل وي بولىسۋلەرگە قاتارداعى قاراپايىم فاناتتان باستاپ, فۋتبول ويىنىنىڭ مايتالماندارى اتانعان اتاقتى فۋتبولشىلار مەن جاتتىقتىرۋشىلارعا دەيىن قاتىستى. سونىمەن, جۇرتشىلىق پىكىرلەرىنىڭ ولشەمىمەن قاراعاندا, ءمۋنديالدىڭ باستى ۇمىتكەرلەرى كىمدەر؟ برازيليا. بۇل – ناقتىلى ءبىر كەزەڭدە ويىنشىلارىنىڭ قۇرامى مەن شەبەرلىك دەڭگەيلەرى قانداي جاعدايدا بولعانىنا قاراماستان, كەز كەلگەن الەم چەمپيوناتىندا باستى ۇمىتكەرلەر قاتارىندا اتالىپ كەلگەن جالعىز ەل. وسى كەزگە دەيىنگى بارلىق 19 چەمپيوناتقا تۇگەل قاتىسقان دا ءبىر ءوزى. بۇعان قوسا, اتاعى جاعىنان دا الدىنا بىردە-ءبىر جاساق تۇسىرمەيدى. ول – الەمنىڭ 1958, 1962, 1970, 1994 جانە 2002 جىلدارعى چەمپيونى. مۇنىڭ ۇستىنە, سارى جەيدەلى قۇراما چەمپيوناتتى تاريحتا ەكىنشى مارتە ءوز وتانىندا قابىلداپ وتىر. دەگەنمەن, ماماندار تاپ وسى جولى برازيليا قۇراماسىنىڭ ءبىرىنشى رەت بۇرىنعى قالپىنا مۇلدەم ۇقسامايتىن بولىپ قۇرالعانىن دا ايتادى. بۇعان, ەڭ الدىمەن, كوماندا ساپىندا بىردە-ءبىر ورتالىق شابۋىلشىنىڭ جوقتىعى نەگىزگى سەبەپ. جارتىلاي قورعانىس شەبىندە دە كرەاتيۆتى ورتالىق ويىنشى جوق. مۇنىڭ ەسەسىنە, قورعانىس شەبىن ناعىز تاسقامال دەۋگە بولادى. ونىڭ جانىنا قارسى جورىققا اتتانۋعا دابىل قاعىلعان بويدا قوس قاپتالدان العا قاراي شۇيلىگە ۇمتىلاتىن «قارعىباۋلى قابىلانداردىڭ» ءۇيىرى توپتاسقان. ولاردىڭ ءبارى تىرەكتى ايماقتىڭ ويىنشىلارى. بۇل جىگىتتەر كىمدى بولسا دا «ج ۇلىپ جەگەلى» تۇر. ال قۇرامانىڭ قاقپا ماڭى وسالداۋ كورىنەدى. مۇندا كوپتەن بەرى ىرگەلى كلۋبتا ويناپ كورمەگەن تاجىريبەلى جۋليو سەزارۋدى قيىن ساتتە الماستىرا قوياتىن لايىقتى ءىزباسار جوق. الايدا, باس جاتتىقتىرۋشى لۋيس فەليپە سكولاري سوڭعى شەپتەگى ولقىلىق ورنىن قورعانىستاعى مىقتى ويىنشىلارمەن جاپپاقشى كورىنەدى. ايتسا ايتقانداي, ونىڭ قورعاۋشىلارى شىنىندا «سەن تۇر, مەن اتايىننىڭ» سۇرپىنان. شىنى كەرەك, مۇنداي بايراقتى باسەكەدە كىمنىڭ جۇلدىزى جانىپ شىعا كەلەتىنىن ءدوپ باسىپ ايتۋ استە قيىن. ايتكەنمەن, برازيليالىقتاردىڭ وسى جولى التىنشى مارتە چەمپيون اتانۋعا تولىق مۇمكىندىگى بار ەكەنىن جوققا شىعارا المايمىز. يسپانيا. سپورتتا «چەمپيون بولعاننان چەمپيوندىقتى ۇستاپ تۇرۋ قيىن» دەگەن قاناتتى ءسوز بار. پيرەنەي تۇبەگىنەن كەلگەن پەرىلەر وسى جولى ءبىرىنشى رەت الەم بىرىنشىلىگىنە چەمپيوننىڭ رولىندە قاتىسقالى تۇر. ولار جوعارىدا ايتىلعان قاعيدانىڭ قانشالىقتى سالماعى بار ەكەنىن ەندى ناقتى سەزىنەتىن بولادى. البەتتە, يسپان جۇرتى «فۋريا روحيدەن» سول اتاعىن قورعاپ قالۋدى تالاپ ەتەدى. ەگەر وسى رەتتەگى الامان برازيليادا ەمەس, جەر ءجۇزىنىڭ باسقا كەز كەلگەن پۇشپاعىندا وتەر بولسا, الەم چەمپيونىنىڭ بۇل جولى دا فاۆوريتتەر قاتارىندا ەكەنىنە ابدەن كەلىسۋگە بولار ەدى. ال مۇندا... ءبارى باسقاشا. مۇنداعى جۇرت فينالدىڭ برازيليا-ارگەنتينا سيپاتىندا ءوتۋىن قاتتى قالايدى. ونىڭ ۇستىنە, يسپانيانىڭ چەمپيوناتقا كەلىپ وتىرعان قۇرامى دا مامانداردىڭ ونشالىقتى ءبىر سەنىمىن بەكىندىرىپ تۇرعان جوق. بۇعان تەرمە جاماعات ساپىنداعى كوپتەگەن مىقتى ويىنشىلاردىڭ جاراقات الىپ قالۋى دا سەبەپ بولىپ تۇرعان سياقتى. سوندىقتان دەل بوسكە قولدا بار فۋتبولشىلار قاتارىنان ۇجىم تۇزۋگە بارىن سالىپتى. گەرمانيا. الەمنىڭ ءۇش دۇركىن (1954, 1974, 1990) چەمپيونى اتانعان قۇراما حالىقارالىق دەڭگەيلەردەگى ءارتۇرلى تۋرنيرلەردە ەڭ ءساتتى ونەر كورسەتىپ كەلە جاتقان كوماندا بولىپ تابىلادى. ال ۇجىمنىڭ تىزگىنىن ۇستاعانىنا بيىل 10 جىل تولىپ وتىرعان يواحيم لەۆ الداعى چەمپيونات ءۇشىن وتە كۇشتى قۇرام قۇراستىرا ءبىلدى. «نەمىس ماشينەسى» بۇل جولى ءتاجىريبەلى جانە جاس فۋتبولشىلاردىڭ ورتاق قۇيىلىمىنان قۇرالعانداي بولىپ كورىنەدى. ونىڭ ءاربىر شەبىندە شاما-شارىقتارى بىردەي ەكى ويىنشىدان بار. بۇل جاعىنان كەلگەندە ورتالىق شابۋىلشى عانا جالعىزسىرايتىن سياقتى. ايتكەنمەن, قازىر كۇللى گەرمانيا وسى جالعىزدىڭ – ميروسلاۆ كلوزەنىڭ جەكە تابىسىن دا قاتتى تىلەپ وتىر. ماسەلە مىنادا, بۇگىنگە دەيىن مۋنديالدەردە 14 گول سوعىپ ۇلگەرگەن سۇرمەرگەننىڭ ەندى الەم رەكوردىن جاڭارتۋعا تولىق مۇمكىندىگى تۋىپ تۇر. ال بۇعان دەيىنگى ۇزدىك كورسەتكىش 15 دوبى بار برازيليالىق رونالدونىڭ ەنشىسىندە ەكەنى بەلگىلى. دەمەك, تۋرنيردە بار-جوعى 2 گول سالسا, رەكورد قولدا بولماق. قازىر بىلايعى جۇرت اراسىندا بولاشاق چەمپيون قاتارىنان گەرمانيا قۇراماسىن كورىپ وتىرعاندار دا كوپ. راس, نەمىستەر تۇسكەن توپ وڭاي ەمەس. جالپى, مۇنداي الاماندا وڭاي توپ بولا قويمايدى. ماماندار باستى ۇمىتكەرلەر قاتارىندا, سونداي-اق, ارگەنتينا, ۋرۋگۆاي, فرانتسيا, پورتۋگاليا, يتاليا, انگليا سياقتى ەلدەردىڭ كوماندالارىن دا اتاپ وتىر. سەرىك ءپىرنازار, «ەگەمەن قازاقستان».
