سوڭعى ءتورت-بەس كۇننەن بەرى شىعىس قازاقستاندا اق تۇتەك بوران سوعىپ, ەلدىڭ مازاسىن قاشىردى. كۇرە جولداردى قويىپ, قالا ىشىندەگى كولىكتەر قاڭتارىلىپ قالعان. جالپى, وبلىستا 12 مىڭ شاقىرىمعا جۋىق اۆتوكولىك جولى بولسا, ونىڭ 3 414 شاقىرىمى رەسپۋبليكالىق ماڭىزعا يە. ال وسىنشاما جولدى بار-جوعى 156 تەحنيكا تازالايدى.
– قار ەرىپ, جىلبىراپ جاتىر. تەحنيكا توقتاي قالسا, ءبىر جاعىنا سىرعىپ كەتەدى. ودان سوڭ ورنىنان قوزعالۋى قيىن. ورگە قاراي قاردى يتەرىپ شىعارۋ دا وڭاي ەمەس. قيىندىققا قاراماستان, كۇندىز-ءتۇنى توقتاماي جۇمىس ىستەپ جاتىرمىز, – دەيدى تراكتورشى الەكسەي بورتنيكوۆ.
تەحنيكا تىزگىندەپ, جولدى قاردان ارشىپ جۇرگەن ازاماتتاردىڭ ءۇي بەتىن كورمەگەندەرىنە ءتورت-بەس تاۋلىك بولعان. دامىلسىز جول ۇستىندە ءجۇر. ماسەلەن, وسكەمەن – ريددەر باعىتىنداعى 105 شاقىرىم جول جيەگىندەگى قاردىڭ قالىڭدىعى ءۇش مەترگە جۋىقتايدى. كۇرەپ جۇرگەن ون شاقتى تەحنيكا ۇلگەرمەي جاتىر. قالانىڭ شىعا بەرىسىندە كەرۋەن بولىپ, كولىكتەر ءتىزىلىپ تۇر. التاي – وسكەمەن باعىتىنداعى كۇرە جولدا كولىكتەر ەكى تاۋلىك تۇرعان. بۇل جاقتا 20 شاقىرىمعا جۋىق جولدى تۇتاس قار الىپ قالىپتى.
– قازىرگى كۇندە جولدا 84 تەحنيكا جۇمىس ىستەپ جاتىر. تەحنيكا بولعاننان كەيىن سىناتىنى دا بار. ولاردى جەدەل جوندەيدى. مەحانيزاتورلار ەكى اۋىسىمدا جۇمىس ىستەپ ءجۇر. جولداردى اشۋ ءۇشىن بارىنشا كۇش سالىپ جاتىرمىز, – دەيدى نۇرجان مۇستافين.
كۇن رايىنىڭ قولايسىزدىعىنا قاراماستان, جولعا شىعىپ كەتىپ, وقىس وقيعالارعا تاپ بولعان جولاۋشىلار دا جوق ەمەس. بوراندى كۇندەرى پريۆولنوە اۋىلىنان سەمەي قالاسىنا باعىت العان اۆتوكولىك جول جيەگىنە شىعىپ كەتىپ, بەس جولاۋشى سالوندا قامالىپ وتىرعان. وزدەرى شاراسىز بولعان سوڭ جەدەل جەلىگە حابارلاسىپ, كومەك سۇراعان. قوڭىراۋ تۇسكەن سوڭ اپاتتىق مەديتسينا ورتالىعىنىڭ دارىگەرلەرى وقيعا ورنىنا جەتكەن. جەتە سالا, قارعا كومىلگەن كولىكتىڭ ەسىگىن اشىپ, بەس جولاۋشىنى قاۋىپسىز جەرگە شىعارعان. ولارعا العاشقى مەديتسينالىق كومەك كورسەتىلگەن سوڭ جەرگىلىكتى مەشىتكە ورنالاستىرىپتى. «جولاۋشى – ءمۇساپىر» دەمەكشى, مەشىتتە ولارعا ىستىق شاي بەرىلىپ, جىلى كورپەگە وراندى.
