الەم جاڭالىقتارى
دەسانت تۇسىرىلگەنىنە – 70 جىل كەشە فرانتسيادا ەكىنشى دۇنيەجۇزىلىك سوعىستا وداقتاستار ارمياسىنىڭ نورماندياعا دەسانت ءتۇسىرۋىنىڭ 70 جىلدىعىنا ارنالعان ءىس-شارالار ءوتتى. وعان اقش پرەزيدەنتى باراك وباما, ۇلىبريتانيا پرەمەر-ءمينيسترى دەۆيد كەمەرون جانە كسرو اتىنان رەسەي پرەزيدەنتى ۆلاديمير پۋتين ارنايى بارىپ قاتىستى.
فرانتسيا اۋماعىنداعى نورمانديادا امەريكالىقتاردىڭ 9 مىڭنان استام اسكەريى كوز جۇمعان ەكەن. ولار جەرلەنگەن ورىنعا ب.وبامامەن قاتار, ەل يەسى رەتىندە فرانتسيا پرەزيدەنتى فرانسۋا وللاند تا باردى. ال بۇرىنعى وداقتاستار باسقوسۋىندا حالىقارالىق كۇن تارتىبىندەگى كوكەيكەستى ماسەلەلەر تالقىلاندى. بۇل ورايدا, ۋكراينانى وڭالتۋ ماسەلەلەرى دە اڭگىمە ارقاۋىنا اينالدى.
باشار اساد – كەزەكتى مارتە پرەزيدەنت
سيريادا پرەزيدەنت سايلاۋى بولىپ ءوتتى. وندا ەلدىڭ قازىرگى باسشىسى باشار اساد سەنىمدى جەڭىسكە قول جەتكىزىپ, قاتارىنان ءۇشىنشى مارتە سيريا پرەزيدەنتىنىڭ ورىنتاعىنا وتىراتىن بولدى.
ب.اسادتى جاقتاپ, ەل ازاماتتارىنىڭ 90 پايىزى ءوز داۋىستارىن بەرگەن.
بۇل تۋرالى سيريا پارلامەنتىنىڭ سپيكەرى موحاممەد ءال-لاحام حابارلادى. «مەن سيريا اراب رەسپۋبليكاسىنداعى پرەزيدەنت سايلاۋىندا باشار حافەز ءال-اسادتىڭ جەڭىسكە جەتكەنىن جاريا ەتەمىن. ول داۋىستاردىڭ ءابسوليۋتتى باسىمدىعىن الدى», دەپ مالىمدەدى ءال-لاحام. باتىس ەلدەرى بۇل سايلاۋدىڭ قورىتىندىسىن مويىندامايتىندارىن ءبىلدىرىپ وتىر.
ەلىندە ءۇش ايدا ءتارتىپ ورناتپاق
ۋكراينانىڭ جاڭادان سايلانعان پرەزيدەنتى پەتر پوروشەنكو ەلىندەگى جاعدايدى رەتكە كەلتىرۋدىڭ جوسپارىن دايىنداپ جاتقانعا ۇقسايدى. بۇل تۋرالى كەشە «كوممەرسانت» گازەتى جازدى. وعان قاراعاندا, پوروشەنكو ءوزىنىڭ جوسپارىن يناۋگۋراتسيادان كەيىن جاريا ەتپەكشى ەكەن.
باسىلىمعا حابارلاعان دەرەك كوزدەرىنىڭ ايتۋلارىنشا, جوسپار ءۇش بلوكتان تۇراتىن كورىنەدى: ەل ىشىندەگى ۇنقاتىسۋ, حالىقارالىق ۇنقاتىسۋ جانە رەسەيمەن كەلىسسوزدەر جۇرگىزۋ. پولشا پرەزيدەنتى اكىمشىلىگىنىڭ باسشىسى يارومير سوكولوۆسكيدىڭ سوزىنە قاراعاندا, ۋكراينادا پولياك تاجىريبەسى پايدالانىلاتىن جەرگىلىكتى ءوزىن-ءوزى باسقارۋ رەفورماسى جۇزەگە اسىرىلۋى ىقتيمال.
