تامىرلى پاتولوگياسى بار 86 بالا تەگىن ەم الىپ جاتىر

تامىرلى پاتولوگياسى بار بالالار سانىنىڭ وسۋىنە بايلانىستى ەمدەۋ ءىسىن جۇرگىزۋ قازاقستاندا دا، بۇكىل الەمدە دە وزەكتى. وسىعان بايلانىستى، قازاقستان حالقىنا قورى قان تامىرلى پاتولوگياسى بار بالالارعا مەديتسينالىق كومەك كورسەتۋ بويىنشا قايىرىمدىلىق باعدارلاماسىن ىسكە اسىرىپ جاتىر. ءتيىستى ەمدەۋ قاجەتتى جابدىقتار مەن وسى سالاداعى بىلىكتى ماماندارعا بايلانىستى.

باعدارلاما اياسىندا حالىقتىڭ الەۋمەتتىك وسال توپتارىنان گەمانگيوما دياگنوزى قويىلعان 18 جاسقا دەيىنگى بالالارعا (مۇگەدەك بالالار; كوپ بالالى، از قامتىلعان، تولىق ەمەس وتباسىلاردان شىققان بالالار; مۇگەدەك بالالاردى تاربيەلەپ وتىرعان وتباسىلاردان شىققان بالالار; اتا-انالارىنىڭ بىرىندە مۇگەدەكتىگى بار بالالار) ءدارى-دارمەك بەرىلىپ، لازەرلىك ەمدەۋ قولدانىلۋدا. باعدارلامانى جۇزەگە اسىرۋ ماقساتىندا 20،4 ملن تەڭگە ءبولىندى.

قازىرگى ۋاقىتتا ەم قابىلداپ جاتقان 4 جاسار جانىبەك شىمكەنت قالاسىندا تۇرادى. ول اناسىمەن بىرگە قازان ايىنىڭ سوڭىندا قورعا جۇگىنگەن. ال جاقىندا كلينيكاعا قارالۋعا شاقىرىلدى.

«اياعى مەن تابان جاعىندا پايدا بولعانىندا، ونى گەماتوما دەپ ويلادىق. وزدىگىنەن كەتىپ قالادى دەدىك. بالانىڭ وسۋىنە قاراي ىسىك كولەمى دە ۇلعايدى. مۇندا كەلمەس بۇرىن ماسكەۋگە ەمدەلۋگە ەكى رەت باردىق. وزگەرىس بار، بىراق ءالى دە ەمدەلۋ كەرەك. جانىبەك – باتىر جىگىت، قانشاما ەم الدىق، بارىنەن جاقسى ءوتىپ كەلەدى»، دەيدى جانىبەكتىڭ اناسى مارجان.

ال استانالىق 3 جاسار ءسابينا وسىمەن ءۇشىنشى رەت ەم الىپ جاتىر. بىرنەشە پروتسەدۋرادان كەيىن وڭ وزگەرىستەر بايقالۋدا. 

«قىزىم گەمانگيومامەن دۇنيەگە كەلدى. جەرگىلىكتى ماماندار التى اي كۇتە تۇرىڭىز، وسى ۋاقىت ىشىندە ىسىك ۇلعايۋى مۇمكىن نەمەسە كەتىپ قالۋى مۇمكىن دەدى. بىراق، ءوسىپ وتىردى. سوندىقتان ءبىز «قازاقستان حالقىنا» قورىنا جۇگىنىپ، كومەك الۋدامىز. وسىمەن ءۇشىنشى ايدا ەمدەلىپ جاتىرمىز. ەگەر بۇرىن اياعىندا ۇلكەن قىزىل داق بولسا، لازەردەن كەيىن اقشىلدانا ءتۇستى. ناتيجەسى بار»، دەدى ءسابينانىڭ اناسى گۇلزات.

ايتا كەتسەك، قابىلداۋ مەن ەمدەۋ شارالارى قوردىڭ سەرىكتەسى – ا.قارابەكوۆ اتىنداعى قق الەۋمەتتىك مەديتسينالىق ورتالىعىندا جۇرگىزىلەدى. ورتالىق ديرەكتورى جانە پەدياتر روزا قارابەكوۆانىڭ ايتۋىنشا، كلينيكاعا كەلگەن ناۋقاستاردىڭ 80%-ىندا گەمانگيوما كەزدەسەدى. قاتەرسىز ىسىك بولعانىمەن، جىلدام ءوسۋ كەزىندە جانە كۇتۋ تاكتيكاسى قولدانىلعان جاعدايدا اۋىر كوسمەتيكالىق دەرتتىڭ دامۋىنا اكەلۋى مۇمكىن. 

«بۇگىندە ەلىمىزدە وسى پاتولوگيانى ەمدەۋمەن ماقساتتى تۇردە اينالىساتىن بەيىندى ماماندار از. وكىنىشكە قاراي، كۇتۋ تاكتيكاسى بار، ونىڭ سالدارى قيىن جاعدايعا اكەپ سوقتىرۋى مۇمكىن. سونىمەن قاتار زاماناۋي لازەرلىك جابدىقتىڭ تاپشىلىعىن كورىپ وتىرمىز. ءارى دەرتتى ەمدەۋدىڭ بىرىڭعاي ءتاسىلى جوق. سوندىقتان ءار جاعداي جەكە قارالادى، ەمدەۋ ۋاقىتى 6 ايدان 8 ايعا دەيىن سوزىلادى. كلينيكامىزدا ارالاس ءادىستى قولدانامىز. ءبىرىنشى كەزەڭدە مەديتسينالىق ەمدەۋ بلوكاتور پرەپاراتىن، اتاپ ايتقاندا، كارديولوگتاردىڭ قاتاڭ باقىلاۋىمەن اتەنولولدى قولدانۋ ارقىلى جۇزەگە اسىرىلادى. ەكىنشى كەزەڭدە كەزەڭ-كەزەڭمەن لازەرلىك وڭدەۋدى قولدانامىز»، دەپ ءتۇسىندىردى روزا قارابەكوۆا.