فيليالدىڭ رەسمي اشىلۋ راسىمىنە ەۇۋ-دىڭ عىلىم, كوممەرتسيالاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا, وش مەملەكەتتىك ۋنيۆەرسيتەتىنىڭ رەكتورى قۇدايبەردى قوجوبەكوۆ, قازاقستاننىڭ وش قالاسىنداعى كونسۋلى مۇحتار كارىباي, وقىتۋشىلار مەن ستۋدەنتتەر قاتىستى.
«ەۇۋ فيليالىنىڭ اشىلۋى باۋىرلاس ەلدەر اراسىنداعى دوستىق پەن تاتۋ كورشىلىكتىڭ, ءبىلىم جانە عىلىممەن قاتار بارلىق سالادا ىنتىماقتاستىقتى ارتتىرۋعا ءوزارا ۇمتىلىستىڭ ناتيجەسىندە مۇمكىن بولىپ وتىر. فيليال قازاقستان مەن قىرعىزستاننىڭ ەڭ دارىندى ستۋدەنتتەرى مەن عالىمدارىن تارتادى دەپ ۇمىتتەنەمىن. بۇل باعىتتا ەۇۋ حالىقارالىق ءبىلىم بەرۋ نارىعىندا ءوزىنىڭ باسەكەگە قابىلەتتىلىگىن تۇراقتى تۇردە ارتتىرىپ كەلەدى. ءبىزدىڭ ۋنيۆەرسيتەت QS World University Ranking رەيتينگىندە الەمنىڭ ۇزدىك 300 جوعارى وقۋ ورىندارىنىڭ قاتارىنا كىرىپ, 277-ورىندى يەلەندى. جاقىندا ەۇۋ-عا زەرتتەۋ ۋنيۆەرسيتەتى مارتەبەسى بەرىلدى. بۇل ءوز كەزەگىندە عىلىمي-اكادەميالىق كوللابوراتسيا مۇمكىندىكتەرىن كەڭەيتەدى», دەپ اتاپ ءوتتى ج.قۇرمانعاليەۆا.
بۇگىندە ەۇۋ فيليالىندا 30-عا جۋىق ستۋدەنت ءبىلىم الىپ جاتىر. ولار اعاشقى ەكى كۋرستى وش قالاسىندا, كەيىنگى ەكى جىلدا قازاقستاندا تاڭداعان كاسىپتەرىن مەڭگەرەدى. وقۋ باعدارلاماسى اياسىندا قىرعىز جاستارى قازاق ءتىلىن مەڭگەرۋدە. كەلەسى جىلى «قازاقستان تاريحى» ءپانىن ەنگىزۋ جوسپاردا بار. فيليالدا جوعارى كاسىبي ءبىلىم بەرۋدىڭ ەكى باعىتى بويىنشا ماماندار دايارلاۋ جۇرگىزىلەدى: «اۋدارما ءىسى» جانە «ورىس ءتىلى مەن ادەبيەتى». الداعى ۋاقىتتا جاراتىلىستانۋ عىلىمى, فيزيكا جانە IT باعىتىندا ءبىلىم بەرۋ باعدارلامالارىنىڭ سانىن كوبەيتۋ جوسپارلانىپ وتىر.
ەۇۋ عىلىمي-ءبىلىم بەرۋ جوبالار, اكادەميالىق ۇتقىرلىق باعدارلامالار, بىرلەسكەن ءبىلىم بەرۋ باعدارلامالارى, شەتەلدىك مامانداردى تارتۋ بويىنشا قىرعىز ارىپتەستەرىمەن بىرلەسە بەلسەندى جۇمىس جۇرگىزەدى.
بيىلعى وقۋ جىلىندا ۋنيۆەرسيتەتتىڭ «Welcome to ENU» اكادەميالىق ۇتقىرلىق باعدارلاماسى اياسىندا قىرعىزستاننان 46 ستۋدەنت ءبىلىم الۋدا. ايتا كەتۋ كەرەك, بۇگىندە ل.ن.گۋميلەۆ اتىنداعى ەۇۋ-دىڭ الەم بويىنشا 12 ورتالىعى مەن وكىلدىگى بار. سونداي-اق ۇلتتىق ۋنيۆەرسيتەت 450-دەن اسا جەتەكشى شەتەلدىك ۋنيۆەرسيتەتتەرمەن حالىقارالىق ىنتىماقتاستىق ورناتقان.
