قازاقستان رەسپۋبليكاسى پارلامەنتى سەناتى دەپۋتاتتارىنىڭ كەزەكتى سايلاۋى 2023 جىلعى 14 قاڭتاردا وتەتىنى بەلگىلى. ورتسايلاۋكوم توراعاسىنىڭ مىندەتىن اتقارۋشى كونستانتين پەتروۆ 2022 جىلعى 29 قاراشادان 14 جەلتوقسانعا دەيىن رەسپۋبليكا بويىنشا جوعارعى پالاتانىڭ 20 ورنىنا 130 كانديدات ۇسىنىلعانىن اتاپ ءوتتى. سالىستىرمالى تۇردە الاتىن بولساق, 2020 جىلى سەناتقا كەزەكتى سايلاۋعا – 94 كانديدات, 2017 جىلى – 89 كانديدات, 2014 جىلى – 88, 2011 جىلى 96 كانديدات تىركەلگەن بولاتىن.
وڭىرلەر اراسىندا ەڭ كوپ ۇمىتكەر اباي, باتىس قازاقستان, قىزىلوردا وبلىستارىندا – 8, الماتى مەن استانا قالالارىندا – 10 ادامنان ۇسىنىلدى. ەڭ ازى – 5 ۇمىتكەردەن اقمولا, اقتوبە, الماتى, شىعىس قازاقستان, جامبىل, قوستاناي, پاۆلودار, سولتۇستىك قازاقستان وبلىستارىندا جانە التاۋى شىمكەنت قالاسىندا ۇسىنىلدى. كانديداتتار اراسىندا 97,7 پايىزى (127) ءوزىن ءوزى ۇسىنۋشىلار, ال 2,3 پايىزىن (3) ءماسليحاتتار ۇسىنعان.
كانديداتتاردىڭ ورتاشا جاسى 50,5 جاستى قۇرايدى. ەڭ جاس ۇمىتكەر – 30 جاستا, ۇمىتكەرلەر اراسىنداعى ەڭ ەرەسەگى – 74 جاستا. ۇمىتكەرلەردىڭ 33-ءى – ايەل. ايەل ۇمىتكەرلەر سانى وتكەن سايلاۋدا, ياعني 2020 جىلى – 19, 2017 جىلى – 13, 2014 جىلى 5 ۇمىتكەر بولعان.
ماماندىقتارى بويىنشا اتاپ وتەر بولساق: 22 – ينجەنەر, 21 – ەكونوميست, 21 – پەداگوگ, 18 – زاڭگەر, 15 – اگرارلىق سالا قىزمەتكەرلەرى, 5 – دارىگەر, 2 – جۋرناليست, 3 – ساياساتتانۋشى جانە 23 باسقا ماماندىق يەلەرى.
كانديداتتار اراسىندا 36 كوممەرتسيالىق قۇرىلىمداردىڭ قىزمەتكەرى; 27 مەملەكەتتىك ۇيىمداردىڭ, كاسىپورىندار مەن مەكەمەلەردىڭ قىزمەتكەرى; 48 مەملەكەتتىك قىزمەتشى, 9 قوعامدىق ۇيىمداردىڭ وكىلدەرى, 2 زەينەتكەر جانە 3 جۇمىسسىز ۇمىتكەر بار.
قازىرگى ۋاقىتتا پارلامەنت سەناتىنىڭ دەپۋتاتتىعىنا كانديداتتاردى تىركەۋ ۇدەرىسى ءجۇرىپ جاتىر, ول 24 جەلتوقسانعا دەيىن جالعاسادى. بۇگىندە سايلاۋ كوميسسيالارى 49 كانديداتتى تىركەدى. ءسوز سوڭىندا كونستانتين پەتروۆ پارلامەنت سەناتىنىڭ دەپۋتاتتىعىنا كانديداتتاردى تىركەۋ قورىتىندىلارى ورتالىق سايلاۋ كوميسسياسىنىڭ جەكە وتىرىسىندا قارالاتىنىن اتاپ ءوتتى.
ورتسايلاۋكوم مۇشەسى ءسابيلا مۇستافينا ءوز بايانداماسىندا مەملەكەت كانديداتتارعا بۇقارالىق اقپارات قۇرالدارىندا ءوز باعدارلامالارىن جاريالاۋ ءۇشىن تەڭ قاراجات بولىنۋىنە كەپىلدىك بەرەتىنىن اتاپ ءوتتى. تەلەديداردا (تىكەلەي ەفيردە نەمەسە جازبادا) – ون بەس مينۋت; راديودا – ون مينۋت; مەرزىمدى باسپا باسىلىمدارىندا نەمەسە جەلىلىك باسىلىمداردا 0,1 باسپا تاباقتان اسپايتىن ەكى ماقالا جاريالاۋعا مۇمكىندىك بەرىلەدى.
كانديداتتار وزدەرىنىڭ سايلاۋ الدىنداعى باعدارلامالارىمەن ءسوز سويلەۋ ءۇشىن مەملەكەت بولگەن قاراجات شەڭبەرىندە باسپا نەمەسە جەلىلىك باسىلىمدارداعى, تەلە, راديوارنالارداعى جاريالانىمدار كولەمىن وزدەرى بولەدى. سونداي-اق رەسپۋبليكالىق بيۋدجەت قاراجاتىنان كانديداتتاردىڭ سايلاۋ الدىنداعى جاريا ءىس-شارالارىن وتكىزۋگە, ۇگىت ماتەريالدارىن شىعارۋعا ارنالعان شىعىستارى مەن كولىك شىعىستارى ورتالىق سايلاۋ كوميسسياسى بەلگىلەگەن مولشەردە وتەلەدى.
جوعارىدا باياندالعاننىڭ نەگىزىندە وسك ءوز قاۋلىسىمەن قازاقستان رەسپۋبليكاسى پارلامەنتى سەناتىنىڭ دەپۋتاتتىعىنا كانديداتتىڭ رەسپۋبليكالىق بيۋدجەت قاراجاتىنان قاراستىرىلاتىن شىعىن 550 مىڭ تەڭگە كولەمىندە بەلگىلەدى. تەلەديداردان, راديودان سويلەۋى جانە مەرزىمدى باسىلىمداردا 2 ماقالا جاريالاۋى ءۇشىن – 400 مىڭ تەڭگە; سايلاۋ الدىنداعى جاريا ءىس-شارالاردى وتكىزۋ جانە ۇگىت ماتەريالدارىن شىعارۋى ءۇشىن – 70 مىڭ تەڭگە; كولىك شىعىنى ءۇشىن 80 مىڭ تەڭگە بەلگىلەندى.
سونداي-اق س.مۇستافينا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 34, 75-باپتارىنا سايكەس پارلامەنت سەناتىنىڭ دەپۋتاتتىعىنا كانديداتتىڭ ءاربىرى سايلاۋ قورىن قۇرۋعا قۇقىلى ەكەنىن اتاپ ءوتتى.
