ءا.سمايىلوۆ مەملەكەت باسشىسىنىڭ ءوڭىر اكىمى لاۋازىمىنا بايحانوۆ اسايىن قۋاندىق ۇلى مەن باتىرعوجينوۆ سەرىك بارلىباي ۇلىنىڭ كانديداتۋرالارىن قاراۋعا ەنگىزۋ تۋرالى حاتىن وقىدى.
اشىق داۋىس بەرۋ كەزىندە 177 دەپۋتاتتىڭ 135-ءى ا.بايحانوۆقا, 42 دەپۋتات س.باتىرعوجينوۆقا داۋىس بەردى.
وسىدان كەيىن وبلىس اكتيۆىمەن وتكەن كەزدەسۋدە پرەمەر-مينيستر اكىمدىك باسشىلىعىنىڭ الدىندا تۇرعان باسىم مىندەتتەرىنىڭ ءبىرى ينفراقۇرىلىمدى جاڭعىرتۋ ەكەنىن اتاپ ءوتتى.
«قازىر جىلىتۋ ماۋسىمى ءجۇرىپ جاتىر. وكىنىشكە قاراي, ەكىباستۇز قالاسىنىڭ جىلۋ جەلىلەرىندە اپات بولىپ, تۇرعىندار جىلۋسىز قالعان ەدى. جان اياماي جۇمىس ىستەگەن مامانداردىڭ ارقاسىندا جىلۋ بەرۋ قالپىنا كەلتىرىلدى. قازىرگى كەزدە اپاتتىڭ سەبەپتەرى انىقتالىپ جاتىر, ناتيجەسى شىققان سوڭ كىنالىلەر جاۋاپقا تارتىلاتىن بولادى. اكىمدىك بۇل ماسەلەنى ەرەكشە نازارعا الىپ, جىلىتۋ ماۋسىمىنىڭ قالىپتى جاعدايدا ءوتۋىن قامتاماسىز ەتۋى كەرەك», دەدى ءا.سمايىلوۆ.
سونىمەن قاتار ۇكىمەت باسشىسىنىڭ ايتۋىنشا, ءوڭىر باسشىلىعىنىڭ الدىندا اۋىلدىق دەنساۋلىق ساقتاۋدى جاڭعىرتۋ بويىنشا جانە «جايلى مەكتەپ» ۇلتتىق جوبالارىن, سونداي-اق تاۋ-كەن ءوندىرۋ سەكتورىن, مەتاللۋرگيانى, حيميا ونەركاسىبىن, قۇرىلىس يندۋسترياسىن جانە باسقا دا نەگىزگى سالالاردى دامىتۋ جونىندەگى شارالاردى ساپالى ىسكە اسىرۋ مىندەتتەرى تۇر.
بۇدان باسقا, ءىرى ءوندىرىس وشاقتارىنىڭ جۇمىسىنا بايلانىستى وڭىردەگى ەكولوگيالىق احۋال كۇردەلى. رەسپۋبليكا بويىنشا شىعارىندىلاردىڭ جالپى كولەمىنىڭ شامامەن 30%-ى پاۆلودار وبلىسىنا تيەسىلى. وسىعان بايلانىستى وبلىس باسشىلىعى زياندى وندىرىستىك شىعارىندىلاردىڭ قورشاعان ورتاعا تەرىس اسەرىن ازايتۋ جونىندەگى جۇمىسقا نازار اۋدارۋى قاجەت.
«سونىمەن قاتار كاسىپورىندار وندىرىستىك پروتسەستى جاڭعىرتۋعا, ينۆەستيتسيالاردى ۇلعايتۋعا, جۇمىسكەرلەرگە الەۋمەتتىك قولداۋ كورسەتۋگە كوڭىل بولۋگە ءتيىس», دەدى ءا.سمايىلوۆ.
