وتانداسىمىز ەۋروپاداعى قاۋىپسىزدىك جانە ىنتىماقتاستىق ۇيىمىندا جوعارى لاۋازىمعا تاعايىندالدى

استانا. 6 مامىر. قازاقستاندىق ديپلومات ءمادينا جاربوسىنوۆا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ادام ساۋداسىنا قارسى ارنايى وكىلى بولىپ بەكىتىلدى. بۇل تۋرالى «قازاقستان جاڭالىقتارى» حابارلادى. وسى تاعايىنداۋ جونىندە سىرتقى ىستەر مينيسترلىگىنە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ باس حاتشىسى لامبەرتو زاننەردەن ارنايى حات كەلگەن. ءمادينا جاربوسىنوۆا – كاسىبي ديپلومات, 1998-1999 جىلدارى ۆيتسە-مينيستر قىزمەتىندە بولدى. كەيىن ءتورت جىل بويى بۇۇ-داعى قازاقستاننىڭ تۇراقتى وكىلى جانە ەلىمىزدىڭ كۋباداعى ەلشىسى رەتىندە جۇمىس ىستەدى. قازاقستانعا ورالعاننان كەيىن, ول سىرتقى ىستەر مينيسترلىگىنىڭ ەرەكشە تاپسىرمالار بويىنشا ەلشىسى قىزمەتىنە تاعايىندالىپ, ادام قۇقىقتارى مەن ادامي ولشەمدەر ماسەلەلەرىمەن اينالىسقان. ال 2012 جىلدىڭ مامىرىندا ۋكرايناداعى ەقىۇ جوبالارىنىڭ ۇيلەستىرۋشىسى ءارى وسى ەلدەگى اتالعان ۇيىم ميسسياسىنىڭ  باسشىسى بولىپ تاعايىندالدى. ءمادينا جاربوسىنوۆانىڭ اتالعان قىزمەتكە بەكىتىلۋىنە  ەلىمىزدىڭ ەقىۇ قۇرىلىمىندا جوعارى دەڭگەيدە وكىلدىك ەتۋى جانە قازاقستاننىڭ ۇيىمعا 2010 جىلعى توراعالىعىنىڭ جەمىستى قورىتىندىسى ىقپالىن تيگىزىپ وتىر. جولدىباي بازار. دەرەككوز: «قازاقستان جاڭالىقتارى». فوتو: elarna.com.