مۇنداي قامقورلىقتى اباي وبلىسىنا قاراستى جارما اۋدانىنىڭ تۇرعىندارى دا كورسەتتى. ادەتتە قىستىڭ كۇنى بوران سوقسا, جولاۋشىلاردىڭ ءبىرازى ومبى – مايقاپشاعاي تاس جولى بويىنداعى قالباتاۋ اۋىلىنا جەتىپ توقتايدى. توقتاماسقا امال جوق. جۋىقتا جولدا قالعان جولاۋشىلارعا جارمالىق «شاراپات» ۇكىمەتتىك ەمەس ۇيىمىنىڭ ەرىكتىلەرى جانە توتەنشە جاعدايلار ءبولىمى ىستىق شاي تاراتىپ, بارىنشا كومەك كورسەتتى. قالباتاۋدان 20 شاقىرىم اسىپ بارىپ, قار قۇرساۋىنا قامالعان ءتورت جولاۋشىنى قۇتقارۋشىلار اۋىلدىڭ قوناقۇيىنە جەتكىزدى. سونىمەن قاتار الماتى – وسكەمەن, سەمەي – كوكپەكتى, زايسان باعىتتارىنداعى كولىك قوزعالىسىن شەكتەۋگە بايلانىستى جولدا قالعان 86 جولاۋشى ارنايى جىلىتۋ پۋنكتىنە ورنالاستىرىلدى. شالاباي اۋىلىنىڭ تۇرعىنى تۇتەپ تۇرعان كۇنى كەشكىلىك جۇمىستان شىعىپ, اداسىپ كەتىپ, تابىلدى. ايتا بەرسەك, بوراندى كۇندەرى شىعىس قازاقستان اۋماعىندا جۇزدەگەن ادام قۇتقارىلدى. ءتىپتى رەسەي ازاماتتارى دا شەكاراعا تاياۋ شەمونايحا اۋدانىندا قارعا قامالىپ قالعان. قۇتقارىلعان رەسەيلىك 12 ادامنىڭ ىشىندە ەكى بالا دا بار. ولار شەمونايحا قالاسىنداعى قوناقۇيلەردىڭ بىرىنە جايعاستىرىلعان.
ءيا, بيىلعى قىس قىتىمىر مىنەز كورسەتىپ تۇر. بۇرىندا بوران ءبىر كۇن, ءبىر ءتۇن, ءارى كەتسە ەكى كۇن سوعىپ تىنىشتالا قالار ەدى. بۇل جولى اپتاعا تايادى. بوران باسىلعانىمەن, وبلىستىڭ تاۋلى ايماقتارىندا كوشكىن ءتۇسۋ قاۋپى جانە ءتونىپ تۇر. جالپى, وسى كۇندەرى شۇعىل شارۋا بولماسا, جولعا شىقپاعان ءجون. ساياحاتتاپ, تاۋعا شىعۋدى دا كەيىنگە قالدىرۋ كەرەك. ەگەر شۇعىل جولعا شىعۋ قاجەت بولسا, كۇرەك, جانارماي, جىلى جامىلعى, تەلەفون قۋاتتاعىش, قول شام سەكىلدى دۇنيەلەردى مىندەتتى تۇردە الىپ الىڭىز. ءىشىپ-جەم, ىستىق شاي قۇيىلعان تەرموس تا جانىڭىزدا بولسىن. ال تەلەفونىڭىزعا نەمەسە «دارمەن» قوسىمشاسىنا «جول جابىق» دەگەن حابارلامالار كەلسە, جولعا شىعۋدان بىردەن باس تارتىڭىز. ەسكە سالا كەتسەك, قۇقىق قورعاۋ ورگاندارىنىڭ شەكتەۋىنە باعىنباي, جولعا شىعىپ كەتكەن ازاماتتارعا ايىپپۇل بار. ايىپپۇلدان بۇرىن, بوراندى كۇنى ءوزىڭىزدىڭ, جولاۋشىلاردىڭ ومىرىنە قاۋىپ تونەدى. قۇتقارۋشىلار دا كەز كەلگەن ۋاقىتتا وقيعا ورنىنا جەتە بەرمەۋى مۇمكىن. الدا-جالدا جولعا شىعىپ كەتىپ, قار قۇرساۋىندا قالىپ قويساڭىز, 112 تەلەفون نومىرىنە حابارلاۋعا تىرىسىڭىز. ايتقانداي, «قازگيدرومەت» ورتالىعىنىڭ بولجامىنا سۇيەنسەك, ايماقتا قارلى داۋىلدىڭ سوڭىندا جاۋىن-شاشىن ءتۇسىپ, كوكتايعاق بولۋى مۇمكىن.
شىعىس قازاقستان وبلىسى
