«جەو جانە جەلىلەر يەسىنىڭ جاۋاپكەرشىلىگىنە جەكە توقتالعىم كەلەدى. قۇنسىزدانۋى 90 پايىزدان اساتىن ەكىباستۇز جىلۋ ەلەكتر ورتالىعىن مەملەكەتكە 1 تەڭگەگە ساتۋ تۋرالى ۇسىنىستى تەكسەرۋ قاجەت. بۇل نىسانعا تاۋەلسىز اۋديت جۇرگىزۋ كەرەك. ابدەن توزعان ورتالىقتى مەملەكەت ءتيىمدى باسقارا الا ما, ەڭ الدىمەن, وسىنى زەرتتەۋ كەرەك», دەدى قاسىم-جومارت توقاەۆ.
ونىڭ ايتۋىنشا, كاسىپورىننىڭ 50 پايىزىن الىپ, مەنشىك يەسىنە جىلۋ ەلەكتر ورتالىعىن كۇردەلى جوندەۋدەن وتكىزۋدى تاپسىرعان ءجون.
«ەكىباستۇز قالاسىنىڭ تۇرعىندارىنا كەلتىرىلگەن شىعىندى وتەۋ قۇنى مەنشىك يەسى مەن رەسپۋبليكالىق بيۋدجەت اراسىندا ءبولىنسىن. سوڭعى جىلدارى قوجايىندارىمەن ەشتەڭە جاسالماعان ءاربىر ماڭىزدى ينفراقۇرىلىمدىق نىساندى ۇكىمەت جان-جاقتى قاراستىرىپ, شەشىم قابىلداۋى كەرەك. وسىنداي جۇمىستاردى وبلىس اكىمدەرى جەرگىلىكتى جەرلەردە دە جۇرگىزەتىن بولادى», دەدى پرەزيدەنت.
سونىمەن قاتار پرەزيدەنت ەلىمىزدەگى جىلۋ ەلەكتر ستانتسيالارىنىڭ ورتاشا توزۋى 66%-عا, ال كەيبىر قالالاردا ول قازىردىڭ وزىندە 80%-دان اسا قاۋىپتى دەڭگەيدەن اسىپ كەتكەنىن مالىمدەدى. ونىڭ ايتۋىنشا, جەو-نىڭ ۇشتەن ءبىرى جارتى عاسىردان استام ۋاقىت جۇمىس ىستەپ كەلەدى. ماسەلەن, شىعىس قازاقستان وبلىسىنىڭ ريددەر جانە شەمونايحا قالالارىندا جىلۋ جەلىلەرىنىڭ ابدەن توزىعى جەتكەن. وسى رەتتە قاسىم-جومارت توقاەۆ ۇكىمەتكە ەنەرگەتيكالىق نىسانداردى ۋاقتىلى جاڭعىرتۋدى باقىلاۋعا الۋدى بىرنەشە رەت تاپسىرعانىن ەسكە سالدى. اكىمدىكتەر دە ءبارىن ۇكىمەتكە جۇكتەپ, كەرى شەگىنە المايتىنىن جەتكىزدى.
«مەنىڭ تاپسىرمام بويىنشا پرەزيدەنت اكىمشىلىگى جانىنان قۇرىلعان ارنايى كوميسسيا كەشەندى شارالار ازىرلەدى. سوعان سايكەس باقىلاۋ-قاداعالاۋ تەتىگىن كۇشەيتىپ, مەنشىك يەلەرىنىڭ جاۋاپكەرشىلىگىن جانە جالپى سالانىڭ تيىمدىلىگىن ارتتىرۋ قاجەت. كوميسسيا دۇرىس جۇمىس ىستەمەي تۇرعان 19 جىلۋ ەلەكتر ورتالىعىن انىقتادى. ولاردى شۇعىل جاڭعىرتۋ قاجەت. الدىن الا ەسەپ بويىنشا وعان شامامەن 90 ميلليارد تەڭگە كەرەك. بۇل قاراجات, ارينە, ەنەرگەتيكالىق كاسىپورىنداردىڭ تاريفتىك سمەتاسىندا ەسكەرىلگەنى ءجون», دەدى قاسىم-جومارت كەمەل ۇلى.
