كاسىپكەرلەر ءۇشىن كوكجيەك كەڭ

كاسىپكەرلىك – ەل دامۋىنىڭ نەگىزگى كۇشتەرىنىڭ ءبىرى. دەمەك, وعان قولداۋ جاساۋ – دامۋعا جاسالعان جاعداي. قازاقستان رەسپۋبليكاسى ۇلتتىق كاسىپكەرلەر پالاتاسى تورالقاسىنىڭ توراعاسى ت.ق ۇلىباەۆتىڭ ماڭعىستاۋعا ساپارى بارىسىندا ەلىمىزدە وسى باعىتتا جاسالىپ جاتقان جۇمىستار تۋرالى بىلدىك. ت.ق ۇلىباەۆ ماڭعىستاۋ وبلى­سىنىڭ اكىمى ا.ايدارباەۆتىڭ باس­تاۋىمەن الدىمەن اقتاۋ تەمىر بالقىتۋ زاۋىتىندا بولدى. حالىق­ارالىق ستاندارتتارعا ساي ارماتۋرالار مەن بۇرىشتامالار, شۆەللەرلەر, باسقا دا ونىمدەر وندىرەتىن زاۋىتتا 450 ادام جۇمىسپەن قامتىلعان. ونىمدەرى ەلىمىزدىڭ وزگە وڭىرلەرىمەن بىرگە تۇركيا, يران مەملەكەتتەرىنە تاسىمالداناتىن زاۋىتتىڭ جۇمىسى ءوز ىرعاعىمەن جۇرۋدە. سونداي-اق, ت.ق ۇلىباەۆ كاسپي بيتۋم زاۋىتىنا ايالدادى. كوپشىلىگى شەتەلدەر مەن رەسپۋبليكامىزدىڭ باسقا قالالارىندا ارنايى كۋرستاردان وتكەن 250 ادام زاۋىتتا جۇمىس كورىگىن قىزدىرىپ, اۆتوكولىك جولى ءۇشىن قاجەتتى ونىمدەر شىعارۋدا. كەلەشەكتە رەسەي, ازەربايجان ەلدەرىنە شىعارىلاتىن بيتۋم­نىڭ اقتاۋ زاۋىتىندا ەكى ءتۇرى وندىرىلەتىن بولادى. قازىرگە دەيىن 65 مىڭ توننا مۇناي وڭدەپ ۇلگەرگەن زاۋىت جۇمىسىنا وڭ باعا بەرگەن ت.ق ۇلىباەۆ ودان ءارى ماڭعىستاۋ وبلىسى كاسىپكەرلەر پالاتاسى كەڭەسىنىڭ مۇشەلەرى جانە پالاتانىڭ وكىلدەرىمەن, ايماق كاسىپكەرلەرىمەن كەزدەستى. تورالقا باسشىسى كاسىپ­كەر­لەردى تولعاندىراتىن باستى ماسەلەنىڭ ءبىرى رەتىندە قارجىعا قولجەتىمدىلىك تۋرالى ايتىپ ءوتتى. قازىرگى باستى باعىتتاردىڭ ءبىرى – وڭىرلىك بيزنەس-قاۋىمداستىق ءۇشىن مەملەكەتتىك جانە جەر قويناۋىن پايدالانۋشى ساتىپ الۋشىلار بويىنشا جۇرگىزىلۋى ءتيىس. سونداي-اق, مەملەكەتتىك ساتىپ الۋلار الداعى ۋاقىتتا ۇكىمەت پەن ۇلتتىق كاسىپكەرلەر پالاتاسى اراسىندا قول قويىلاتىن قۇجاتپەن رەتتەلەتىن بولادى. ال جەر قويناۋىن پايدالانۋشىلار بويىنشا ەلىمىزدىڭ يندۋستريا جانە جاڭا تەحنولوگيالار مينيسترلىگىمەن مەموراندۋمعا قول قويىلىپ, وفسەتتىك ساياسات جونىندە تۇراقتى ورگان قۇرۋ جونىندە كەلىسىلگەندىگىن ايتقان ت.ق ۇلىباەۆ ەندى «سامۇرىق-قازىنا» ۇلتتىق ءال-اۋقات قورىمەن كەلىسىمگە كەلۋ جونىندە قول قويۋ جوسپارلانعاندىعىن, ساتىپ الۋلارعا جەرگىلىكتى كومپانيالار ءۇشىن جول اشىلاتىندىعىن, ال وڭىرلىك كەڭەس پەن كاسىپكەرلەر پالاتاسىنىڭ وكىلدەرى كوميسسيا قۇرامىنا كىرەتىندىگىن, وسىلايشا تەندەردىڭ اشىقتىعى كورىنەتىندىگىن ايتتى. ياعني, مەملەكەتتىك ورگاندارمەن جاسالاتىن ۇزاق مەرزىمدى كەلىسىمدەر قازاقستاندىق كاسىپورىندارعا جاڭعىرتۋ جۇرگىزۋگە نەمەسە باسەكەگە قابىلەتتى جاڭا ونىمدەر شىعارۋعا مۇمكىندىك بەرەدى. بۇل رەتتە, ۇلتتىق كاسىپكەرلەر پالاتاسى ۇزاق مەرزىمدى كەلىسىم-شارتتاردىڭ دامۋ جۇيەلەرىنە تىكەلەي قاتىسادى. وڭىردەگى كاسىپكەرلىكتىڭ قار­قىنى, كەمشىلىكتەر مەن ولاردى جويۋ باعىتىنداعى جۇمىس­تار بارىسىمەن تانىستىرعان ماڭعىستاۋ وبلىستىق كاسىپكەرلەر پالاتاسىنىڭ ديرەكتورى ج.دوس­پاەۆتىڭ ايتۋىنشا, قازىرگە دەيىن كاسىپكەرلەر تاراپىنان 70 ارىز-شاعىم تۇسكەن بولسا, ونىڭ 50-گە جۋىعى ءتيىستى ورىندارعا جولدانىپ, ناتيجەسىندە وڭ شەشىمىن تاپقان. جيىن سوڭىندا ماڭعىستاۋ وبلىسى اكىمدىگى مەن وڭىرلىك كاسىپ­كەرلەر پالاتاسى اراسىندا ايماقتا كاسىپكەرلىكتى دامىتۋ جونىندە مەموراندۋمعا قول قويىلدى. گۇلايىم شىنتەمىرقىزى, «ەگەمەن قازاقستان». اقتاۋ. سۋرەتتى تۇسىرگەن سەرىك مايەمەروۆ.