فۋتبول. قازاقستان قۇراماسى ۆەنگريادان ۇتىلىپ قالدى

استانا. 8 ماۋسىم. كەشە بۋداپەشت قالاسىندا فۋتبولدان قازاقستان قۇراماسى ۆەنگريا كومانداسىمەن جولداستىق كەزدەسۋ وتكىزىپ, 0:3 ەسەبىمەن ۇتىلىپ قالدى. بۇل تۋرالى Sports.kz حابارلادى. ويىن ماديار جانكۇيەرلەرىنە ۇلتتىق كوماندانىڭ ەۋروپا بىرىنشىلىگىنىڭ ىرىكتەۋ ماتچتارىنا قانشالىقتى دايىن ەكەنىن كورسەتۋگە ءتيىستى بولسا, قازاقستان قۇراماسى ءۇشىن ونىڭ جاڭا جاتتىقتىرۋشى يۋري كراسنوجانمەن بولاشاعى قالاي قالىپتاساتىنىن بايقاتۋى كەرەك ەدى. قازاقستاندىقتاردىڭ ستارتتىق قۇرامى پالەندەي جاڭالىق بولىپ كورىنگەن جوق. ويىنشىلاردى الاڭعا كوماندا كاپيتانى اندرەي فينونچەنكو باستاپ شىقتى. ولار كەزدەسۋدىڭ 3-مينۋتىندا-اق بۇرىشتاما بەرۋ قۇقىعىنا يە بولدى. ايىپ دوبىن فينونچەنكو ورتاعا جەتكىزدى. ونى سەرگەي حيجنيچەنكو ادەمى قيمىلمەن قاقپاعا ۇرۋعا تىرىستى. بىراق ناتيجە شىقپادى. ۆەنگەرلەر بۇعان سول قاناتتان جارىپ ءوتۋ ارقىلى جاۋاپ قايتاردى. ميحاي كورحۋت سونىڭ ەكپىنىمەن ايىپ الاڭىنا دوپ اسىردى. ونى قوناقتار قايتارىپ ۇلگەردى. ال وسى دوپتى ادام ديۋرچو قايتادان ايىپ الاڭىنا جەتكىزگەندە, بالينت ۆەچەي باسىمەن قاقپاعا ۇردى. ايتكەنمەن, سوققى تۋرا بارعان جوق. الاڭ يەلەرىنىڭ قىسىمى وسىدان باستاپ ارتا ءتۇستى. سول قىسىمعا شىداماعان رەنات ابدۋلين مەن ۆالەري كوروبكين اقىرى ەسكەرتۋ الىپ تىندى. مۇنىڭ ارعى جاعى العاشقى گولعا ۇلاستى. ۆەنگەرلەر بۇرىشتامادان دوپ بەرگەندە, قورعانىستىڭ ورتا شەبىندەگى الەكساندر كيسليتسىن ءوزىنىڭ «باعىمىنداعى» تاماش پريشكيننەن كوز جازىپ قالدى. سول-اق ەكەن ماديار شابۋىلشىسى اندرەي سيدەلنيكوۆ قورعاعان قاقپانىڭ تورىن بۇلك ەتكىزدى. وسىلايشا ويىننىڭ 26-مينۋتىندا ەسەپ اشىلدى. مۇنىڭ ارتىنان قازاقستاندىقتار شابۋىلعا كوشتى. سول الاقۇيىن بارىسىندا ايىپ الاڭىنا اپتىعا كىرگەن كوروبكين قاقپاعا جەرلەتىپ دوپ باعىتتادى. ونىسى قاقپاشى دانيەل روزسانىڭ قولىنان تابىلدى. سوسىن مارات حايرۋللين ايىپ دوبىن ۇردى. الايدا, بۇل دوپ قاقپادان ەداۋىر الشاق كەتتى. ال تايم سوڭىندا پريشكين تاعى دا ءوزىنىڭ بار ەكەنىن بايقاتىپ ءوتتى. ونىڭ ايىپ الاڭىنا الىپ كىرگەن دوبىنا رولاند ۆارگا ءسال جەتپەي قالدى. قازاقستان فۋتبولشىلارى ەكىنشى تايمنىڭ باسىن دا شابۋىلمەن وتكەردى. بۇل ءوز كەزەگىندە ۆەنگەرلەردى دە ۇدەرە كوتەردى. ولار ءبىرىنشى بولىپ بۇرىشتاما دوبىن دا بەردى. بۇرىشتان جەتكەن دوپ ءابدۋليننىڭ اياعىنانا سيدەلنيكوۆتىڭ قولىنا باردى. وسى تۇستا كوروبكيننىڭ جۇيكەسى تاعى دا سىر بەرىپ قويدى. وسىدان ەكىنشى مارتە ەسكەرتۋ العان ول الاڭنان كەتۋگە ءماجبۇر بولدى. مۇنىمەن دە تىنبادى. وسىعان بايلانىستى بەرىلگەن ايىپ سوققىدان ۆەنگەرلەر 63-مينۋتتا ۆەنگەرلەر ەكىنشى گولدارىن سوعىپ كەتتى. اۋەلى ۆارگا دوپتى «قابىرعادان» اسىرىپ تاستادى. ونى سيدەلنيكوۆ ۇستاپ قالا المادى. الا باۋىر دوپ قاقپانىڭ ىشىنەن ءبىر-اق شىقتى. بۇدان كەيىن كراسنوجان جاساعان بىرنەشە الماسۋشىلىق تا كوماندانىڭ جاعدايىن جاقسارتقان جوق. بۇعان كەرىسىنشە, قوناقتار ويىننىڭ ەڭ سوڭىندا, 90-مينۋتتا ءوز قاقپالارىنا ءۇشىنشى دوپتى وتكىزىپ الدى. ونى كونستانتين ەنگەل ءوز تورىنا قاراي سۇڭگىتىپ جىبەردى. دامير قوجامقۇل. دەرەككوز: Sports.kz. فوتو: Sports.kz.