جۇمىس ساپارى بارىسىندا ءاليحان سمايىلوۆ جالپى قۋاتى 197 مىڭ توننادان اساتىن «Orda Glass Ltd» شىنى ءوندىرۋ زاۋىتىنىڭ جۇمىسىمەن تانىستى. كاسىپورىن بيىلعى قازان ايىندا «قازاقستاندىقتاردىڭ ءال-اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ» ۇلتتىق جوباسى اياسىندا ىسكە قوسىلدى. مەملەكەتتىك قولداۋ شارالارى رەتىندە وعان قاجەتتى ينجەنەرلىك ينفراقۇرىلىم, اۆتو جانە تەمىرجولدار جۇرگىزىلدى. قازىرگى ۋاقىتتا زاۋىتتا 370 ادام جۇمىس ىستەيدى. ءونىم رەسپۋبليكانىڭ باسقا وڭىرلەرىنە جىبەرىلەدى, ەكسپورتقا شىعارۋ جوسپاردا بار.
پرەمەر-ءمينيستردىڭ ايتۋىنشا, شىنى زاۋىتىنىڭ ىسكە قوسىلۋى قىزىلوردا وبلىسىندا عانا ەمەس, بۇكىل قازاقستان بويىنشا قۇرىلىس يندۋسترياسىنىڭ دامۋىنا سەرپىن بەرەدى.
«مۇنداي وندىرىستەر قۇرىلىس شىعىندارىن جانە يمپورتقا تاۋەلدىلىكتى ايتارلىقتاي تومەندەتۋگە مۇمكىندىك بەرەدى. بيىل ونەركاسىپتە 160 جاڭا جوبا ىسكە قوسىلدى. ۇكىمەت ءوز تاراپىنان وسىنداي كاسىپورىندارعا بارلىق قاجەتتى كومەك كورسەتۋدى جالعاستىرۋعا دايىن», دەدى ءاليحان سمايىلوۆ.
بۇدان وزگە پرەمەر-مينيستر قۋاتى جىلىنا 33 مىڭ توننادان اساتىن «ماعجان جانە ك» جشس كۇرىش وڭدەۋ زاۋىتىندا بولدى. كاسىپورىن زاماناۋي جوعارى تەحنولوگيالىق قۇرال-جابدىقتارمەن جابدىقتالعان جانە بىرىڭعاي اۆتوماتتاندىرىلعان جۇيە ارقىلى باسقارىلادى.
سونىمەن قاتار ۇكىمەت باسشىسى ىشكى نارىققا جانە ءىشىنارا ەكسپورتقا جىبەرىلەتىن يودتالعان تەحنيكالىق جانە اس تۇزىن وندىرەتىن «اسسول» زاۋىتىندا بولدى. 2021 جىلى كومپانيا ونىمدەر مەن قىزمەتتەردىڭ ساپاسى بويىنشا پرەزيدەنتتىڭ «التىن ساپا» سىيلىعىنىڭ جەڭىمپازى بولىپ تانىلعان.
ءاليحان سمايىلوۆ قىزىلوردا وبلىسىنىڭ رەسپۋبليكا بويىنشا كۇرىشتىڭ نەگىزگى ءوندىرۋشىسى ەكەنىن (90%) جانە تۇز ءوندىرۋ بويىنشا دا جەتەكشى ورىندا (97%) تۇرعانىن اتاپ ءوتتى. بيىل ءوڭىردىڭ اوك سالاسىنا قۇيىلعان ينۆەستيتسيالارى 8,5%-عا ءوستى, 250 جاڭا جوبا ىسكە اسىرىلىپ جاتىر. وسى ورايدا, ۇكىمەت باسشىنىڭ ايتۋىنشا, ەلىمىز ءوزىن ازىق-ت ۇلىك تاۋارلارىمەن تولىق قامتاماسىز ەتۋى كەرەك.
جۇمىس ساپارى بارىسىندا ۇكىمەت باسشىسى ءوڭىردىڭ اۋىل شارۋاشىلىعى قۇرىلىمدارىنىڭ باسشىلارىمەن كەزدەسۋ وتكىزدى. اگراريلەر سالانىڭ بىرقاتار ماسەلەسىن, سونىڭ ىشىندە سۋارمالى سۋمەن قامتاماسىز ەتۋ جانە كۇرىش وسىرۋشىلەردىڭ زاماناۋي اۋىل شارۋاشىلىعى تەحنيكاسىنا قولجەتىمدىلىگىن كەڭەيتۋ ماسەلەلەرىن اتاپ ءوتتى. ءاليحان سمايىلوۆ اۋىل شارۋاشىلىعى تاۋارىن وندىرۋشىلەردى مۇقيات تىڭداپ, اوك-ءتىڭ پروبلەمالىق ماسەلەلەرىن شەشۋ ۇكىمەتتىڭ نازارىندا ەكەنىن اتاپ ءوتتى.
«مەملەكەت اۋىل شارۋاشىلىعى سالاسىنا ۇلكەن قارجىلىق قولداۋ كورسەتەدى. دەگەنمەن وندىرۋشىلەر دە ءوز تاراپىنان حالىققا ساپالى جانە قولجەتىمدى ازىق-ت ۇلىك تاۋارلارىن ۇسىنۋى قاجەت», دەدى پرەمەر-مينيستر.
