قوعام • 07 جەلتوقسان، 2022

استانادا «ەڭبەك جولى» كونكۋرسىنىڭ جەڭىمپازدارى ماراپاتتالدى

105 رەت كورسەتىلدى

ەلوردادا «ەڭبەك جولى» رەسپۋبليكالىق بايقاۋىنىڭ جەڭىمپازدارى مەن ەڭبەك ارداگەرلەرىن ماراپاتتاۋ ءراسىمى ءوتتى، دەپ حابارلايدى Egemen.kz.

اتالعان كونكۋرس جىل سايىن ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن ۇيىمداستىرىلىپ، ەڭبەك ادامدارىنىڭ جۇمىسىن ناسيحاتتاۋ ماقساتىندا «ۇزدىك ەڭبەك اۋلەتى»، «جۇمىس ىستەيتىن جاستاردىڭ ۇزدىك تالىمگەرى» جانە ء«وندىرىستىڭ ۇزدىك جاس مامانى» اتتى نوميناتسيالارى بويىنشا ماراپاتتالادى.

ءىس-شاراعا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، مەملەكەتتىك ورگاننىڭ، «اتامەكەن» ۇكپ-نىڭ، رەسپۋبليكالىق جۇمىسشىلار مەن جۇمىس بەرۋشىلەر بىرلەستىكتەرىنىڭ، جەرگىلىكتى مەملەكەتتىك ورگانداردىڭ، الەۋمەتتىك سەرىكتەستەردىڭ وكىلدەرى، ەڭبەك ارداگەرلەرى مەن كونكۋرس جەڭىمپازدارى قاتىستى. 

ماراپاتتاۋ ءراسىمى الدىندا اشىق تالقىلاۋ سەسسياسى ءوتىپ، شارا بارىسىندا «قازاقستاننىڭ ەڭبەك ەرى» اتاعىنىڭ يەگەرلەرى سەرىك اقشۋلاكوۆ، اياكۇل ميرازوۆا مەن رىشات امرەنوۆتار ەلىمىزدىڭ ءار وڭىرىنەن كەلگەن جاستارعا ەڭبەك تاجىريبەلەرىمەن ءبولىسىپ، سۇراقتارىنا جاۋاپ بەردى.

تامارا دۇيسەنوۆا سالتاناتتى شارانىڭ اشىلۋىندا ەڭبەك ادامدارىنىڭ مەملەكەت پەن قوعامنىڭ دامۋىنا قوسىپ جاتقان ۇلەستەرىن ەرەكشە اتاپ ءوتتى.

«مەملەكەت باسشىسى ءوزىنىڭ قازاقستان حالقىنا جولداۋىندا اتاپ وتكەندەي، ەڭبەكقور ازاماتتار، ءوز ءىسىنىڭ ناعىز كاسىپقويلارى ءبىزدىڭ مەملەكەتىمىزدى نىعايتادى. سوندىقتان ءبىزدىڭ قوعامدا كاسىپقويلىق پەن ەڭبەكقورلىقتىڭ جوعارى باعالانۋى ماڭىزدى.

بيىل 500-دەن استام قىزمەتكەر «ەڭبەك جولى» رەسپۋبليكالىق بايقاۋىنا قاتىستى، ول ءۇش نوميناتسيادان تۇرادى: «ۇزدىك ەڭبەك اۋلەتى»، «جۇمىس ىستەيتىن جاستاردىڭ ۇزدىك تالىمگەرى»، ء«وندىرىستىڭ ۇزدىك جاس مامانى».

ەڭبەك اۋلەتتەرى – بۇل ماماندىققا دەگەن ادالدىقتىڭ، جوعارى جۇمىس شەبەرلىگىنىڭ، ۇرپاقتاردىڭ وتباسىلىق ەڭبەك ەرلىگىنىڭ سيمۆولى. ەڭبەك اۋلەتتەرى  كومپانيانىڭ بەرىك ىرگەتاسىن قالايدى، كورپوراتيۆتىك رۋحتى نىعايتادى.

تالىمگەرلەردىڭ ارقاسىندا جاس قىزمەتكەرلەر كومەك پەن كەڭەس الادى، سونىمەن قاتار ولاردىڭ داعدىلارىن جەتىلدىرۋدە عانا ەمەس، الەۋمەتتەنۋ مەن وسۋدە دە قاجەتتى قولداۋ الادى.

جاستار جانە سۇرانىسقا يە ماماندار – قازاقستاننىڭ دامۋى مەن باسەكەگە قابىلەتتىلىگىنىڭ كىلتى. ءبىز ءوز تاراپىمىزدان جاستارعا بارىنشا قولداۋ كورسەتۋىمىز كەرەك.