قىسقا قايىرىپ ايتقاندا: *كانادادا ءۇش پوليتسيا قىزمەتكەرىن ءولتىردى دەگەن كۇدىكپەن 24 جاستاعى دجاستين بۋرك قاماۋعا الىندى. ونى ۇستاۋعا بىرنەشە جۇزدەگەن پولەيتسەيلەر جۇمىلدىرىلىپتى. وپەراتسيا كەزىندە مونكتون قالاسىنداعى مەكتەپتەر مەن مۋنيتسيپالدى مەكەمەلەر ۋاقىتشا جابىلىپ, قوعامدىق كولىك توقتاتىلعان. اقش-تىڭ سيەتل قالاسىنداعى ستۋدەنتتەر قالاشىعىنىڭ اۋماعىندا اتىس بولىپ, ءبىر ادام وققا ۇشسا, ۇشەۋى جارالانعان. پوليتسيا ادام ولىمىنە كىنالىنى تۇتقىنداپ ۇلگەرگەن. وقيعا تابيعي عىلىمدار فاكۋلتەتىنىڭ عيماراتىندا ورىن السا, وق جۇمساۋدىڭ ەگجەي-تەگجەيلى سەبەبى ازىرشە بەلگىسىز. *تاتارستاننىڭ تايف ينۆەستيتسيالىق-ونەركاسىپتىك توبى سولتۇستىك كورەيا اۋماعىندا جانارماي قۇيۋ ستانسالارىنىڭ جەلىسىن سالۋعا قاتىسۋى ىقتيمال. بۇل تۋرالى قيىر شىعىستى دامىتۋ جونىندەگى مينيستر الەكساندر گالۋشكا مالىمدەپ وتىر. باعدارلامانىڭ كولەمى تۋرالى اڭگىمە قوزعالمايدى. اتىشۋلى ۆلاديمير جيرينوۆسكي سەركەسى بولىپ تابىلاتىن رەسەيدىڭ ليبەرال-دەموكراتيالىق پارتياسىنان مەملەكەتتىك دۋماعا دەپۋتات رومان حۋدياكوۆتى داعىستان تۋمالارى سوققىعا جىعىپ كەتىپتى. وقيعا ماسكەۋ كوشەلەرىنىڭ بىرىندەگى جول جانجالى كەزىندە ورىن العان. ەندى دەپۋتات ءوزىن رەنجىتكەندەردەن 2 ميلليون رۋبل تالاپ ەتپەك. *داعىستاننىڭ احتىن اۋدانىندا بولعان جول-كولىك وقيعاسى سالدارىنان مەكتەپ ديرەكتورى مەن مۇعالىم قازا تاپسا, ءۇش وقۋشى ايتارلىقتاي دەنە جاراقاتتارىن الىپ, جانساقتاۋ بولىمىنە تۇسكەن. مۇعالىمدەر مەن وقۋشىلاردى ەمتيحانعا الىپ كەلە جاتقان اۆتوبۋس وزەن شاتقالىنا قۇلاپ كەتكەن.
ىنتىماقتاستىققا قارسى اقش پرەزيدەنتى باراك وباما فرانتسيانىڭ رەسەيمەن اسكەري سالادا ىنتىماقتاسقانىن قالامايتىنىن ءبىلدىردى. بۇل تۋرالى ول بەلگيانىڭ استاناسى – بريۋسسەلدە وتكەن ۇلكەن جەتىلىك ءسامميتىنىڭ قورىتىندىسىنا ارنالعان ءباسپاسوز ءماسليحاتى بارىسىندا ايتقان. «ماسكەۋگە «ميسترال» تىكۇشاق تاسىعىشىن ساتۋعا قاتىستى ءوزىمنىڭ كۇدىگىم بار ەكەنىن جاسىرمايمىن. وسى ءىستى توقتاتا تۇرساڭىز قايتەدى؟», دەپ قايىرىلىپتى ول ءوزىنىڭ فرانتسۋزدىق ارىپتەسى فرانسۋا وللاندقا. وبامانىڭ پىكىرىنشە, «ءميسترالدى» ساتپاي توقتاتا تۇرۋ رەسەيگە قىسىم كورسەتۋدىڭ ءبىر پاراسى بولىپ تابىلادى. ال تىكۇشاق تاسىعىش ساتۋ تۋرالى كەلىسىم دميتري مەدۆەدەۆ پرەزيدەنت بولىپ تۇرعان كەزدە جاسالسا كەرەك. يراندا پويىزدار سوقتىعىسىپ قالدى
كەشە, يراننىڭ سولتۇستىگىندە جولاۋشىلار پويىزى جۇك تاسيتىن پويىزبەن سوقتىعىسىپ قالعان. كەم دەگەندە 10 ادام قازا تاپسا, ونداعان ادام جارالانعان. بۇل تۋرالى «رەيتەر» اگەنتتىگى حابارلادى. اپات دامگان ستانساسىندا جەرگىلىكتى ۋاقىت بويىنشا كەشكى ساعات 23.00-دە بولعان.
مەشحەد قالاسىنان ەل استاناسى – تەھرانعا باعىت الىپ كەلە جاتقان پويىزدا شامامەن 340 جولاۋشى بولىپتى. بيلىكتەگىلەر وپات بولعاندار سانى ارتۋى مۇمكىن ەكەنىن ايتادى. ويتكەنى, جارالانعانداردىڭ تورتەۋىنىڭ جاعدايى اسا مۇشكىل كورىنەدى. وقيعا بويىنشا تەرگەۋ امالدارى باستالسا, اپاتتىڭ نە سەبەپتى ورىن العانى ازىرشە بەلگىسىز.
ەكسترەميستىك پيعىلى ءۇشىن ايىپتالدى
سوت ەكاتەرينبۋرگ قالاسىندا «ورىس مارشىن» ۇيىمداستىرماقشى بولعان ماكسيم ۆاحروموۆتى ەكسترەميستىك ارەكەتكە كىنالى دەپ تاپتى. رەسەيدىڭ سۆەردلوۆ وبلىسى بويىنشا تەرگەۋ كوميتەتىنىڭ سايتىندا وعان جازا رەتىندە 280 ساعات تۇرىندەگى مىندەتتى جۇمىس بەلگىلەنگەنى ايتىلادى.
سايتتاعى اقپاراتقا قاراعاندا, ۆاحروموۆ 2012 جىلدىڭ قازان ايىندا ءوزىنىڭ الەۋمەتتىك جەلىدەگى پاراقشاسىنا تەرگەۋ ورىندارى مەن سوتتىڭ پىكىرىنشە, دۇشپاندىق پەن ۇلتارالىق جانجال وتىن جاعۋعا باعىتتالعان ماتەريالدى ورنالاستىرىپتى. وسىلايشا ورىستاردى «مارشقا» شاقىرعان ۇلتشىلسىماققا ەسكەرتۋ تۇرىندە بولسا دا جازا قولدانىلىپ وتىر.
ينتەرنەت ماتەريالدارى نەگىزىندە ازىرلەندى.
