حالىقارالىق كونفەرەنتسيانىڭ اشىلۋ سالتاناتىندا انكارا قاجى بايرام ۆەلي ۋنيۆەرسيتەتىنىڭ ادەبيەت فاكۋلتەتى, قازىرگى تۇرىك ديالەكتىلەرى مەن ادەبيەتتەرى ءبولىمىنىڭ مەڭگەرۋشىسى M. فاتيح كيريشچيوعلۋ, ەۋرازيا جانە تۇركى الەمى عىلىمي-زەرتتەۋ ورتالىعىنىڭ باسشىسى نادجيە اتا يىلدىز, م.و. اۋەزوۆ اتىنداعى ادەبيەت جانە ونەر ينستيتۋتى تاۋەلسىزدىك داۋىرىندەگى ادەبيەت ءبولىمىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى نۇرداۋلەت ءبابيحان ۇلى اقىش جانە ەلشىلىك قىزمەتكەرى نىشانكۇل قاراتاەۆا ءسوز سويلەدى.
كونفەرەنتسيا بارىسىندا م.و. اۋەزوۆ اتىنداعى ادەبيەت جانە ونەر ينستيتۋتى تاراپىنان مۇحتار اۋەزوۆتىڭ جازعان كىتاپتارى, كيگەن كيىمدەرى جانە سيرەك كەزدەسەتىن سۋرەتتەرىنەن قۇرالعان كورمە ۇيىمداستىرىلدى.
فاتيح كيريشچيوعلۋ ءوزىنىڭ سوزىندە XX عاسىردىڭ باسىندا قازاق ۇلتىنىڭ اسا ءىرى ادەبيەتشىلەرىنىڭ ءبىرى مۇحتار اۋەزوۆكە بيىل 125 جىل تولعان مەرەيتويىنا وراي ۇيىمداستىرىلىپ وتىرعان بۇگىنگى حالىقارالىق كونفەرەنتسيانىڭ انكارا قاجى بايرام ۆەلي ۋنيۆەرسيتەتىندە ءوتىپ جاتقانى ۇلكەن مارتەبە ەكەنىن اتاپ ءوتتى. تانىمال قازاق ادەبيەتىنىڭ كلاسسيگى م. اۋەزوۆ اۋىز ادەبيەتىنىڭ ءتۇرلى جانرلارىندا ماڭىزدى شىعارمالار قالدىرعانىنا نازار اۋدارىپ, ونىڭ شىعارمالارىنىڭ ىشىندەگى ەڭ كۇردەلىسى جانە اتىن الەمگە پاش ەتكەن 15 جىل بويى جازعان «اباي جولى» تاريحي رومان ەپوپەياسى قازىرگى ۇرپاققا وشپەس ءىز قالدىرعان ماڭىزدى شىعارما دەدى.
نادجيە اتا يىلدىز ءوز سوزىندە مۇحتار اۋەزوۆ جانە «ماناس» داستانى تۋرالى ءسوز قوزعاپ, وندا الەمگە ايگىلى قىرعىز جازۋشىسى شىڭعىس ايتماتوۆتىڭ «دۇنيەنىڭ قاي جەرىنە بارساڭ دا قاسىمدا ەكى نارسە بولادى, ءبىرى ماناس, ەكىنشىسى مۇحتار اۋەزوۆ» دەگەن سوزدەرىنە نازار اۋدارىپ, م. اۋەزوۆ تاشكەنتتەگى ورتا ازيا ۇلتتىق ۋنيۆەرسيتەتىنىڭ شىعىستانۋ فاكۋلتەتىندە دوكتورلىق جۇمىسى بارىسىندا «ماناس» داستانىنا قاجەتتى زەرتتەۋ ماتەريالدارىن جيناقتاپ, «قازاق ادەبيەتى» گازەتىندە جاريالاعانىن, كەيىننەن 4 تومنان تۇراتىن «قىرعىز حالقىنىڭ باتىرلىق داستانىنىڭ» جازىلۋ تاريحى جونىندە باياندادى.
ن. ءبابيحان ۇلى اقىش ءوز سوزىندە م. اۋەزوۆتىڭ ەڭبەكتەرىندە قازاق حالقىنىڭ XIX عاسىرداعى مادەني, ساياسي, الەۋمەتتىك جانە تۇرمىستىق رۋحاني ءومىرىن جان-جاقتى كورسەتە بىلگەنىن, جازۋشىنىڭ ادەبي شىعارمالارىنىڭ ءتىلى كۇردەلى ەكەنىن, ونىڭ شىعارمالارى 116 تىلگە اۋدارىلعانىن, جازۋشىنىڭ جازعان ەڭبەكتەرى ورىس تىلىنە اۋدارۋ بارىسىندا كەزدەسكەن ماسەلەلەرگە توقتالىپ ءوتتى.
م. اۋەزوۆ اتىنداعى ادەبيەت جانە ونەر ينستيتۋتى ديرەكتورىنىڭ ورىنباسارى, فيلولوگيا عىلىمدارىنىڭ كانديداتى ءالميرا قاليەۆا ءوزىنىڭ بايانداماسىندا م. اۋەزوۆتىڭ جازۋشى رەتىندە قالىپتاسۋىنا, سول كەزدەگى مادەني, الەۋمەتتىك جانە ساياسي جاعدايلاردىڭ اسەر ەتكەنىن, مۇحتار اۋەزوۆتىڭ ازاماتتىق تۇعىرىنىڭ قالىپتاسۋى مەن قالامىنىڭ ۇشتالۋىنا «اباي» جۋرنالى مەن «سارىارقا گازەتى» ەرەكشە ىقپال ەتكەنىن اتاپ ءوتتى.
