سەناتورلار ماگيسترالدى جىلۋ قۇبىرىن تەكسەرۋ كەزىندە ينجەنەرلىك كوممۋنيكاتسيالاردىڭ جاي-كۇيىن تەكسەردى. دەپۋتاتتار قىس مەزگىلىندە جىلۋ ەنەرگەتيكالىق كومپانيالاردىڭ ۇزدىكسىز جۇمىس ىستەۋىنىڭ ماڭىزدى ەكەنىن اتاپ ءوتتى.
«پارلامەنت سەناتىنىڭ بارلىق دەپۋتاتتارى قازىر پروبلەمالىق نىساندارمەن تانىسۋعا, سونداي-اق تۇرعىنداردى الاڭداتىپ وتىرعان ماسەلەلەردى شەشۋگە كومەكتەسۋ ءۇشىن وڭىرلەردى ارالاپ ءجۇر. تارازدا اپاتتى دەپ تانىلعان نەگىزگى نىساندار – م-1 جانە م-3 جىلۋ قۇبىرلارى بولىپ وتىر. ولاردى جوندەۋدىڭ جالپى قۇنى 14-16 ميلليارد تەڭگەنى قۇرايدى. بىراق ماسەلە وبلىس ورتالىعىنىڭ تۇرعىندارىن جىلۋمەن قامتۋعا قاتىستى ەكەنىن ەسكەرسەك, بۇل جۇمىستى مىندەتتى تۇردە جۇرگىزۋ كەرەك دەپ ەسەپتەيمىن», دەپ اتاپ ءوتتى بەكبولات ورىنبەكوۆ.
كەزدەسۋ بارىسىندا ارنايى كوميسسيا جۇمىسىنىڭ ناتيجەلەرى بويىنشا «تارازەنەرگوتسەنتر» اق-دا جابدىقتىڭ 80%-دان استامى توزعانى تىركەلگەنى جانە وسىعان بايلانىستى جەو-عا «قىزىل» مارتەبە بەرىلگەنى اتاپ ءوتىلدى. سونىمەن قاتار وبلىستا جىلۋ قۋاتىنىڭ تاپشىلىعى ماسەلەسى دە كۇردەلى بولىپ وتىر. جەو مەن قۇبىرلاردىڭ قازىرگى جاعدايىنا قاراساق, ولارعا جاڭا ابونەنتتەردى قوسۋ مۇمكىن ەمەس. مۇنىڭ ءبارى تارازدىڭ جىلۋ قۇبىرلارىنا جاڭعىرتۋ جۇمىستارىن جۇرگىزۋدىڭ ماڭىزدىلىعىن كورسەتەدى.
«بۇل ماسەلەلەردىڭ رەسپۋبليكالىق دەڭگەيدە قارالۋى ءۇشىن قاجەتتى بارلىق قۇجاتتار وتكەن جىلدىڭ ەكىنشى توقسانىندا دايىندالۋى كەرەك بولاتىن. ياعني قۇجاتتار ىستەردىڭ قازىرگى جاي-كۇيى قالىپتى تارتىپتە بولعاندا عانا 2024 جىلدىڭ باسىندا ماقۇلداناتىن ەدى. الايدا بۇگىنگى تاڭدا وبلىس ورتالىعىن جىلۋمەن جابدىقتاۋعا باسىمدىق بەرىلىپ وتىر. سوندىقتان ءبىز بۇل ماسەلەنى شۇعىل تۇردە شەشۋگە كومەكتەسۋگە تىرىسامىز», دەدى سەناتور ءابدالى نۇراليەۆ.
سونداي-اق سەناتورلار وبلىس ورتالىعىنىڭ «بارىسحان» تۇرعىن الابىنداعى جاڭا مەكتەبىنە دە بارىپ, تالاس وزەنى ارقىلى وتەتىن كوپىردىڭ جاي-كۇيىمەن جانە جاعالاۋدى نىعايتۋ جۇمىستارىمەن تانىستى.
