اۋىر كۇندەردە العى شەپتە قىزمەت كورسەتكەندەردىڭ ءبىرى – مەديتسينا قىزمەتكەرلەرى, دارىگەرلەر. ءبىزدىڭ №7 اۋرۋحانامىزدىڭ قابىلداۋ بولىمشەسىنە تۇسكەندەردىڭ ءبارى اۋىر جاعدايدا ەدى. بۇل وقيعا توبەمىزدەن سۋ قۇيىپ جىبەرگەندەي, جان تۇرشىگەرلىك جاعدايعا اينالعان بولاتىن.
اۋرۋحانا بەلگىسىز ادامداردىڭ قورشاۋىندا قالدى. ارينە, قورقىنىش, ۇرەي بولدى. اۋرۋحاناداعى ارىپتەستەرىمىز بەن ەمدەلۋشىلەردىڭ تاعدىرىنا الاڭدادىق. سانامىزدىڭ تۇكپىرىندە, جۇرەگىمىزدىڭ تورىندە ورىن العان قورقىنىش ومىرىمىزدەن ايىرىلىپ قالارداي ۇرەي قالدىردى. الايدا وسىناۋ قيىن-قىستاۋ كەزەڭدە ءبىزدى قورشاپ العان سودىرلاردىڭ ۇركىتكەنىنە, اينەكتەر مەن قۇرال جابدىقتاردى سىندىرعانىنا قاراماي, ء«بىر جاعادان باس, ءبىر جەڭنەن قول شىعارىپ» ءوز مىندەتىمىزدى ورىندادىق.
ءتۇرلى جاراقاتتارمەن تۇسكەن ناۋقاستاردىڭ كىم ەكەنىنە, قانداي سالادا جۇمىس ىستەيتىنىنە قاراماستان پاتسيەنت رەتىندە قابىلدادىق. ول ادامداردىڭ ءبارى وتە اۋىر جاعدايدا كەلدى, ويتكەنى كوپشىلىگىنە وق تيگەن, اشىق جارالارى بولدى. دارىگەرلەر مەن ناۋقاستاردىڭ ءومىرى قىل ۇستىندە تۇردى. ون بەستەن استام وتا جاسادىق. ەكى تاۋلىك بويى كوز ىلمەي, كۇشەيتىلگەن رەجىمدە قىزمەت كورسەتتىك. ارينە, وسىنداي جاعدايدا انەستەزيولوگ, حيرۋرگ دارىگەرلەردىڭ ادامي فاكتورعا جول بەرىپ, شاتاسىپ كەتۋ قاۋپىنەن سەسكەندىك.
وكىنىشكە قاراي, قانشاما ازاماتىمىز قازا تاپتى. حالقىمىز «تاس تۇسكەن جەرىنە اۋىر» دەيدى. «وسىنداي كۇردەلى شاقتا قالاي جۇمىس ىستەپ, قىزمەت كورسەتۋگە بولادى؟» دەگەن سۇراق تۋىندايدى. اق حالاتتى ابزال جاندار قيىندىقتارعا قاراماستان جۇمىس ىستەپ, باتىر مىنەز كورسەتىپ, انتقا ادالدىق تانىتتى. ارىپتەستەرىمە كوپ راحمەت ايتقىم كەلەدى. قاڭتاردىڭ ىزعارلى كۇندەرى ءبىز ءۇشىن ەڭ اۋىر كەزەڭ بولدى. وسىلاي ءبىر ۇجىم بولىپ بۇكىل جۇمىستى قولدان كەلگەنشە اتقارىپ شىقتىق.
ءبىز دە قايعىلى, اۋىر سىناققا تولى كۇندەردىڭ قايتالانباۋىن تىلەيمىز. بۇل – بارشانىڭ كوكەيىندەگى ورتاق تىلەك. قازىر بارىنە ءادىل باعا بەرىپ, سول باسبۇزارلاردىڭ ءبارىن بانديت دەپ ءوز اتىمەن اتاۋىمىز كەرەك. ويتكەنى وسىنداي وڭباعاندىق كەلەشەكتە قايتالانباۋعا ءتيىس. وسىعان بۇكىل قوعام بولىپ جۇمىس ىستەۋىمىز كەرەك. بۇزاقىلاردان باتىر جاساۋدىڭ قاجەتى جوق.
ەسەناي ەسپەنبەتوۆ,
الماتى قالاسى №7 اۋرۋحاناسى رەانيماتسيا بولىمشەسىنىڭ مەڭگەرۋشىسى
