ءبىر مەكتەپتەن – 6 التىن مەدال!

قاراعاندىداعى ءبىلىمنىڭ قارا شاڭىراعى اتان­عان 87 جىلدىق تاريحى بار جامبىل اتىن­داعى №7 مامانداندىرىلعان مەكتەپ-ينتەرناتىنىڭ ­اتى اڭىزعا اينالعان. ولاي بولاتىن سەبەپتەرى كوپ. قاراعاندى كومىر باسسەينىمەن تۇيدەي قۇرداس. وسى مەكتەپتە تالاي اتاقتى ادامدار وقىعان. سونىڭ ءبىرى جانە بىرەگەيى – كەڭەس وداعىنىڭ باتىرى, ۇش­قىش نۇركەن ءابدىروۆ. سوڭعى جىلدارى مەكتەپ-ينتەرنات ءوز وقۋشىلارى مەن تاربيەلەنۋشىلەرىنىڭ ۇزدىك وقۋىمەن, ۇلگىلى تارتىبىمەن ءجيى-ءجيى كوزگە ءتۇسىپ ءجۇر. كۇنى كەشە وتكەن ۇبت قورىتىندىسى بويىنشا 6 وقۋشى التىن مەدالدى جەڭىپ السا, تاعى ءبىر التاۋى قىزىل اتتەس­تاتقا يە بولدى. وسى 12 وقۋشىنىڭ جەتەۋى ءبىرىنشى سىنىپتان وسىندا وقىپ كەلە جاتقان شاكىرتتەر. كەيىنگى جىلدارى بۇل وقۋ ورنى مارتەبەسىن وزگەرتۋىنە بايلانىستى كوبىنە اۋىلدان كەلگەن قابىلەتتى وقۋشىلاردى 5-ءشى سىنىپتان باس­تاپ قابىلدايدى. بەسىنشى سىنىپتان باستاپ شاكىرتتەردىڭ جان-جاقتى دۇرىس ءبىلىم الۋى ۇيىمداستىرىلادى. مەكتەپ بيىل دا سول ۇدەدەن شىقتى. 11-ءشى سىنىپ وقۋشىلارى وتكەن جىلعى تامىز ايىنان باستاپ دايىندالدى. ساپالى دايىندىقتىڭ, ءادىل باعالاۋدىڭ جارقىن دالەلى – 12 بىردەي وقۋ وزاتى. بيىلعى مەكتەپ تۇلەكتەرىنىڭ ورتاشا باللى – 106. ارداگەر ۇستازدار ن.جۇماقاسوۆا, ق.سماعۇلوۆا, ب.تاۋىقباەۆا, ت.مايكوپوۆا, ءۇ.بەرەكەلوۆا, ا.سمايل, ك.تىلەۋباەۆا, م.تابىنبەكوۆا, گ.بەكبولاتوۆا, ن.ءامىرحان ۇبت پاندەرى بويىنشا ۇيىمشىلدىقپەن ءبىلىم باسەكەسىنە جاتتىقتىرۋ, ياكي دايىندىق جۇمىستارىن جۇرگىزدى. مەكتەپ ديرەكتورى ق.ىلىمباەۆتىڭ ءوزى ماتەماتيكا پانىنەن كانىگى باپكەر بولىپ الدى. مەكتەپ پسيحولوگتارى ق.كۇزەۋوۆا, ب.بەكسەيىتوۆا جىل بويى شاكىرتتەردىڭ دايىندىق جانە دەمالىس تۇزىمدەرىن, كوڭىل كۇيلەرىن باقىلاپ, ەرىك-جىگەرلەرىن ۇشتاپ, نىسانالى ماقساتقا باعىتتاپ وتىردى. ايقىن نەسىپباي, «ەگەمەن قازاقستان».     قاراعاندى.