ۇكىمەت • 10 جەلتوقسان، 2022

ۇكىمەت باسشىسى «قولجەتىمدى ينتەرنەت» ۇلتتىق جوباسىن پىسىقتاۋدى تاپسىردى

قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن پرەزيدەنت جانىنداعى تسيفرلاندىرۋدى ەنگىزۋ ماسەلەلەرى جونىندەگى كوميسسيا وتىرىسىندا ينتەرنەت ساپاسىن جاقسارتۋ، بايلانىس ينفراقۇرىلىمىن جانە جاڭا تسيفرلىق ونىمدەردى دامىتۋ جوسپارلارى تالقىلاندى، دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.

ايانا توعانبەك

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قالالار مەن اۋىلداردى جوعارى جىلدامدىقتى ينتەرنەتكە قوسۋ، رەسپۋبليكالىق جانە ءبىرىنشى دارەجەدەگى وبلىستىق جولدار بويىندا تالشىقتى-وپتيكالىق بايلانىس جەلىلەرىن تارتۋ/توسەۋ/مونتاجداۋ، سونداي-اق 5G جەلىلەرىن ەنگىزۋ بويىنشا كەڭ اۋقىمدى جۇمىستار قاراستىرىلعان 2023-2027 جىلدارعا ارنالعان «قولجەتىمدى ينتەرنەت» ۇلتتىق جوباسىن ازىرلەۋ بارىسى تۋرالى باياندادى.

سونداي-اق تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى مەملەكەت باسشىسىنىڭ مەملەكەتتىك اپپاراتتىڭ قىزمەتىن بيۋروكراتيادان ارىلتۋ جانە مەملەكەتتىك ستاتيستيكانى جۇرگىزۋ مەن مەملەكەتتىك قىزمەتتەر كورسەتۋدىڭ دالدىگىن ارتتىرۋعا مۇمكىندىك بەرەتىن تسيفرلىق ستاتيستيكالىق تىركەلىمدەردى ەنگىزۋ جونىندەگى تاپسىرماسى شەڭبەرىندە مەملەكەتتىك ورگانداردىڭ دەرەكتەرىن تسيفرلاندىرۋ بارىسى تۋرالى ايتىپ بەردى.

ءاليحان سمايىلوۆ ءبىر اي مەرزىمدە «قولجەتىمدى ينتەرنەت» ۇلتتىق جوباسىن پىسىقتاپ، ونى باسقا مەملەكەتتىك ورگاندارمەن كەلىسۋدى تاپسىردى، سونداي-اق دەرەكتەر بازاسىن جاڭعىرتۋ كەزىندە اقپاراتتى 100% قورعاۋدى قامتاماسىز ەتۋ قاجەتتىگىن اتاپ ءوتتى.

سونىمەن قاتار وتىرىستا اۋىل شارۋاشىلىعى جانۋارلارىن تىركەۋگە جانە ۆەتەريناريالىق-پروفيلاكتيكالىق ءىس-شارالاردىڭ جىل سايىنعى تىزىمدەمەسىن جۇرگىزۋگە مۇمكىندىك بەرەتىن «VET-Mobile» ءموبيلدى قوسىمشاسىن ەنگىزۋ ماسەلەسى قارالدى. اۋىل شارۋاشىلىعى ءمينيسترى ەربول قاراشوكەەۆتىڭ حابارلاۋىنشا، بۇل قوسىمشا ۆەتەرينار دارىگەرلەردىڭ جۇمىسىن ەداۋىر جەڭىلدەتۋگە مۇمكىندىك بەرەدى جانە ول ينتەرنەتسىز جۇمىس ىستەي الادى، بۇل شالعايداعى ەلدى مەكەندەر ءۇشىن اسا ماڭىزدى.

سونداي-اق وتىرىسقا قاتىسۋشىلار ەكى ماقساتتا قولدانىلاتىن باعانالار جۇيەسىن دامىتۋ ءۇشىن قالالىق كوممۋنيكاتسيالىق ينفراقۇرىلىمدى (جارناما تاقتالارى، شام باعانالارى) پايدالانۋ جونىندەگى ۇسىنىستى تالقىلادى. وسى سمارت-باعاندار قۇرىلىسى حالىق تىعىز ورنالاسقان قالالىق اۋدانداردا ينتەرنەت پەن بايلانىس ساپاسىن جاقسارتۋعا ىقپال ەتەتىن بولادى.