ساياسات • 08 جەلتوقسان، 2022

باسىم مىندەتتەردى اتاپ كورسەتتى

وسكەمەندە پرەمەر-مينيستر ءاليحان سمايىلوۆ پەن پرەزيدەنت اكىمشىلىگىنىڭ باسشىسى مۇرات نۇرتىلەۋ شىعىس قازاقستان وبلىسىنىڭ بارلىق دەڭگەيدەگى ءماسليحاتتار دەپۋتاتتارىنىڭ جينالىسىنا قاتىستى.

Egemen Qazaqstan

ءا.سمايىلوۆ مەملەكەت باسشىسىنىڭ ءوڭىر اكىمى لاۋازىمىنا دانيال كەنجەتاي ۇلى احمەتوۆ پەن رەنات تىلەۋحان ۇلى قۇرمامباەۆتىڭ كانديداتۋرالارىن قاراۋعا ەنگىزۋ تۋرالى حاتىن وقىدى.

اشىق داۋىس بەرۋ قورىتىندىسى بويىنشا 117 دەپۋتاتتىڭ 94-ءى د.احمەتوۆكە، 23 دەپۋتات ر.قۇرمامباەۆقا داۋىس بەردى.

وبلىس اكتيۆىمەن كەزدەسۋدە پرەمەر-مينيستر وڭىردە دانيال احمەتوۆ جۇمىس ىستەگەن كەزەڭدە ءىرى ونەركاسىپتىك جانە اۋىل شارۋاشىلىعى جوبالارى ىسكە اسىرىلعانىن اتاپ ءوتتى. الەۋمەتتىك ماقساتتاعى ونداعان نىسان، ونىڭ ىشىندە مەكتەپتەر، اۋرۋحانالار، سپورت ورتالىقتارى سالىنىپ، قۇرىلىس جۇمىستارى جۇرۋدە. جالپى العاندا، شىعىس قازاقستان وبلىسى بۇگىندە بارلىق نەگىزگى ەكونوميكالىق كورسەتكىشتەر بويىنشا وڭ ناتيجەگە جەتىپ وتىر.

ءا.سمايىلوۆ باسىم مىندەتتەر رەتىندە پرەزيدەنتتىڭ سايلاۋالدى باعدارلاماسىن ورىنداۋ جونىندەگى ءىس-شارالار جوسپارى شەڭبەرىندە ءوڭىردى ودان ءارى دامىتۋ جونىندەگى جۇيەلى شارالاردى ىسكە اسىرۋ ەكەنىن اتاپ ءوتتى.

«بۇل قۇجاتتا ەكونوميكادا، الەۋمەتتىك سالادا جانە وڭىرلىك ساياساتتا حالىقتىڭ ءومىر ءسۇرۋ دەڭگەيى مەن ءال-اۋقاتىن ارتتىرۋعا باعىتتالعان ناقتى وزگەرىستەر قاراستىرىلعان»، دەدى پرەمەر-مينيستر.

ونىڭ ايتۋىنشا، الداعى جىلدارى ۇلتتىق جوبالار اياسىندا 4،2 مىڭ وقۋشىعا ارنالعان 10 جاڭا مەكتەپ، 36 العاشقى مەديتسينالىق-سانيتارلىق كومەك نىساندارىن اشىپ،
1 اۋداندىق اۋرۋحانانى جاڭعىرتۋ جوسپارلانۋدا. بۇدان باسقا، اۋىلدىق ەلدى مەكەندەردە اگرارلىق سەكتوردى، كاسىپكەرلىكتى دامىتۋ جانە جالپى اۋىلدا ءومىر ءسۇرۋ ساپاسىن ارتتىرۋ جونىندە شارالار قابىلدانادى.

سونىمەن قاتار پرەمەر-مينيستر جىلىتۋ ماۋسىمىن تۇراقتى وتكىزۋ، تۇرعىن ءۇي-كوممۋنالدىق ينفراقۇرىلىمدى جاڭعىرتۋ، مەتاللۋرگيا جانە ماشينا جاساۋ سالالارىن دامىتۋ جونىندەگى قادامداردى ىسكە اسىرۋ، سونداي-اق ەكولوگيالىق احۋالدى جاقسارتۋ قاجەتتىگىنە نازار اۋداردى.