تاۋەلسىزدىك كۇنى قارساڭىندا قازاقستان رەسپۋبليكاسىنىڭ توتەنشە جاعدايلار ءمينيسترى يۋري يلين ءورت سوندىرۋشىگە مەملەكەتتىك ناگرادانى تابىس ەتتى.
ەسكە سالا كەتەيىك, 2021 جىلعى 5 تامىزدا «101» نومىرىنە تالعار اۋدانى, تالعار قالاسى, رىسقۇلوۆ كوشەسى, 66-ءۇي مەكەنجايىنداعى 4 قاباتتى ۇيدە ءتۇتىن شىققانى تۋرالى حابارلاما كەلىپ ءتۇستى.
وقيعا ورنىنا كەلگەن كەزدە پاتەردىڭ اشىق جالىنمەن جانىپ جاتقانى انىقتالدى. تۇرعىندار ءۇيدىڭ ىشىندە ادامدار بولۋى مۇمكىن ەكەندىگىن ايتتى.
نۇرمەتوۆ رەنات نۇرماعامەد ۇلى گاز-تۇتىننەن قورعاۋ قىزمەتىنىڭ بۋىنىن باسقارىپ, پاتەرگە كىرىپ, ءورت وشاعىن سوندىرە باستادى. بارلاۋ جۇرگىزۋ بارىسىندا رەنات نۇرمەتوۆ ادامداردى قاۋىپسىز جەرگە ەۆاكۋاتسيالادى جانە تۇرعىن ءۇي-جايلارعا وتتىڭ تارالۋ قاۋپىن بولدىرمادى, سونداي-اق جوعارعى قاباتتاردان 9 ادامدى, ونىڭ ىشىندە 6 بالانى قۇتقاردى.
رەنات نۇرمەتوۆتىڭ شەبەر ءىس-ارەكەتىنىڭ ارقاسىندا ادامدار قۇتقارىلىپ, ءورت ۋاقتىلى ءسوندىرىلدى.
