ء«بىز بىرگەمىز Fest» ءىس-شاراسىندا ەلىمىزدىڭ بارلىق وڭىرلەرىنەن كەلگەن دارىندى بالالار مەن مۇمكىندىگى شەكتەۋلى جاستار باس قوستى. كونتسەرت بالالار جىلى اياسىندا ۇيىمداستىرىلدى جانە ەرەكشە قاجەتتىلىكتەرى بار بالالاردى قولداۋعا ارنالعان.
ءىس-شاراعا پارلامەنت سەناتىنىڭ توراعاسى ماۋلەن اشىمباەۆ قاتىستى. ول ءوز سوزىندە بالالاردىڭ ءال-اۋقاتى, ولاردىڭ ينتەللەكتۋالدىق, شىعارماشىلىق جانە رۋحاني دامۋى ۇلتىمىز ءۇشىن ماڭىزدى باسىمدىقتار ەكەنىن ايتتى.
«قازىرگى تاڭدا ەلىمىزدە مەملەكەتتىڭ الەۋمەتتىك ساياساتىنىڭ باسىمدىقتارى تۋرالى تۇسىنىك وزگەرىپ جاتىر. ادىلەتتى قازاقستان دەگەنىمىز - ەڭ الدىمەن, ينكليۋزيۆتى قازاقستان. ءبىز كومەككە مۇقتاج ءار ازامات, ءار بالا مەملەكەتتىڭ قامقورلىعىن سەزىنۋگە ءتيىس قوعام قۇرىپ جاتىرمىز. مەملەكەت باسشىسى قاسىم-جومارت كەمەل ۇلى توقاەۆ وسىنداي مىندەت جۇكتەپ وتىر. سوندىقتان مەملەكەت ەرەكشە قاجەتتىلىگى بار ادامداردى قولداپ, كەدەرگىسىز ورتا جانە ينكليۋزيۆتى قوعام قالىپتاستىرۋ ءۇشىن ءتيىستى جۇمىستى جالعاستىرا بەرەدى», دەدى ماۋلەن اشىمباەۆ.
سونىمەن قاتار سەنات توراعاسى مەملەكەت باسشىسىنىڭ تاپسىرماسى بويىنشا ەلىمىزدە حالىقتىڭ الەۋمەتتىك وسال توپتارىن قولداۋ ءۇشىن بارلىق شارا قابىلداناتىنىن اتاپ ءوتتى. مۇگەدەكتىگى بار ادامدارعا كومەك كورسەتۋگە, دارىندى جاستار مەن بالالاردى قولداۋعا, ءبىلىم بەرۋ جانە دەنساۋلىق ساقتاۋ جۇيەلەرىن نىعايتۋعا باعىتتالعان زاڭدار قابىلدانادى.
پالاتا سپيكەرى فەستيۆالدى ۇيىمداستىرۋشىلار مەن وعان قاتىسۋشىلارعا العىس ايتىپ, بارشا ونەر يەسىنە شىعارماشىلىق جولدا جاڭا جەڭىستەرگە جەتۋگە تىلەكتەستىگىن ءبىلدىردى.
«بەلگىلى وتاندىق ونەرپازدارمەن ءبىر ساحنادا ونەر كورسەتۋ ەرەكشە ءارى جاس تالانت يەلەرىن ىنتالاندىرا تۇسەتىنى انىق. انشىلەرگە شىعارماشىلىق تابىس تىلەيمىن. بۇگىنگى كونتسەرتتەن جينالعان قاراجات مۇگەدەكتىگى بار بالالارعا ارنالعان وڭالتۋ ورتالىعىنا جابدىق ساتىپ الۋعا جۇمسالادى. مۇنىڭ ءبارى ونەر كەز كەلگەن كەدەرگى مەن تاپتاۋرىنداردى بۇزىپ, يگى ىستەر جولىندا بارلىعىن بىرىكتىرە تۇسەتىنىن كورسەتەدى», دەدى ماۋلەن اشىمباەۆ.
فەستيۆال اياسىندا كەنجەبەك نۇردولداي, SENSITIVE بي توبى, التىنشاش مۇقاتاەۆا سىندى ەرەكشە قاجەتتىلىگى بار مۋزىكانتتار مەن بيشىلەر ونەر كورسەتتى. سونداي-اق ايگىلى ءانشى ديماش قۇدايبەرگەن, ەسترادا جۇلدىزدارى: تامارا اسار, نازيما, «باستاۋ» توبى, Aidyn جانە تاعى باسقالارى ءوز ونەرلەرىن كورەرمەندەردىڭ نازارىنا ۇسىندى.
شارانى Biz Birgemiz Qazaqstan قوعامدىق قورى جانە استانا قالاسىنىڭ اكىمدىگى ۇيىمداستىردى.
