كەشتى قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ مەملەكەت باسشىسى قاسىم-جومارت توقاەۆتىڭ قۇتتىقتاۋ سوزىمەن اشتى. «كوركەم ادەبيەتتى قادىرلەيتىن حالقىمىزدىڭ بىرنەشە بۋىن وكىلى ءازىلحان نۇرشايىقوۆتىڭ شىعارمالارىمەن سۋسىنداپ ءوستى. ونىڭ ادەبي تۋىندىلارى جاس ۇرپاقتى قاشاندا وتانسۇيگىشتىككە, ماحاببات پەن ادالدىققا تاربيەلەدى. اسىرەسە قالىڭ وقىرماننىڭ قولىنان تۇسپەگەن, ءالى دە تۇسپەي كەلە جاتقان «ماحاببات, قىزىق مول جىلدار» جانە «اقيقات پەن اڭىز» روماندارىنىڭ ورنى بولەك. قانشا جىل وتسە دە قالامگەردىڭ تۋىندىلارى وزەكتىلىگىن جوعالتپايدى, ويتكەنى ونىڭ شىعارمالارى مادەني مۇرامىزدىڭ اجىراماس بولىگىنە اينالدى. مەرەيتوي قۇتتى بولسىن!» دەگەن ەل پرەزيدەنتى جولداعان قۇتتىقتاۋ حاتىندا.
بۇدان ءارى قاراي جازۋشى, فيلولوگيا عىلىمدارىنىڭ دوكتورى نۇرداۋلەت اقىش باستاعان جازۋشىنىڭ ءىزباسارلارى ءسوز الىپ, قالامگەردىڭ ءالى دە تولىق وقىلماي جاتقان مول مۇراسىن ناسيحاتتاۋ جانە الماتى قالاسىندا حالىقتىڭ سۇيىكتى جازۋشىسىنىڭ ەسكەرتكىشىن اشۋ سىندى ۇسىنىستار ورتاعا سالدى. جازۋشى ن.اقىش نۇرشايىقوۆ پروزاسىنداعى شەبەرلىك تىلسىمىن ساراپتاي وتىرىپ, «ماحاببات, قىزىق مول جىلدار», «اقيقات پەن اڭىز» روماندارىنىڭ وقىرماندارعا نەلىكتەن قادىرلى بولاتىندىعىنىڭ جۇمباعىن قىسقاشا ادىپتەپ ءوتتى. ەكى شىعارما دا حالىقتىق سيپات-ۇلگى, ءداستۇر بولمىسى كەڭ قۇبىلىسپەن استارلاسىپ, ۇلت, ۇرپاق بولاشاعىنىڭ تەمىرقازىعىنداي جارقىراي تۇسۋىمەن قۇندى ەدى.
ءاز-اعاڭنىڭ ومىرلىك ءىنى-دوسى بولعان, 34 جىل ەكەۋارا حات جازىسىپ, ناتيجەسىندە, ەپيستوليارلىق جانر ۇلگىسىندەگى «ماحاببات جىرشىسى» كىتابىنىڭ اۆتورى اتانعان قالامگەر, قازاقستاننىڭ ەڭبەك سىڭىرگەن قايراتكەرى قايسار ءالىم ءوز سوزىندە بيىلعى جازداعى جارما اۋدانىندا ۇرپاقتارى ۇيىمداستىرعان تاجىريبەلىك كونفەرەنتسيانىڭ تانىمدىق جاعىنان سىر شەرتتى. ءاز-اعاڭ جەرلەستەرى تۋعان اۋىلى بىرلىكتە ەسكەرتكىش سوققالى جاتىر, اۋداندا كوشە, مەكتەپكە ەسىمى بەرىلگەن. قالباتاۋداعى «ماحاببات, قىزىق مول جىلدار» اللەياسىندا جاس جۇبايلار ارداگەرلەردىڭ باتاسىن الادى. سونداي-اق ول الماتىدا ءا.نۇرشايىقوۆ اتىنداعى مۇراجاي اشىلۋىن قالا اكىمدىگىنە قۇلاعدار ەتتى.
ادەبي-سازدى كەشتىڭ وزىندىك قۇرىلىمى دا كوپشىلىكتىڭ كوڭىلىنەن شىققانداي. ەكراننان ءا.نۇرشايىقوۆتىڭ ادەبيەت, شىعارماشىلىق, تۋعان جەر, ادامگەرشىلىك, ماحاببات تۋرالى تولعانىستارى ءوز اۋزىمەن ايتىلىپ, وسى تاقىرىپتارعا ورايلاستىرىلىپ اندەر شىرقالدى. نۇرعالي ءنۇسىپجانوۆ, رامازان ستامعازيەۆ, ايگۇل قوسانوۆا, گۇلنۇر ورازىمبەتوۆا, «قوڭىر» توبى, ءمادينا سادۋاقاسوۆا, «اعايىندىلار» توبى, ميراس پەن قۇرالاي, «سالتانات» مەملەكەتتىك بي ءانسامبلى ونەر كورسەتتى. ەسكە الۋ كەشىندە ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ اكتەرلەرى «ماحاببات, قىزىق مول جىلدار» سپەكتاكلىنەن ءۇزىندى قويىپ, كورەرمەندەردىڭ بال-بالاۋسا كەزىن ەسكە العىزىپ, ەرەكشە اسەرگە بولەدى.
