تاعلىم

س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە قۋعىن-سۇرگىن قۇرباندارىن ەسكە الۋ كۇنى اياسىندا وتكەن «الاش رۋحىنا تاعزىم» اتتى ءداستۇرلى جوبانىڭ ورنى بولەك. بۇلاي بولۋى ابدەن زاڭدى. اقيىق اقىن, جازۋشى, قوعام جانە مەملەكەت قايراتكەرى ەسىمىنە يە وقۋ ورنىنىڭ 12 مىڭ ستۋدەنتى قول قويعان ۇندەۋ بويىنشا س.سەيفۋلليننىڭ 120 جىلدىعىنا وراي بيىلعى جىلدى ساكەن جىلى دەپ اتاپ ءوتۋ تۋرالى باستاما كوتەرىلىپ وتىر. ايتا كەتۋ كەرەك, جوبا اياسىندا ۋنيۆەرسيتەت ستۋدەنت­تەرى­نىڭ «اق جەلكەن» تەاترى قاتىسۋىمەن اقىن عازيز ەش­تاناەۆتىڭ تۋىندىسى نەگى­زىندە تەاتر جانە كينو اكتە­رى قۋاندىق قىستىقباەۆ ساح­نالاعان «جولايرىق» سپەك­تاكلىنىڭ تۇساۋى كەسىلدى. قالا­لىق, وبلىستىق جانە رەس­پۋب­ليكالىق بايقاۋلاردا جەڭىمپاز اتانعان ونەر ۇجىمى اقىننىڭ ومبىداعى قازاق جاستارىنىڭ «بىرلىك» قاۋىمىن قۇرعان ساتىندەگى ىشكى جان تەبىرەنىسىن وتە شىنايى بەينەلەپ جەتكىزدى. ساكەن ءرولىن ۆەتەريناريا جانە مال شارۋاشىلىعى فا­كۋلتەتىنىڭ 4-كۋرس ستۋدەنتى باۋىرجان جاقسىباەۆ, ماع­جان بەينەسىن ەكونوميكا فاكۋل­تەتىنىڭ 3-كۋرس ستۋدەنتى الىبەك مىرزاقۇلوۆ نانىمدى سومداپ, الاش ارداقتىلارىنىڭ رۋحى اسقاقتاتىلدى. كەشەگى زوبالاڭ جىلدار جاڭ­عىرىعى ءدال قازاق حال­قىن­داي جەر بەتىندە ازاپ شەككەن باسقا بىردە-ءبىر ۇلت جوقتىعىن ايعاقتاسا, تاريحي شىندىقتار جاپپاي قۋعىن-سۇرگىن ىلا­ڭى­نان ەلىمىزدە 100 مىڭنان استام ادامنىڭ ايدالىپ, ال 25 مىڭنان استامىنىڭ جازىقسىز اتۋ جازاسىنا كەسىلگەنىن تاي­عا تاڭبا باسقانداي ناقتى­لاي­دى. وكىنىشكە قاراي, تالاي اسىلدارىمىز بەن ارلاندا­رى­مىز تەرىس ساياساتتىڭ قۇر­با­نى­نا اينالىپ, 1937-38 جىل­دارى ەلىم دەپ ەڭىرەگەن ەر­لەرگە «حالىق جاۋى» اتى تا­ڭىلعانى ءوز الدىنا جاراسى بولەك قاسىرەت. كوزى اشىق, كو­كىرەگى وياۋ اقىن-جازۋشىلار مەن بيلىك باسىنداعى ازامات­تار­دىڭ قۋعىن-سۇرگىنگە ۇشى­راپ, بالالارى جان-جاق­قا توز-توز بولىپ كەتكەنى تۋرا­سىن ايتقاندا, عاسىرلار تۇڭ­عيىعىنان جاس ۇرپاققا ءالى دە كوپ سىر بۋىلىپ شىعا الماي جاتقانىن سەزدىرەدى. تالاي وتباسىنىڭ شاڭىراعى ورتاسىنا ءتۇسىپ, قاسىرەت جۇتقان حالىقتىڭ كوكەيىندەگى قايعىلى مۇڭ تولىقتاي اق قاعازدىڭ بەتىنە ءتۇسىپ, تاريحتىڭ تاعىلىمدى ىزدەرى تۇگەندەلىپ ءبىتتى دەۋگە ءالى ەرتەرەك. سونىڭ ىشىندە الاش زيالىلارىنا جاستار تاراپىنان قويىلىپ جاتقان رۋحاني ەسكەرتكىشتىڭ ەڭسەسى وزگە ارەكەتتەرگە قا­راعاندا الدەقايدا بيىك ءھام تاعىلىمى بولەك ۇلگى دەپ تۇسىنەمىز. ءاليحان بوكەيحانوۆ, احمەت بايتۇرسىنوۆ, مىرجاقىپ دۋلاتوۆ, تەمىربەك جۇرگەنوۆ, وراز جاندوسوۆ, جىردىڭ ءۇش بايتەرەگى – ساكەن, ءىلياس, بەيىمبەت رۋحىمەن جىگەرلەنگەن ستۋدەنت-جاستاردىڭ ۇندەۋىندە: «وتانىن سۇيەتىن, ونىڭ تاري­حىن دارىپتەيتىن ءبىز سياقتى پاتريوت جاستاردى اعا بۋىن­نىڭ جاسامپاز ەرلىكتەرىن ماق­تان تۇتىپ, مەملەكەتىمىزدىڭ بەرىك تۇتقاسى بولۋعا شاقى­رامىز. ساكەن مۇراسىن ناسي­حات­تاۋعا ۇندەگەن ءبىزدىڭ وسى باستامامىزدى رەسپۋبليكا بويىنشا بارلىق جاستار قاۋىمى, جەرگىلىكتى ۇيىمدار, ءبىلىم وردالارى ازاماتتىق بەلسەندىلىكپەن قولداپ, اتسا­لىسادى دەگەن ۇمىتتەمىز» دەلىنگەن. كەيىنگى وسكەلەڭ ۇرپاقتىڭ الاش زيالىلارى رۋحىنا دەگەن سۇيىسپەنشىلىگى مەن بەلسەندىلىگىنەن ازاتتىق تاڭىن اڭساپ وتكەن سول بابالار ارمانى بۇگىندە قىردىڭ قىرمىزى گ ۇلىندەي قاۋلاپ وسكەن جاستاردىڭ جۇرەگىندەگى جالىن-وتقا اينالىپ بارا جاتقانىن كورەسىز. ستۋدەنتتەر ءۇنى مارەگە جەتپەي ماڭگىلىك ساپارعا اتتانعان سايگ ۇلىكتەر ءدۇبىرىنىڭ جاڭعىرىقتارىن قۇلاعىمىزعا كەلتىردى. ەسكە الۋ كەشىندە پارلامەنت ءماجىلىسىنىڭ دەپۋ­تاتى باقىتبەك سماعۇلوۆ, قا­زاق اگروتەحنيكالىق ۋني­ۆەرسيتەتىنىڭ ءبىرىنشى پرو­رەكتورى, پروفەسسور ايتجان ءابدىروۆ ءسوز سويلەدى. ۇلت جاناشىرلارى, الاشتانۋشى عالىمدار ويى ارۋاقتار قۇر­مەتىنە جايىلعان داستارقاندا جالعاسىپ, ۇلت ۇلدارىنا با­عىشتالىپ قۇران وقىلدى. قاراشاش توقسانباي, «ەگەمەن قازاقستان».