ءاليحان سمايىلوۆتىڭ ايتۋىنشا, ۇكىمەت قابىلداعان شارالار الداعى جىلدارى ۇلتتىق قورعا قاراجات تۇسىمدەرىنىڭ كولەمىن ۇلعايتۋعا جانە بيۋدجەت شىعىستارىنىڭ ءوسۋ قارقىنىن تۇراقتاندىرۋعا مۇمكىندىك بەرەدى.
قازىر قازاقستان پرەزيدەنتىنىڭ سايلاۋالدى باعدارلاماسىن ىسكە اسىرۋ باستالدى. ونىڭ شەڭبەرىندە 2030 جىلعا دەيىن مەملەكەتتىك قارجىنى باسقارۋدىڭ جاڭا تۇجىرىمداماسى قاعيداتتارىن ەنگىزۋ جۇزەگە اسىرىلىپ جاتىر. 2023 جىلى ۇلتتىق قوردان الىناتىن ترانسفەرتتەردى 1,4 ترلن تەڭگەگە قىسقارتۋعا جانە بيۋدجەت شىعىستارىنىڭ ءوسۋ قارقىنىن تۇراقتاندىرۋعا مۇمكىندىك بەرەتىن كونترتسيكلدىك بيۋدجەتتىك قاعيدالار بەكىتىلدى.
«بيۋدجەتتىڭ تەڭگەرىمدىلىگى ءوزىنىڭ كىرىس بازاسىن ۇلعايتۋ جانە شىعىستاردى نەعۇرلىم باسىم باعىتتارعا شوعىرلاندىرۋ ەسەبىنەن قامتاماسىز ەتىلەدى», دەپ اتاپ ءوتتى پرەمەر-مينيستر.
بيۋدجەت پروتسەسى مەن سالىقتىق اكىمشىلەندىرۋدى جەڭىلدەتۋگە, وسى باعىتتارعا جاڭا تسيفرلىق شەشىمدەردى ەنگىزۋگە مۇمكىندىك بەرەتىن جاڭا بيۋدجەت جانە سالىق كودەكستەرىن ازىرلەۋ باستالدى.
«جالپى العاندا, بيۋدجەت-سالىق ساياساتى 2030 جىلعا قاراي مۇنايعا قاتىستى ەمەس تاپشىلىقتى 5%-عا دەيىن تومەندەتۋگە, سونداي-اق ۇلتتىق قور اكتيۆتەرىن $100 ملرد-قا دەيىن وسىرۋگە باعىتتالادى», دەدى ءاليحان سمايىلوۆ.