ارداگەرلەرىمىزگە ەرەكشە قۇرمەت بىلدىرگىم كەلىپ تۇر. ول كىسىلەر ناعىز تالىمگەرلىك ينستيتۋتىنىڭ رۋحىن كوتەرۋدە جانە بۇگىن دە سىزدەر كاسىبي جانە ادامگەرشىلىك تاجىريبەلەرىڭىزدى جاس ماماندارمەن ءبولىسىپ، ولاردى ەڭبەككە، جۇمىسشى ماماندىقتارعا دەگەن سۇيىسپەنشىلىكتى وياتىپ، وتانعا دەگەن جوعارى ءپاتريوتيزمدى تاربيەلەۋدەسىزدەر.

بۇگىن ماراپاتتالعان ەڭبەك ارداگەرى مەن «ەڭبەك جولى» رەسپۋبليكالىق بايقاۋىنىڭ جەڭىمپازدارى وسى اتاقتارىن ماقتان تۇتىپ جۇرەدى دەپ ويلايمىن»، دەدى تامارا دۇيسەنوۆا.

مينيستر «ەڭبەك ارداگەرى» مەدالدارىن ەڭبەك ارداگەرلەرى جانارگۇل ماگۋلوۆاعا، كابدۋلمان يمامبەكوۆكە جانە كۇنىمبالا باياحمەتباەۆاعا تاپسىردى.

بيىل «ەڭبەك جولى» كونكۋرسىنا ۇمىتكەرلەردەن وتىنىمدەردى قابىلداۋ 1 ساۋىردەن باستالدى. «ۇزدىك ەڭبەك اۋلەتى» نوميناتسياسىنا 163 ءوتىنىم، «جۇمىس ىستەيتىن جاستاردىڭ ۇزدىك تالىمگەرى» نوميناتسياسىنا 179 ءوتىنىم، ال ء«وندىرىستىڭ ۇزدىك جاس مامانى» نوميناتسياسىنا 180 ءوتىنىم كەلىپ ءتۇستى. 

كونكۋرستىڭ لاۋرەاتتارى رەسپۋبليكالىق كوميسسيانىڭ وتىرىسىندا جارىستىڭ ايماقتىق كەزەڭىندە جەڭىمپاز اتانعانداردان ىرىكتەلدى. كوميسسيا قۇرامىنا ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى، پارلامەنت دەپۋتاتتارى، الەۋمەتتىك سەرىكتەستەر، «اتامەكەن» ۇقپ مەن اقپارات جانە قوعامدىق دامۋ مينيسترلىگىنىڭ «قوعامدىق كەلىسىم» رمم وكىلدەرى كىردى.

«ۇزدىك ەڭبەك اۋلەتى» نوميناتسياسى بويىنشا اباي وبلىسىنىڭ تۋكۋباەۆتار اۋلەتى جەڭىمپاز اتاندى. ەكىنشى ورىندى شىعىس قازاقستان وبلىسىنىڭ كوۆالەۆتار اۋلەتى، ال ءۇشىنشى ورىندى ۇلىتاۋلىق بەكماعانبەتوۆتار اۋلەتى قانجىعاسىنا بايلادى.

جۇمىس ىستەيتىن جاستاردىڭ ۇزدىك تالىمگەرى اتاعىن الماتىدان كەلگەن ليۋدميلا حۆوستوۆا يەلەنسە، ەكىنشى جانە ءۇشىنشى ورىندى ەرعازى تۇرلىبەكوۆ (قاراعاندى وبلىسى) پەن جۇماباي ابدۋلوۆ (اتىراۋ وبلىسى) الدى.

ءوندىرىستىڭ ۇزدىك جاس ماماندارى اتاعىن: ناۋرىزبەك داكەن پاۆلودار وبلىسى (1 ورىن)، سۇلتان اۋكەن الماتى  وبلىسى (2 ورىن) جانە نۇرقاسىم بايشۋاقوۆ اقمولا وبلىسى (3 ورىن) يەلەندى.

كونكۋرس جەڭىمپازدارىنا اقشالاي سەرتيفيكاتتار تابىستالدى: 1 ورىنعا – 1 ملن تەڭگە، 2 ورىنعا – 500 مىڭ تەڭگە جانە 3 ورىنعا – 300 مىڭ تەڭگە.

ەڭبەك جانە حالىقتى الەۋمەتتىك قورعاۋ مينيسترلىگى 2016 جىلدان بەرى ەڭبەك اۋلەتتەرى مەن ءوندىرىس جۇمىسشىلارىنىڭ اراسىندا «ەڭبەك جولى» رەسپۋبليكالىق كونكۋرسىن ۇيىمداستىرىپ كەلەدى. ونىڭ باستى مىندەتى – ەڭبەك ادامدارى جايلى وڭ قوعامدىق پىكىر قالىپتاستىرۋ جانە كاسىپورىندار مەن مەكەمەلەردە جاڭا ەڭبەك اۋلەتتەرىنىڭ قالىپتاسۋىنا جاعداي جاساۋ.

سوڭعى جاڭالىقتار

الماتىدا ەكى اۆتوبۋس سوقتىعىستى

ايماقتار • بۇگىن، 11:33

ءوندىرىس كولەمى كەمىگەن

قازاقستان • بۇگىن، 08:58

ۇقساس جاڭالىقتار