ەكىنشى كەزەكتى قولدانىسقا ەنگىزۋ «قازحرومنىڭ» فەرروقورىتپا زاۋىتتارىنىڭ قالىپتى جۇمىسىن قامتاماسىز ەتۋدە ماڭىزعا يە. سونداي-اق حرومتاۋ قالاسى مەن ەل ەكونوميكاسى ءۇشىن ستراتەگيالىق تۇرعىدان ماڭىزدى.
قازاقستان تاۋەلسىزدىگىنىڭ 10 جىلدىعى اتىنداعى شاحتانىڭ ەكىنشى كەزەڭىنە «ميلليوننوە» جانە «الماز-جەمچۋجينا» كەن ورىندارى, التى جەراستى گوريزونتى, سونداي-اق تەرەڭدىگى 1 شاقىرىمنان اساتىن شاحتالىق ۇڭعىمالار جاتادى. ەكىنشى كەزەڭنىڭ جوبالىق قۋاتى بويىنشا جىلىنا 6,5 ملن توننادان استام كەن شىعارىلادى. «قازاقستان تاۋەلسىزدىگىنىڭ 10 جىلدىعى» اتىنداعى شاحتانىڭ ەكىنشى كەزەڭى قۇرىلىسىنا ERG كومپانياسى 877,6 ملرد تەڭگە ينۆەستيتسيا سالماق.
قازاقستاندا العاش رەت قولدانىلعان وزىق تەحنولوگيالاردىڭ ارقاسىندا مۇنداعى ۇڭعىلاۋ جۇمىستارى جاقسى جىلدامدىقپەن جۇرگەن. تاۋ-كەن ماسساسىنىڭ 30 ۆاگون-ارباسى سىرتقا شىعارىلىپتى. وسى ۋاقىت ىشىندە كەندى ارشۋ جۇمىستارى ءجۇرىپ جاتقاندا, جەرۇستىنە تەك بوس جىنىستار شىعارىلدى. بۇگىندە ۇڭعىما جۇمىستارى كەن ءماسسيۆىنىڭ بويىمەن جۇرگىزىلۋدە, وڭدەۋگە جارامدى ىلەسپە كەن شىعا باستادى. كەنشىلەر نەگىزگى ءوندىرۋ جۇمىستارىنا بارىنشا دايىندالىپ جاتىر.
– بۇل كومپانيا ءۇشىن تاريحي ءسات. ماڭىزدى كەزەڭنىڭ ەلىمىزدەگى ەڭ ءىرى تاۋ-كەن ءوندىرۋشى كومپانيانىڭ دامۋىنا عانا ەمەس, تۇتاس حرومتاۋدىڭ بولاشاعىنا قاتىسى بار. سەبەبى وندىرىلگەن ءاربىر جاڭا توننانىڭ ارتىندا جەرگىلىكتى تۇرعىندار تۇر. مۇندا ءوندىرۋدىڭ جاڭا تەحنولوگيالارى قولدانىلاتىن بولادى. ال تەحنيكالىق جاعىنان جوعارى دەڭگەيدە جابدىقتالۋى, جاراقتاندىرىلۋى قول ەڭبەگىن ايتارلىقتاي ازايتىپ, ەڭبەك قاۋىپسىزدىگى مەن ءاربىر كەنشىنىڭ ءونىمدى جۇمىس ىستەۋىن ارتتىرادى, – دەيدى «قازحروم» باسشىسى سەرگەي پروكوپەۆ.
قازىرگى ۋاقىتتا شاحتانىڭ جاڭا گوريزونتىندا تاۋ-كەن ۇڭعىما جانە قۇرىلىس-مونتاج جۇمىستارى جالعاسىپ جاتىر. فەرروقورىتپا ءوندىرىسى ءۇشىن نەگىزگى ءوندىرۋدى ىسكە قوسۋ 2024 جىلدىڭ باسىنا جوسپارلانعان. ءبىرىنشى جىلى مۇندا شامامەن 400 مىڭ توننا جوعارى ساپالى شيكىزات وندىرىلەدى دەپ جوسپارلانىپ وتىر.
ERG ديرەكتورلار كەڭەسىنىڭ توراعاسى الەكساندر ماشكەۆيچ بۇعان دەيىن ءباسپاسوز ءماسليحاتىندا «قازىرگى كۇنى كۇردەلى ينجەنەرلىك جوبا – «قازاقستان تاۋەلسىزدىگىنىڭ 10 جىلدىعى» اتىنداعى شاحتانىڭ ەكىنشى كەزەڭىنىڭ قۇرىلىسىن ىسكە اسىرىپ جاتىرمىز. ۇڭعىمانىڭ تەرەڭدىگى ءبىر شاقىرىمنان اسادى. بۇل كۇردەلى تەحنولوگيالىق ينجەنەرلىك شەشىمدەردى تالاپ ەتەتىن الەمدىك دەڭگەيدەگى گەولوگيالىق مىندەت. جوبانى جۇزەگە اسىرۋ ءۇشىن كوشباسشى كومپانيالاردى جۇمىلدىردىق», دەگەن بولاتىن.
ايتا كەتۋ كەرەك, ERG بۇگىندە قازحرومنىڭ فەرروقورىتپا زاۋىتتارىندا وندىرىلەتىن بارلىق كەندى قايتا وڭدەيدى جانە ءۇشىنشى تاراپقا بەرمەيدى.
