تاۋەلسىزدىك كۇنى قارساڭىندا استانادا ستۋدەنتتەرگە ارنالعان 110 ورىندىق جاڭا جاتاقحانا اشىلدى. مۇنداي جوبالار بيزنەس پەن مەملەكەت ىنتىماقتاستىعىنىڭ جاقسى ۇلگىسى, سونداي-اق جاستاردىڭ بولاشاعىنا ۇلكەن ينۆەستيتسيا بولىپ سانالادى. مەنەدجمەنت, بيزنەس جانە ءبىلىم كوللەدجىنىڭ ستۋدەنتتەرى ءۇشىن سپورت زالى مەن تەگىن ينتەرنەتى بار جاڭا جاتاقحانا اشىلدى. عيمارات وقۋ ورنىنىڭ اۋماعىندا ورنالاسقان. نىسان ءتيىستى تالاپتارعا تولىق سايكەس كەلەدى. كورپۋستا دەمالىس بولمەسى, اس ءۇي, سپورت زالى, دۋش بولمەسى, مەديتسينالىق پۋنكت, كىر جۋعا جانە كەپتىرۋگە ارنالعان تۇرمىستىق بولمە بار. قاۋىپسىزدىكتى قامتاماسىز ەتۋ ءۇشىن بەينەباقىلاۋ جۇيەسى ورناتىلعان. جاتاقحانانىڭ جالپى اۋدانى – 1 525 شارشى مەتر.
كوللەدج ديرەكتورى بالقيا پىشەنوۆانىڭ ايتۋىنشا عيمارات مەملەكەتتىك-جەكەمەنشىك ارىپتەستىك تەتىگىن پايدالانا وتىرىپ سالىنعان. ول ءۇشىن 2020 جىلى سول كەزدەگى ءبىلىم جانە عىلىم مينيسترلىگى, سول سياقتى قر بعم جانىنداعى «قارجى ورتالىعى» اق مەن كوللەدج اراسىندا ۇشجاقتى شارت جاسالعان.
«جاتاقحانا زاماناۋي جيھازدارمەن, كىر جۋعىش جانە كەپتىرگىش زاتتارىمەن, اس ۇيلەر ەلەكتر پليتالارىمەن, توڭازىتقىشتارمەن جانە ميكروتولقىندى پەشتەرمەن جابدىقتالعان. سونداي-اق جاتاقحانادا زاماناۋي جۋىناتىن بولمەلەر مەن دۋش بولمەلەرى, ساقتاۋ كامەرالارى بار. ستۋدەنتتەر دەمالىس ورىندارىمەن, مەديتسينالىق كابينەتپەن قامتاماسىز ەتىلگەن. عيماراتتا قاجەتتى جابدىقتار مەن دۋش كابينالارى قاراستىرىلعان سپورت زالى بار. بارلىق قاباتتا جانە كوللەدج اۋماعىندا بەينەباقىلاۋ ورناتىلعان. مۇگەدەكتىگى بار ادامدار ءۇشىن ءتيىستى جاعداي جاسالعان», دەپ تولىقتىردى كوللەدج ديرەكتورى.
ستۋدەنتتەر ۇيىندە ءتورت, التى جانە سەگىز ورىندى بولمەلەر بار. ءار قاباتتا ءتارتىپتى كومەندانتتار قاداعالايدى, تاۋلىك بويى بەينەباقىلاۋ جۇمىس ىستەيدى.
ەلوردالىق مەنەدجمەنت, بيزنەس جانە ءبىلىم كوللەدجىنىڭ ستۋدەنتى نۇرگۇل يسەنوۆا ءۇشىنشى كۋرستا وقىتۋشى ماماندىعى بويىنشا وقيدى. جاڭا جاتاقحاناعا ول ءبىر اي بۇرىن العاشقىلاردىڭ ءبىرى بولىپ قونىستاندى. بۇرىن كوللەدجگە بارۋ جارتى ساعاتتان استام ۋاقىتتى السا, قازىر نەبارى بەس مينۋتتى الادى دەيدى.
قازىر كوللەدجدە 1360 ستۋدەنت وقيدى, ونىڭ 100-گە جۋىعى باسپاناعا مۇقتاج. بۇرىن ستۋدەنتتەر ءۇشىن كوللەدج جاتاقحانالارداعى ورىنداردى جالعا العان. استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ اتاپ وتكەندەي, اتالعان كوللەدج ءبىلىم بەرۋ قىزمەتتەرىن كورسەتۋ مەن ساۋاتتى جوسپارلاۋدىڭ ۇلگىسىن كورسەتەدى.
«كوللەدج اۋماعىندا ورنالاسقان جىلى جاتاقحانادا ستۋدەنتتەردىڭ تۇرۋى جانە وقۋى وتە ماڭىزدى. ەندى ايالدامالاردا اۆتوبۋس كۇتىپ, ۋاقىت جوعالتپايدى. اكىمدىك وسىنداي جاتاقحانالاردى سالۋ كەزىندە كوللەدجدەردى قولداۋ شارالارىن جوسپارلاپ وتىر», دەپ اتاپ ءوتتى استانا قالاسى ءبىلىم باسقارماسىنىڭ باسشىسى.
قازىر ەلوردالىق كوللەدجدەردە 32 مىڭعا جۋىق ادام وقيدى. اكىمدىك كوللەدج ستۋدەنتتەرى ءۇشىن جاتاقحانالارداعى ورىن تاپشىلىعىن كەزەڭ-كەزەڭىمەن شەشۋ بويىنشا ءىس-شارالار جوسپارىن ازىرلەدى.
